Johanes 19 - Herero Revision Bible (HRR)

1 Oruveze ndo, Pilatus wa kamburire Jesus ne mu yandja kokutonwa ozongora. 2 Ovarwe wovita va ungurire oruzenga rwomakuiya nave ru twa kotjiuru tje. Okuzambo ave mu zarisa ombanda oserarovazu, 3 ave ryama popezu na ye nave tja: “Minikwa, Mbara yOvajuda!” Nowo ve mu tonene otupyu.

4 Pilatus wa pitire pendje rukwao na katja kotjimbumba: “Purateneye, ami me mu pitisa pendje ku eṋe, kokutja mu tjiwe kutja ami hi nokumuna mo ondjo mu ye.” 5 Jesus opa pitira pendje e noruzenga rwomakuiya kotjiuru nombanda oserarovazu morutu. Pilatus a tja ku wo: “Tareye, omundu eye ngwi!”

6 Ovapristeri oviuru novatjevere vondjuwo ya Muhona tji va muna Jesus, arire tji va ravaere ave tja: “Mu papera kotjikoroise! Mu papera kotjikoroise!”

Pilatus a tja ku wo: “Neṋe mu kambureye mu kemupapere kotjikoroise. Ami hi nokumuna mo ondjo mu ye.”

7 Ovajuda ve mu zirire ave tja: “Eṱe tu netwako, notja ketwako ndi eye u sokuṱa, tjinga ame ritja eye Omuna wa Ndjambi.” 8 Pilatus tja zuvire omambo nga wa tirire tjinene. 9 Eye wa yarukire rukwao mondjuwo youhona na kapura Jesus a tja: “Ove wa za pi?”

Nungwari Jesus ke mu zirire ko. 10 Pilatus arire tja tja ku ye: “Ko nakuhungira na ami are? Ko nokutjiwa kutja ami mbi nouvara okukukutura nokutja mbi nouvara okukupapera kotjikoroise are?”

11 Jesus a ziri a tja: “Ove kotjo kara nouvara kombanda yandje andakuzu ove ko u perwe i Ndjambi. Omundu ngwe ndji yandja kove opa karere nourunde tjinene.”

12 Pilatus tja zuvire omambo nga, arire tja paha omuhingo wokukutura Jesus. Nungwari imba Ovajuda va ravaerere ave tja: “Tji we mu kutura, okutja kaove epanga rombara yokombanda! Auhe ngu me ritja ombara okutja ma pirukire ombara yokombanda!”

13 Pilatus tja za nokuzuva omambo nga wa pitisa Jesus pendje na kahaama kotjihavero tjombanguriro moṋa mu mu isanewa kutja “Orupare rwOmawe”, (okutja mOtjiheberi “Gabata”.) 14 Ra ri eyuva romerirongerero wOpaska, noiri ya ri omurongo na mbari yomutenya. Pilatus a tja kOvajuda: “Tareye, Ombara yeṋu oyo ndji!”

15 Owo ave ravaere ave tja: “Nga ze po! Nga ze po! Kemupapere kotjikoroise!”

Pilatus arire tje ve pura a tja: “Mamu vanga kutja mbi kapapere Ombara yeṋu kotjikoroise are?”

Ovapristeri oviuru ave ziri: “Ombara, ndji tu na yo porwayo oyo ndji ombara yokombanda!”

16 Tjazumba Pilatus a yandja Jesus ku wo kutja ve kemupapere kotjikoroise.

Jesus ma paperwa kotjikoroise

(Mt 27:32-44Mk 15:21-32Lk 23:26-43)

Nowo va kamburire Jesus nave mu twara. 17 Jesus otjikoroise tje we tji toorere omuini okuyenda koṋa ku ku za “okOtjikongo tjOtjiuru”, (okutja mOtjiheberi “oGolgota”.) 18 Noku ve mu papera kotjikoroise puna ovarumendu vevari varwe komikuma aviyevari, nu Jesus e ri mokati. 19 Nu Pilatus wa tjangere omambo ne ye twa kotjikoroise kombanda, ngu maye tja: “OJesus wa Nasaret, Ombara yOvajuda.” 20 Ovajuda ovengi va resere omambo nga, orondu koṋa ngwi Jesus ka ka paperwa kotjikoroise tjinga aku ha ri kokure notjihuro. Nomambo nga ya tjangerwe mOtjilatina na mOtjiheberi na mOtjigrike. 21 Ovapristeri oviuru arire tji va tja ku Pilatus: “O tjanga kutja ‘Ombara yOvajuda’, nungwari tjanga nai: ‘Omundu ngwi wa tja: Owami Ombara yOvajuda.’ ”

22 Pilatus a ziri a tja: “Ihi tji mba tjanga, mba tjanga opuwo.”

23 Ovarwe wovita tji va za nokupapera Jesus kotjikoroise, arire tji va toora ozombanda ze nave ze haṋa motumbembera tune, nu omurwe wovita auhe wa muna orumbembera rumwe. Owo wina va toorere ombanda ye onde yokombanda. Ombanda ndji kaya ri nomupambo okuza kombanda nu ya wozerwe otjiṋa tjimwe aihe. 24 Ovarwe wovita mba va raerasanane kutja: “Atu taura ombanda ndji, ngatu yumbe ozohanga tu tjivirwe po kutja mai rire oyauṋe.” Otjiṋa hi tja tjitirwa kutja omatjangwa ye yenenisiwe ngu maye tja:

“Owo va haṋasana ozombanda zandje

nave yumbire ombanda yandje yokombanda ozohanga.”

Noviṋa mbi vya tjitirwe i ovarwe wovita.

25 Nu potjikoroise tja Jesus pa kuramene ina nomuangu waina na Maria, omukazendu wa Kleopas, na Maria Magdalena. 26 Jesus tja munine ina nomuhongewa ngwi eye ngwa suverere tjinene a kurama pu ina, arire tja tja ku ina: “Ingwi omuatje woye.”

27 Okuzambo a tja komuhongewa: “Ingwi eye onyoko!” Nokuza koiri ndjo omuhongewa ngwi we mu yakura moye.

Onḓiro ya Jesus

(Mt 27:45-56Mk 15:33-41Lk 23:44-49)

28 Nu kombunda yanao Jesus tjinga aa tjiwa kutja oviṋa avihe vya manuka kokutja omatjangwa ye yenenisiwe, arire tja tja: “Mba ṱonyota.”

29 Nu poṋa mbo pa ri otjitjuma tji tje urire nomavinu omayake. Ovarwe wovita arire tji va tjaveke otjiyave momavinu nga, ave tji kutu kokati kokahisopa nave tji twa komiṋa vye. 30 Nu Jesus tja zire nokupewa omavinu nga wa tjere: “Tja tjitwa tja yenene!”

Tjazumba a pete otjiuru tje, narire tja ṱu.

Jesus ma twerewa morupati

31 Nu ra ri Oritjatano, nOvajuda kave vangere kutja otutu tu kare kovikoroise mesabata, esabata ndo tjinga ara ri eyuva eyapuke. Owo opu va ningirira Pilatus kutja omarama wa imba mba paperwa kovikoroise ye teyewe nokutja ve herure otutu twawo kovikoroise. 32 Ovarwe wovita arire tji ve yokuteya omarama waingwi omutenga, okuzambo ave teya owaingwi omukwao ngwa papererwe puna Jesus kovikoroise. 33 Nu tji ve ere ku Jesus va munine kutja eye wa ṱu rukuru, notji ve ha teyere omarama we. 34 Nungwari omurwe umwe wovita wa twerere Jesus morupati nenga re, nu tjimanga amu piti ombinḓu nomeva. 35 Nu ingwi ngwa munine otjiṋa hi we tji hongonona, nomahongononeno we ouatjiri. Eye ma tjiwa kutja ma hungire ouatjiri, kokutja eṋe wina mu kambure. 36 Ihi tja tjitirwa kutja omatjangwa ye yenenisiwe ngu maye tja: “Kape neṱupa re nangarire rimwe ndi mari teyewa.” 37 Nomatjangwa omakwao parwe maye tja: “Owo mave munu ingwi ngu va tuvakanisa enga.”

Ombakero ya Jesus

(Mt 27:57-61Mk 15:42-47Lk 23:50-56)

38 Kombunda yoviṋa mbi Josef, ngwa zire kOarimatea, wa ningirire Pilatus kutja a katoore orutu rwa Jesus. Josef wa ri omuhongewa wa Jesus mongumumu, tjinga aa tira ovanane vOvajuda. Pilatus arire tja itavere, nu Josef wa katoora orutu rwa Jesus. 39 Nu Nikodemus, rutenga ngwa kaṱarere Jesus mouṱuku, wa ire puna Josef, nu wa ri novyomoro omuwa vyozokirograma mangara omirongo vitatu mbya hovekerwe nomamira novindombo. 40 Ovarumendu vevari mba arire tji va katoora orutu rwa Jesus nave ru manga merapi puna ovyomoro omuwa otja komuhingo Ovajuda mbu ve ṱuna orutu tji maru pakwa. 41 Nu poṋa Jesus pa papererwe kotjikoroise pa ri otjikunino, nu mu tjo mwa ri eyendo epe mu mu hi na indu mwa pakerwe omundu. 42 Mu ro omu va paka Jesus, tjinga ara ri eyuva rokomurungu wesabata, nu indi eyendo tjinga ara ri popezu.