Esekiel 21 - Herero Revision Bible (HRR)

Engaruvyo ra Muhona

1 Muhona wa hungira ku ami a tja: 2 “Muatje womundu, zika omeho woye mOjerusalem nu u hungire ohunga oruveze romerikotameneno watjo. Hungira omaukiro kehi ra Israel amo tja: 3 Ami, ngu mbi ri Muhona, me tja nai: Ami me ku sekamene. Me nana engaruvyo randje motjihweka nu e mu zepa amuhe, ovasemba novahasemba. 4 Ami me ungurisa engaruvyo randje ku auhe okuza komukuma wokeyuva kokumuho. 5 Auhe ma tjiwa kutja ami, ngu mbi ri Muhona, owami ngu mba nana engaruvyo randje, nu himee ri yarura mo motjihweka.

6 “Muatje womundu, tjema aayo omutima woye wa nyaika nu kara noruhoze poṋa omundu auhe pu me ku munu. 7 Tji mave ku pura kutja oruhoze rwa tjike ndu u naro, ve raera kutja omena rOmbuze, ndji mai ya. Oyo tji ye ya, omitima vyawo mavi mumapara nomaoko wawo maye rekareka aya remana; owo mave rihahiza, nozongoro zawo maze zezera. Oruveze rweya; orondwi.” Muhona Ndjambi ongwa hungire nai.

8 Muhona wa tja nai ku ami: 9 “Muatje womundu, uka. Raera ovandu imbi ami, ngu mbi ri Muhona, mbi me hungire:

Engaruvyo, engaruvyo ra upikwa

nu ra keṋakeṋisiwa.

10 Ra upikirwa okuzepa,

ra serurirwa okukeṋakeṋa

tjimuna orutjeno rwombura.

Kape nokukara enyando,

orondu otjiwaṋa tjandje katji ningire

ko na tja nomaronga nomberero aihe.

11 Engaruvyo mari keṋakeṋisiwa

kutja ri ungurisiwe.

Oro ra upikwa nari serurwa kutja

ri tuwe momake womuzepe.

12 Ura nu u rire, muatje womundu;

engaruvyo ndi ra tyerwa otjiwaṋa

tjandje novanene avehe va Israel.

Owo mave ṱu puna otjiwaṋa tjandje atjihe.

Ripambara motjari awe rihahiza!

13 Ami me roro otjiwaṋa tjandje,

notjo tji tja panḓa okuritanaura,

oviṋa mbi avihe mavi tjitwa ku tjo.

14 “Nambano, muatje womundu, uka. Tona ozongwise, nengaruvyo mari zepa ara zepere. Oro engaruvyo, ndi zepa, engaruvyo, ndi tirisa nu ndi tjita otjiṱiro. 15 Oro mari tjiti otjiwaṋa tjandje tji rihahize novaṱi ve rire ovengi. Ami me tanda otjihuro tjawo nengaruvyo, ndi mari keṋakeṋa tjimuna orutjeno rwombura nu nda upikirwa okuzepa. 16 Konda kokunene na kokumuho, ngaruvyo etwe! Konda ngamwa akuhe ku mo tanaukire. 17 Ami wina me tono otukwise, nomazenge wandje aye u pehi. Ami, ngu mbi ri Muhona, owami ngu mba hungire.”

Engaruvyo rombara ya Babilon

18 Muhona wa tja nai ku ami: 19 “Muatje womundu, saneka ozondjira mbari ombara ya Babilon mu mai ya nengaruvyo rayo. Azeyembari maze utire mehi tjingero. Zika otjihenḓe tjoviurike ozondjira pu maze haṋikire. 20 Tjimwe matji urikire ombara ondjira yokotjihuro tjOvaamoni, Raba, notjikwao matji urike ondjira ndji yenda kOjuda, kotjihuro Jerusalem tji tja zeuparisiwa. 21 Ombara ya Babilon ya kurama potjihenḓe tjoviurike pomahakaeneno wozondjira. Oyo mai taka oviku i tjiwe kutja mai sokutwara ondjira iṋe; mai pura koviserekarera vyovisenginina nai tara ehuri rotjinamuinyo tjombunguhiro. 22 Nambano! Eke rayo rokunene ra ṱiza otjiku tji tja tjangwa ‘Jerusalem’. Otjo matji i raere kutja i yende nu i katwe po oviteye vyorumbo nu i katoṋe ombimbi, nokukatwa po oviteye vyorumbo pomuvero nokukayumba ondunduvahi nokukasa oturora. 23 Ovature va Jerusalem kave kamburire moviṋa mbi mena rotuyano tu va tjita. Nungwari omaukiro nga owokuvezemburukisa ouvi wawo nowokuveronga kutja mave kamburwa. 24 Ami, ngu mbi ri Muhona Ndjambi, otji me tja nai: Ourunde weṋu wa horoka. Omundu auhe ma tjiwa ozondjo zeṋu. Eṋe mamu raisa omauvi weṋu mozondjito zeṋu azehe. Eṋe mwa sengwa, nami me mu yandja kovanavita na eṋe.”

25 “Ove murunde, munane omuhayapuke wa Israel, eyuva roye, indi romberero yoye osenina, re ya. 26 Ami, ngu mbi ri Muhona Ndjambi, owami ngu mba hungire. Isa ko ekori roye rouhona nombeta yoye! Kape notjiṋa tji matji kara omuhingo tjingewo rukwao. Owokehi ma tongamisiwa, nowokombanda ma susuparisiwa! 27 Otjitambatundu, otjitambatundu, ii, ami me tjiti otjihuro okurira otjitambatundu. Nungwari otjiṋa hi ingee katji nokutjitwa nga ingwi ngu mba toororera okuvera otjihuro tje ya. Notjo otji me tji yandja ku ye.”

Engaruvyo nOvaamoni

28 “Muatje womundu, uka. Tjivisa imbi ami, ngu mbi ri Muhona Ndjambi, mbi me hungire kOvaamoni mbe yamburura Ovaisrael. Itja nai ku wo:

Engaruvyo ra upikirwa okunyona,

oro ra keṋakeṋisiwa kutja ri zepe

nu ri tone otja orutjeno rwombura.

29 Ovirimunikise, mbi mu muna, vi ri posyo, nomaukiro ngu mu uka, ovizeze. Oweṋe ovahasemba novanauvi, neyuva reṋu re ya, indi eyuva romberero yeṋu osenina. Engaruvyo mari wire komangoti weṋu.

30 “ ‘Yarura mo engaruvyo motjihweka! Ami me ku pangurire moṋa mu wa memenwa, mehi mu wa kwaterwa. 31 Ove mo munu omazenge wandje tji mbe ye tanaurire move tjimuna orururumo rwomuriro. Nu ami me ku yandja kovandu ovindandi mbe tjiwa okunyona. 32 Ove mo sesetwa i omuriro. Ombinḓu yoye mai tirahirwa mehi roye omuini, nu kape na ngu ma uhara ame ku zemburuka rukwao, orondu ami, ngu mbi ri Muhona, owami ngu mba hungire.’ ”