Ouvi wovandu mau takavara
1 Ovandu tji va uta okutakavara kombanda yehi arihe, va ri novakazona wina. 2 Novaengeri va Ndjambi tji va, va muna kutja ovanatje ovakazona mba vovandu ovawa, arire tji ve ritoororere ngamwa imba owo mbu mave vanga okurara puna wo. 3 Muhona opa tjera nai: “Ami hi nokuisa ovandu kutja ve karerere nomuinyo, owo tjinga averi ovonyama; nungwari nambano mave hupu oure wozombura esere nomirongo vivari uriri.” 4 Momayuva ngo na kombunda yanao mwa ri ovandu ovare novanamasa kombanda yehi. Novaengeri va Ndjambi aave rungasana novasuko vovandu, nowo ave ve pandukire ovanatje. Owo va ri omapenda omanene novarumendu ovatjiukwa momayuva ngo warukuru.
Ouvi mau ryama komurungu
5 Nu Muhona wa muna kutja ourunde wovandu wa takavara kombanda yehi, nokutja omeripuriro wawo omavi momitima vyawo ye ryamena ko kouvi porwe. 6 Muhona opa hihamenwa omutima kutja wa ungura ovandu ne ve twa kombanda yehi; neye wa ṱoruhoze tjinene. 7 Nu Muhona arire tja tja: “Ami me vanga okuyandeka omundu ngu mba mema kombanda yehi. Wina ami me vanga okuyandeka ovinamuinyo novipuka, mbi honahona, nozonḓera zeyuru, orondu ami me hihamwa omutima kutja mbe vi ungura.” 8 Nungwari Noa ongwa muna otjari ku Muhona.
Noa
9 Indi oro ehungi ra Noa: Noa wa ri omurumendu omusemba nomuṱakame moruveze rwe. Eye aa ryanga puna Ndjambi. 10 Noa wa ri novazandu vetatu: OoSem na Ham na Jafet. 11 Nu ovandu avehe va ri ovavi komurungu wa Ndjambi, nehi arihe re urire nozondjito zouvi. 12 Ndjambi wa muna kutja ehi ra zunḓaka; orondu ovandu avehe tjinga aave hupu mongarero yourunde kombanda yehi.
13 Nu Ndjambi opa tjera nai ku Noa: “Ami mbe ripura okuyandeka ovandu avehe; orondu indi ehi tjinga are urisiwa nozondjito zoutwe wovandu. 14 Ritungira otjitendeze nomiti. Twa mo ovituwo mu tjo, nu tji romba nondombo moukoto nopendje. 15 Ngatji kare noure wozometa esere nomirongo vitatu nandatu, nozometa omirongo vivari na mbari kouparanga, nozometa omurongo nandatu koutonga. 16 Twa ko omututu ku tjo, nu sya po oruveze orusupi rwozosentimeta omirongo vine na ine pokati komututu novivangwa. Tji tunga otuteto tutatu, kehi nopokati nokombanda; nomuvero ngau kare mekuma rotjitendeze. 17 Tara, ami me eta omupupo womeva kombanda yehi okuyandeka ngamwa otjinamuinyo. Otjiṋa ngamwa atjihe tji tji ri kombanda yehi matji ṱu. 18 Nungwari me tjiti omerikutiropamwe na ove. Hita motjitendeze, ove novazandu voye nomukazendu woye, novakazendu vovazandu voye. 19 Hitisa mu tjo wina otjirume notjikaze tjovinamuinyo ngamwa avihe kutja vi hupe puna ove. 20 Vivari vyomuhoko auhe wozonḓera novipuka ovinene noviṱiṱi ngavi hite puna ove motjitendeze kutja vi hupe. 21 Nu toora ovikurya ngamwa avihe, mbi sokuriwa i ove novinamuinyo.” 22 Nu Noa wa tjita atjihe tja rakizirwe i Ndjambi.
© Herero Revision Bible © Bible Society in Namibia, 2021.
