Esra 8 - Herero Revision Bible (HRR)

Ovandu mba kotoka okuza kouhuura

1 Inga owo omana woviuru vyozonganda mbya ri mouhuura mObabilon nu mbya kotoka puna ami Esra kOjerusalem, Artakerkes ngunda e ri ombara:

2 OGersom wonganda ya Pinhas, na Daniel wonganda ya Itamar, na Hatus, omuzandu wa Sekarna, wonganda ya David; 3 na Sekania wonganda ya Paros ovarumendu 150 vonganda ye, mba tjangwa membo romuhoko wawo. 4 Wina oEljoenai, omuzandu wa Israkja wonganda ya Pahat-Moab, puna ovarumendu 200; 5 na Sekania, omuzandu wa Jahasiel, wonganda ya Satu puna ovarumendu 300; 6 na Ebed, omuzandu wa Jonatan, wonganda ya Adin puna ovarumendu 50; 7 na Jesaja, omuzandu wa Atalja, wonganda ya Elam puna ovarumendu 70; 8 na Sebadja omuzandu wa Mikael, wonganda ya Sefatia puna ovarumendu 80; 9 na Obadja, omuzandu wa Jehiel, wonganda ya Joab puna ovarumendu 218; 10 na Selomit, omuzandu wa Josifa, wonganda ya Bani puna ovarumendu 160; 11 na Sakaria, omuzandu wa Bebai, wonganda ya Bebai puna ovarumendu 28; 12 na Johanan, omuzandu wa Katan, wonganda ya Asgad puna ovarumendu 110; 13 na Elifelet na Jeiel na Semaja vonganda ya Adonikam puna ovarumendu 60; owo va kotoka kombunda yanao; 14 na Utai, omuzandu wa Sakur, wonganda ya Bigwai puna ovarumendu 70.

Esra ma paha Ovalevi ve karere mondjuwo ya Muhona

15 Ami mba woronganisira otjimbumba atjihe meṋe yonḓonḓu, ndji pupira kotjihuro Ahava, neṱe twa tona ozondanda nḓo oure womayuva yetatu. Nu mba muna kutja motjimbumba hi mwa ri ovapristeri, nungwari kamwa ri Ovalevi. 16 Mba hinda ovanane muvyu, okutja ooElieser na Ariel na Semaja na Elnatan na Jarib na Elnatan na Natan se Sakaria na Mesulam, novahonge vevari ooJojarib na Elnatan. 17 Ami mbe ve hinda ku Ido, otjiuru ohongora motjirongo Kasifja kutja ve ka ningire ku ye na kovakwao, okutja imba ovaungure vondjuwo ya Muhona, kutja ve tu hindire ovandu mbu mave karere ondjuwo ya Ndjambi wetu.

18 Motjari tja Ndjambi owo ve tu hindira Serebja, omurumendu omusore wonganda ya Makli, omuzandu wa Levi, omuzandu wa Israel puna ovazandu ovazamumwe ve; avehe kumwe va ri ovarumendu omurongo na hambondatu. 19 Wina va hinda Hasabja nomuangu we Jesaja vonganda ya Merari puna ovazamumwe vawo; avehe kumwe va ri ovarumendu omirongo vivari. 20 Puna imba pa ri ovaungure 220 vondjuwo ya Muhona vooihe mukururume mba yandjerwe i ombara David novahongore ve kutja ve vatere Ovalevi. Avehe va tjangwa omana.

Esra ma hongorere otjiwaṋa mokuritjaera kovikurya na mongumbiro

21 Imbo ponḓonḓu Ahava ami mba rakiza kutja atuhe tu ritjaere kovikurya nu tu risusuparise komurungu wa Ndjambi wetu, tu ningire kutja e tu ṱike mouyenda wetu, nu e tu yame puna ovanatje vetu nouini wetu auhe. 22 Ami etje ṱohoṋi andakuzu mba ningira otjira tjovarwe wovita novakavire kombara kutja ve tu tjevere kovanavita ngamwa avehe mouyenda wetu, tjinga amba raerere ombara kutja Ndjambi wetu u yama auhe ngu me riyameke ku ye, nungwari kutja eye ke nohange na imba mbu mave mu pe etambo, nu meve vere. 23 Eṱe otji twe ritjaera kovikurya natu kumbu ku Ndjambi kutja e tu yame, neye we tu zuvira ozongumbiro zetu.

Oviyandjewa mbya yandjerwa ondjuwo ya Muhona

24 Ami mba toorora ovapristeri ozohongora omurongo na vevari, okutja ooSerebja na Hasabja puna ovakwao omurongo. 25 Tjazumba otji mba saneka osilveri nongoldo novitjuma kotjisanekero mbya yandjerwe i ombara novayandjandunge novahongore vayo nOvaisrael mba ri mbo wina kutja vi ungurisiwe mondjuwo ya Muhona, nu arire tji mbe vi yandja kovapristeri.

26 Oviṋa, mbi mbe ve pa, ovyo mbi: Osilveri yondjinda yozokirograma mangara 19 500, novitjuma esere rimwe vyosilveri yondjinda yozokirograma omirongo hambombari; 27 nongoldo yondjinda yozokirograma 3,000, noviyaha omirongo vivari vyongoldo yondjinda yozokirograma hambondatu, noviyaha vivari vyongoporo ongohoke mbi nonḓengu ndji ṱeki pu indji yoviyaha vyongoldo.

28 Ami mba tja nai kovapristeri mba: “Eṋe oweṋe ovayapuke komurungu wa Muhona, Ndjambi wooiho mukururume, novitjuma avihe vyosilveri novyongoldo mbya etwa ku ye otja oviyandjewa vyombango yeṋu oveni, ovyo oviyapuke wina. 29 Vi tjevereye nawa ngandu ndi tji mwa vaza kondjuwo ya Muhona. Vi sanekeye kotjisanekero momurungu wovapristeri ozohongora nOvalevi noviuru vyomaṱunḓu wOvaisrael mOjerusalem momatuwo wondjuwo ya Muhona.”

30 Ovapristeri nOvalevi otji va toora osilveri nongoldo novitjuma kutja ve vi tware kondjuwo ya Ndjambi wetu mOjerusalem.

Omakotokero kOjerusalem

31 Meyuva oritjamurongo na yevari komueze omutenga otji twa womboroka ponḓonḓu Ahava atu i kOjerusalem. Ndjambi wetu wa ri puna eṱe, neye we tu yama kovanavita na eṱe na kovetuwerereke mba ri mondjira. 32 Tji twa vaza kOjerusalem, twa suva omayuva yetatu. 33 Tjazumba meyuva oritjaine arire tji twa i kondjuwo ya Muhona, atu kasaneka osilveri nongoldo novitjuma natu vi yandja komupristeri Meremot, omuzandu wa Urija. Nu puna ye pa ri Eleasar, omuzandu wa Pinhas, nOvalevi vevari ooJosabad, omuzandu wa Jesua, na Noadja, omuzandu wa Binui. 34 Oviṋa avihe vya varwa, avi sanekwa navi tjangwa nawa membo tjimanga.

35 Imba avehe mba kotokere okuza kouhuura va punguhira Ndjambi wa Israel ozombunguhiro ozoningiririsiwa. Owo va punguhira Ovaisrael avehe ozondwezu zozongombe omurongo na mbari, nozozonḓu omirongo muvyu na hamboumwe, nozondjona omirongo hambombari na hambombari; wina va punguha ozongombo omurongo na mbari ze rire ozombunguhiro zourunde wawo. Ovinamuinyo mbi avihe vya punguhirwa Muhona okurira ozombunguhiro ozoningiririsiwa. 36 Owo wina va toora orutuu, ndu va perwe i ombara, nave keruyandja kozongooneya na kovahongore morukondwa rokongurova kwa Eufrat; nowo wina va yandja ombatero yawo kotjiwaṋa na kondjuwo ya Muhona.