Omatungururiro wondjuwo ya Muhona maye tjaerwa
1 Ovanavita novandu va Juda nOvabenjamin va zuva kutja imba mba kotokere okuza kouhuura mave tungurura ondjuwo ya Muhona, Ndjambi wa Israel. 2 Nowo otji va ya ku Serubabel na koviuru vyozonganda nave katja nai ku wo: “Ngatu rikute kumwe tu tunge ondjuwo ya Muhona. Eṱe tu rikotamena ku Ndjambi tjingeye ingwi eṋe ku mu rikotamena, nu tu mu punguhira ozombunguhiro okuza koruveze ndwi Asarhadon, ombara ya Asirie, ndwe tu hinda kutja tu yekutura muno.”
3 Serubabel na Jesua noviuru vyozonganda arire tji va ziri nai ku wo: “Eṱe katu nokuvanga ombatero yeṋu mokutunga ondjuwo ya Muhona, Ndjambi wetu. Matu i tungu oveni otja Kirus, ombara ya Persie, pe tu rakiza.”
4 Tjazumba ovandu, mba tura mehi otji va kondja okutjaera Ovajuda nokuvemumaparisa kutja ave ha tungu. 5 Owo wina va popa ovahongore vouhona wa Persie notjimariva kutja ve ve tjaere. Va kara pokutjita nai ombara Kirus ngunda e ri mouhona nga mouhona wa Darius, ombara ya Persie.
Omatungururiro wa Jerusalem maye tjaerwa
6 Mombutiro youhona wombara Kerkes imba ovanavita novature va Juda nova Jerusalem otji ve ve tjangera embo rokuverondora.
7 Mouhona wa Artakerkes, ombara ya Persie, wina Bislam na Mitredat na Tabeel noverikutevakumwe na wo va tjanga orutuu kombara. Orutuu ndwi rwa tjangwa mOtjiaramei, norwo tjaa ru resewa aa ru torokwa.
8 Rehum, ongooneya, na Simsai, omutjangerepo wouhona, wina va tjanga orutuu ndwi ku Artakerkes ndwa tjama na Jerusalem:
9 “Orutuu ndwi maru zu ku Rehum, ongooneya, na Simsai, omutjangerepo wouhona, noverikutevakumwe na wo, novapangure novahongore avehe varwe, mba zire kOerek na Babilon na Susa, mehi ra Elam, 10 pamwe novandu varwe, mba isiwa mo mozoyawo i Asenapar, ingwi omutjiukwa nomunauvara, neye mba katurisa movihuro vya Samaria, na akuhe kwarwe morukondwa rwehi rokongurova kwonḓonḓu Eufrat.”
11 Omambo worutuu owo nga:
“Kombara Artakerkes. Orutuu ndwi maru zu kovakarere voye, imba ovarumendu mba tura mehi rokongurova kwa Eufrat.
12 “Muhona, eṱe matu vanga u tjiwe kutja Ovajuda mbe ya muno okuza komahi woye warwe va tura mOjerusalem, nu mave tungurura otjihuro ho otjirunde notjihinonḓuviro. Owo va uta okutungurura orumbo rwatjo, nu ve ri pokumana. 13 Muhona, otjihuro hi tji tja tungururwa, norumbo rwatjo tji rwa manuka, ovandu mave isa okusuta otjisuta tjouhona, novimariva vyoye vyouhona mavi heruka. 14 Nambano tjinga atu ri kehi yondyero yoye, muhona, katu nokuvanga kutja otjiṋa hi tji tjitwe; opu twe ripurire 15 kutja u rakiza pe tjitwe omakonḓononeno mEkuruhungi rooiho mukururume. Tji wa tjiti nai, mo munu mEkuruhungi ndi kutja otjihuro hi tji zungana, nokutja okuza koruveze orukuru otjo tji eta oumba kozombara na kovanane votukondwa. Ovandu vatjo aruhe va ri ovirangaranga, kaave vanga okuhongorerwa. Otjihuro hi opu tja za okuhaṋewa. 16 Eṱe matu ku tjivisa kutja otjihuro hi tji tja tungururwa, norumbo rwatjo tji rwa manuka, ove, muhona, komoo yenene okuhonaparera orukondwa rwehi rokongurova kwa Eufrat.”
17 Indji ombara ya yarura eziriro ndi: “Ku Rehum, ongooneya, na Simsai, omutjangerepo wouhona, na koverikutevakumwe na wo mba tura mOsamaria na mehi rokongurova kwa Eufrat, ozombinika!
18 “Orutuu ndu mwa tjanga ku ami rwa rundururwa aru reserwa ami. 19 Ami mba rakiza kutja pe tjitwe omakonḓononeno, nu, tjiri, pa munika kutja okuza koruveze orukuru otjihuro hi Jerusalem tji pirukira ozombara, nokutja aruhe tji kara novazungane novatjite voumba. 20 Ozombara ozonauvara za honapara motjihuro hi na morukondwa rokongurova kwa Eufrat, amaze wongo otjisuta tjouhona novimariva vyouhona. 21 Opu mwa pu okurakiza ovarumendu mbo kutja ve ise okutungurura otjihuro, nga tji mba yandja omarakiza warwe. 22 Tjiteye nai tjimanga, kokutja ape ha uhara amape tjitwa otjipo kouvara wombara.”
23 Orutuu ndwi ndwa za ku Artakerkes tji rwa za nokureserwa Rehum na Simsai noverikutevakumwe na wo, owo otji va hakahana okuyenda kOjerusalem nave katjaera Ovajuda noutwe kutja ave ha uhara amave tungurura ihi otjihuro.
Oviungura vyondjuwo ya Muhona mavi utwa rukwao
24 Oviungura vyondjuwo ya Muhona vya kuramene, nu vya vandamene nao nga mombura oitjavari youhona wa Darius, ombara ya Persie.
© Herero Revision Bible © Bible Society in Namibia, 2021.
