Amasja ma rire ombara mOjuda
(2Eku 25:1-24)1 Mombura oitjavari youhona wa Joas, omuzandu wa Joahas, ombara ya Israel, Amasja, omuzandu wa Joas, otja rira ombara mOjuda, 2 e notjiwondo tjozombura omirongo vivari nandano; neye wa honapara oure wozombura omirongo vivari na muvyu mOjerusalem. Ina wa ri Joadan ngwa zire kOjerusalem. 3 Amasja wa tjita imbi mbyaa vi tjata ku Muhona, nungwari ka ri otja ihe mukururume David; eye wa tjita imbi ihe Joas mbya tjiti. 4 Eye ka haṋene poṋa apehe pomerikotameneno kovisenginina kozondunda, novandu va kara pokupunguhira ozombunguhiro nokutwimisira ovyomoro omuwa poṋa mbo.
5 Kamanga Amasja tja za nokuzikama mouhona, wa zepa ovahongore avehe, mba zepere ihe ombara. 6 Eye ka zepere ovanatje vawo, nungwari wa tjita imbi Muhona mbya rakizire mEmbo rOmatwako ra Moses, indu tja tjere: “Ooihe ngaave ṱire ouvi wovanatje, novanatje ngaave ṱire ouvi wooihe; omundu auhe nga ṱire ouvi we omuini.”
7 Amasja wa zepera ovarwe wovita vOvaedom omayovi omurongo mOtjana tjOmongwa; eye wa huura otjihuro Sela ne tji ruku Jokteel, ena ndi tji na ro nga ku ndinondi.
8 Tjazumba Amasja wa hinda ovatumwa ku Joahohas, ombara ya Israel, na tja: “Indjo tu rwe!” 9 Nungwari ombara Joas wa yarura eziriro ndi na tja: “Otjikando tjimwe otjihwa tjomakuiya tji tja ri kozondundu za Libanon tja hinda ombuze ndji korupapa atji tja: ‘Ndji pao omusuko woye a kupwe i omuzandu wandje.’ Nungwari pa kapita ovipuka vyokuti mbo navi tombo otjihwa hi. 10 Nambano ove, Amasja, wa havera Ovaedom, notji mo ritongamisa. Kowa nohivo yoye, nu kara poyoye! Okutjavi tji mo ripahere oumba mbu mau eta oviwonga porwavyo kove na kotjiwaṋa tjoye?”
11 Nungwari Amasja ka puratenene ko, nombara Joas wa kumuka novandu ve na karwisa ombara Amasja mObet-Semes mOjuda. 12 Otjimbumba tja Amasja tjovita tja haverwa, novarwe ve wovita avehe va taurira kozonganda zawo. 13 Joas wa kambura Amasja, e mu twara kOjerusalem na kahaṋa orumbo rwotjihuro okuza kOmuvero wa Efraim nga kOmuvero wOkotjikoro, oure wozometa mangara omasere yevari. 14 Eye wa toora osilveri nongoldo aihe ndja muna, noviungurise avihe vyondjuwo ya Muhona, novihuze avihe vyondjuwo youhona ne vi twara kOsamaria. Wina wa twaerera ovahuurwa vomoruveze.
15 Oviṋa avihe vyarwe Joas mbya tjita, nouvanḓe we tja rwisa Amasja, ombara ya Juda, vya tjangwa mEkuruhungi rOzombara za Israel. 16 Joas wa koka na pakwa momaendo wouhona mOsamaria, nomuzandu we Jerobeam II we mu pingena mouhona.
Onḓiro ya Amasja, ombara ya Juda
(2Eku 25:25-28)17 Kombunda yonḓiro ya Joas, ombara ya Israel, Amasja, ombara ya Juda, wa hupa oure wozombura omurongo nandano. 18 Oviṋa avihe vyarwe Amasja mbya tjita vya tjangwa mEkuruhungi rOzombara za Juda.
19 Ovandu mOjerusalem ve rikuta kumwe okuzepa Amasja; neye otja taurira kotjihuro Lakis, nungwari ovanavita na ye ve mu tezera nave kemuzepera ngo. 20 Orurova rwe rwa tuwa kokakambe, aru yarurwa kOjerusalem naru kapakwa momaendo wouhona mOtjihuro tja David. 21 NOvajuda va zika omuzandu we Usija, ngwa ri nozombura omurongo na hamboumwe, okurira ombara. 22 Kombunda yonḓiro ya ihe, Usija wa huura nokukotora otjihuro Elat ne tji tungurura.
Jerobeam II ma rire ombara mOisrael
23 Mombura oitjamurongo nandano youhona wa Amasja, omuzandu wa Joas, ombara ya Juda, Jerobeam, omuzandu wa Joas, otja rira ombara mOisrael; neye wa honapara oure wozombura omirongo vine na imwe mOsamaria. 24 Eye wa tura ondjo komurungu wa Muhona na horere komauvi wombara Jerobeam, omuzandu wa Nebat, ngwa ri po komurungu we nu ngwa porere Ovaisrael ku Muhona. 25 Eye wa kotora ehi arihe nda ri ora Israel, okuza komakapitiro wa Hamat keyuva kokunene nga kOmuronga wOmongwa keyuva kokumuho. Ihi otjo Muhona, Ndjambi wa Israel, tja kwizikire notjinyo tjomukarere we, ingwi omuprofete Jona, omuzandu wa Amitai, ngwa zire kOgat-Hefer.
26 Muhona wa muna omahihamisiro omatirise tjinene wOvaisrael; kapa ri omundu kaparukaze okuvevatera. 27 Nungwari kaya ri ombango ya Muhona okuyandeka Ovaisrael oparukaze; neye otje ve yama nombatero yombara Jerobeam II.
28 Oviṋa avihe vyarwe Jerobeam II mbya tjita, nouvanḓe we movirwa na indu tja kotora Damaskus na Hamat kOvaisrael, avihe mbi vya tjangwa mEkuruhungi rOzombara za Israel. 29 Jerobeam wa koka na pakwa momaendo wouhona, nomuzandu we Sakaria we mu pingena mouhona.
© Herero Revision Bible © Bible Society in Namibia, 2021.
