1 Okuza ku Paulus, ngwa rira omuapostele wa Kristus Jesus otja kombango ya Ndjambi.
Matu tjanga orutuu ndwi kotjiwaṋa tja Ndjambi kOefese tji tja kambura mu Kristus Jesus.
2 Ndjambi Tate na Muhona Jesus Kristus nge mu pe otjari nohange.
Ondangero ku Ndjambi kotjari tje
3 Ndjambi, Hiya Muhona wetu Jesus Kristus, nga hivirikwe! Eye we tu sera ondaya mu Kristus mokutupa ozondaya azehe zOmbepo zomeyuru. 4 Ouye ngunda au hiya utwa, Ndjambi we tu toororera okurira ove mu Kristus kokutja tu rire ovayapuke novehinandjo komurungu we.
Nu morusuvero rwe 5 Ndjambi wa tyere rukuru okutuisa po ovanatje ve mu Jesus Kristus punga ape tjata kombango ye. 6 Opu tu sokuhivirika Ndjambi motjimbe tjotjiyandjewa tje otjinene tje tu pa otja kotjari tje mOmuna we omusuverwa. 7 Orondu mombinḓu ya Kristus eṱe omu twa kuturwa nu omu twa isirwa ourunde wetu otja kouingi wotjari tja Ndjambi 8 Eye tje tu pa mounongo auhe we na mondjiviro ye aihe.
9 Eye we tu tjivisa oviundikwa vyombango ye mbya tyere rukuru. 10 Nu moruveze orusemba Ndjambi wa vangere okuyenenisa ondyero ndji mu Kristus. Nondando ye ya ri ingwi okuworonganisa oviutwa avihe meyuru na kombanda yehi mu Kristus ngu ri otjiuru.
11 Ndjambi oviṋa avihe u vi tjita otja kombango nondyero ye, nu eye wetu toorora kutja tu rire ove moruwano na Kristus otja kondyero ye okuza kombutiro. 12 Neṱe mbu twa tenga po okukara nomaundjiro wetu mu Kristus opu twa sokuhivirika ounene wa Ndjambi!
13 Neṋe wina mwa rira otjiwaṋa tja Ndjambi, indu tji mwa zuva ombuze youatjiri, indji Ombuze Ombwa ndje mu pa ombwiro yomuinyo. Eṋe mwa kambura mu Kristus, nu Ndjambi wa twako otjihako tjouini we ku eṋe mokumupa Ombepo Ondjapuke ndja kwizikire, 14 Eye ngu ri otjiyambo tjokutja eṱe matu pewa imbi Ndjambi mbya kwizikira otjiwaṋa tje. Nu ihi matji raisa kutja Ndjambi, tjiri, u nombango okuyandja onguturiro aihe okuura ku imba mbe ri ove. Ngatu tange ounene we!
Ongumbiro ya Paulus
15 Okuza indu tji mba zuvire ongamburiro yeṋu mu Muhona Jesus, norusuvero rweṋu kotjiwaṋa atjihe tja Ndjambi, opu me zu 16 okuhinakuisa okumutjera okuhepa ku Ndjambi. Ami aruhe mbi mu zemburuka mozongumbiro zandje. 17 Ami mbi kumba ku Ndjambi wa Muhona wetu Jesus Kristus, Ihe yondjozikiro aihe, kutja e mu pe Ombepo Ondjapuke, eye me mu nongaparisa nokumuvandururira Ndjambi, kokutja eṋe mu mu tjiwe tjiri. 18 Mbi kumba kutja eye a paturure omeho weṋu mu mune ondjerera ye, kokutja mu tjiwe kutja omaundjiro nge mu isanena owo otjikeṋa, nokutja ouingi wozondaya ozohimise nḓa kwizikira otjiwaṋa tje, u ṱa pi, 19 nokutja omasa we nge ungura mu eṱe ovakambure omanene tjinene pu pe ṱeki pi. Omasa nge ungura mu eṱe nga onge ri tjingewo nga omanene 20 Eye nga pendura na wo Kristus movakoke nu nge mu haamisa na wo kokunene kwe meyuru. 21 Kristus u honapara kombanda yomauhonapare, nomauvara, nomasa, nomauhona, aehe. Neye u honapara kombanda yomana aehe nangarire mouye mbwi nu nangarire mouye mbu mauya. 22 Ndjambi wa wisa avihe kehi yozombaze za Kristus. Nungwari eye, ngu ri oMuhona kombanda yaavihe, Ndjambi we mu zika okurira otjiuru tjombongo. 23 Ombongo oyo orutu rwa Kristus, omeurisiro waingwi eye omuini ngu urisa avihe mu avihe.
© Herero Revision Bible © Bible Society in Namibia, 2021.
