Okutendeza kwekuva
1 Eyuva rimwe okambumba kovaprofete ku ka ri kehi yondjeverero ya Elisa ke mu unaunina nake tja: “Poṋa pu twa tura opaṱiṱi tjinene! 2 Tu esa tu yende kOjordan okukakonda omiti tjiva kutja tu tunge poṋa pu matu tura.”
Elisa wa zira a tja: “Osemba!”
3 Umwe wawo we mu ningira kutja a yende puna wo; eye wa itavera, 4 nowo otji va ya pamwe. Nu tji ve ya kOjordan, otji va uta okuungura. 5 Umwe wawo ngunda ama ke omuti, kamanga ekuva re ra hukuka nari wire momeva. Eye wa ravaera ku Elisa na tja: “Hi tjite vi, muhona? Ekuva ndi ra yazemwa!”
6 Elisa wa pura na tja: “Ra wire pi?”
Omurumendu we mu raisira poṋa pu ra wira; nu Elisa wa konda okati ne ke yumbu momeva na tjiti kutja ekuva ri tendeze. 7 Elisa wa rakiza na tja: “Nana ekuva momeva!” Nomurumendu we ri kambura ne ri nana.
Otjimbumba tjOvasirie tjovita matji haverwa
8 Ombara ya Sirie ya ri novita kuna Israel. Oyo ya pura kovahongore vayo nai toorora oruveze pu mai ziki ozondanda zayo. 9 Nungwari Elisa wa hinda ombuze kombara ya Israel okuironga kutja ai ha i popezu nopoṋa mbo, orondu Ovasirie aave i undjire mbo motutatwa. 10 Ombara ya Israel otji ya ronga ovarumendu, mba tura moṋa mo, nowo ave tjevere. Ihi tja tjitwa povikando ovingi.
11 Ombara ya Sirie ya nyengwa otjiṋa hi tjinene, oyo ya isana ovahongore vayo nai ve pura ai tja: “Owaṋi pu eṋe ngu ri komunda wombara yOvaisrael?”
12 Umwe wawo wa zira a tja: “Kape na umwe, muhona ombara! Nungwari omuprofete Elisa ongu raera ombara ya Israel nandarire imbi mbi u rihungirira metuwo roye omuini.”
13 Ombara ya rakiza nai tja: “Konḓononeye koṋa ke ri, nami me kemukambura.”
Oyo tji ya raerwa kutja Elisa u ri mOdotan, 14 otji ya hinda otjimbumba otjinene koṋa ngo noukambe nomatemba wovita. Owo va kavaza kotjihuro ouṱuku nave tji kovere. 15 Menyunguhuka rependukirwa omukarere wa Elisa wa penduka, a piti mondjuwo na munu otjimbumba tjOvasirie tjovita noukambe nomatemba wawo wovita ava kovere otjihuro. Eye wa yaruka ku Elisa na ravaere a tja: “Owee ku eṱe, muhona! Matu tjiti vi?”
16 Elisa wa zira a tja: “O tira! Tu novandu ovengi komunda wetu pu wo.” 17 Elisa wa kumba na tja: “Muhona paturura omeho womukarere wandje kutja a mune!” Muhona wa zuvira ongumbiro ye, nomukarere wa Elisa wa yera omeho na munu ondundu ndje ura noukambe nomatemba wovita womuriro mbya kovere Elisa.
18 NOvasirie tji va rauka okurwisa Elisa, eye wa kumba na tja: “Muhona, poṱuparisa ovarumendu mba!” Muhona wa zuvira ongumbiro ye ne ve poṱuparisa. 19 Tjazumba Elisa otja ya ku wo na tja: “Eṋe mu ri mondjira yoposyo; otjihuro hi katjo tji mamu paha. Ndji kongorereye, nami me mu twara komurumendu ngu mamu paha.” Neye we ve hongorera kOsamaria.
20 Nowo tji va hita motjihuro, Elisa wa kumba na tja: “Paturura omeho wawo, Muhona, kutja ve mune.” Muhona wa zuvira ongumbiro ye; eye wa paturura omeho wawo, nowo va muna kutja ve ri moukoto wa Samaria.
21 Ombara ya Israel tji ya muna Ovasirie otji ya pura ku Elisa nai tja: “Hi ve zepe, muhona? Hi ve zepe?”
22 Elisa wa zira na tja: “Kako! Nandarire ovarwe wovita imba mbu mwa huura amu zepa ko. Ve peye otjiṋa okurya nokunwa, nu ve eseye kutja ve yaruke kombara ya Sirie.” 23 Ombara ya Israel otji ye ve zepera omukandi omunene; nowo tji va za nokurya nokunwa, otji ye ve hinda ve yaruke kombara ya Sirie. Okuzambo Ovasirie otji va isa okurwisa ehi rOvaisrael.
Omakoverero wa Samaria
24 Kombunda yanao Benhadad, ombara ya Sirie, wa hongorera otjimbumba tje atjihe tjovita okukarwisa Ovaisrael na kakovera otjihuro tja Samaria. 25 Mena romakoverero nga ondjara motjihuro ya rira onḓeu tjinene, nga otjiuru tjokasino tjaa tji randwa kovimariva ovisilveri omirongo hambondatu, nozoseu ozograma omayovi yevari aaze randwa kovimariva ovisilveri vitano.
26 Ombara ya Israel ngunda amai ryanga korumbo rwotjihuro, otji pa ravaera omukazendu na tja: “Ndji vatera, muhona ombara!”
27 Ombara ya zira nai tja: “Muhona tje hi nokukuvatera, ami me ku vatere na tjike? Onovikurya poo onomavinu? 28 U noumba watjike?”
Omukazendu wa zira na tja: “Eyuva rimwe omukazendu ngwi wa hungira kutja tu rye okanatje kandje, tjazumba mependukirwa tu rye inga oke. 29 Otji twa tereka okanatje kandje natu ri. Mependukirwa otji mbe mu raera kutja tu rye inga oke okazandu; nungwari eye we ke horeka!”
30 Ombara tji ya zuva otjiṋa hi, ya nyondorora ozombanda zayo; novandu, mba ri popezu norumbo va muna kutja oyo ya zara ovipiriko kehi yozombanda zayo. 31 Oyo ya ura nai tja: “Ndjambi nge ndji zepe, Elisa tje ha konderwe otjiuru eyuva ngunda ari hiya hita!” 32 Ombara ya hinda omutumwa okukaeta Elisa.
Elisa tjandje wa ri ponganda puna ovanene tjiva mbe ere okumuvarura. Omuhindwa wombara ngunda e hiya vaza, Elisa wa tja nai kovanene: “Omuzepe ngo wa hindi omundu okundjizepa. Nambano eye tje ya mba, pateye omuvero, namu mu yandjere ko kutja a hite. Indji ombara oini i ri popezu kombunda ye.” 33 Elisa ngunda e hiya mana okuhungira omambo nga, ombara ye ya nai tja: “Muhona ongwa eta oumba mbwi kombanda yetu! Me uhara ame undjire tjike orure kutja Muhona a tjite otjiṋa?”
© Herero Revision Bible © Bible Society in Namibia, 2021.
