Elisa ma vatere omukazendu omuhepundu omusyona
1 Omukazendu omuhepundu womurumendu ngwa ri okaṋepo kokambumba kovaprofete wa ya ku Elisa na tja: “Muhona, omurumendu wandje wa koka? Otja tji mo tjiwa eye aa tira Ndjambi. Nambano omurumendu umwe, eye ka yazemene ovimariva, weya okutoora ovanatje vandje ovazandu vevari ve rire ovakarere kutja ve sute ondjo yomurumendu wandje.”
2 Elisa wa pura a tja: “Hi ku tjitire tjike? Ndji raera mbi u na vyo koyoye!”
Nomukazendu wa zira na tja: “Hi notjiṋa oparukaze posi yokakuve okaṱiṱi ku ke nomaze womiṋinga.”
3 Elisa we mu raera na tja: “Twende kovararanganda voye u kayazeme oukuve ouingi mbu ri tjo otja pu mo sora. 4 Tjazumba ove novanatje voye ovazandu kotokeye kondjuwo yoye, nove pata omuvero nu u pakere omaze wokakuve nga okaṱiṱi moukuve mbwi auhe. Okakuve akehe ku ke ura ke twa peke.”
5 Omukazendu ngwi otja hita mondjuwo ye puna ovanatje ve, a pata omuvero, a toora okakuve nga okaṱiṱi na pakere omaze womiṋinga movikuve mbi mbyaa vi etwa i ovanatje ve ku ye. 6 Nowo tji va za nokuurisa oukuve auhe, ina wa pura kutja pena warwe. Omuatje umwe wa zira a tja: “Okakuve nga oku ke ri okasenina.” Nomaze womiṋinga otji ya yanda okuhenga. 7 Nomukazendu ngwi wa yaruka ku Elisa, omuprofete; nu Elisa wa tja nai ku ye: “Randisa omaze nga womiṋinga u sute ozondjo zoye azehe; nu mape hupu ovimariva mbya yenene okuhupisa ove novanatje voye.”
Elisa nomukazendu omutumbe wa Sunem
8 Eyuva rimwe Elisa wa ya kOsunem ku kwa turire omukazendu omutumbe. Omukazendu ngwi we mu ṋanga komariro. Okuzambo aruhe Elisa tjiye ya mo, aa karya pondjuwo yomukazendu ngo. 9 Nomukazendu ngwi wa tja nai komurumendu we: “Tara, tjiri, ami mba muna kutja omurumendu ngu konda mba aruhe, eye omuyapuke wa Ndjambi. 10 Ngatu tunge okatuwo okaṱiṱi komututu, nu tu twe mo ombete notjiriro notjihavero nemunine, neye a sekire mo aruhe tji meya ku eṱe.”
11 Eyuva rimwe Elisa wa kotoka kOsunem na rondo kokatuwo ke okukasuva. 12 Eye wa raera komukarere we Gehasi kutja a kaisane omukazendu ngwi. Nomukazendu tje ya, 13 Elisa otja tja nai ku Gehasi: “Mu pura kutja hi mu tjitire tjike mena raindu eye tje rikendere eṱe tjinene. Ngahino eye ma vanga kutja mbi mu ire kombara poo komuhongore wovita okukemuhungirira nawa.”
Nungwari omukazendu wa zira a tja: “Ami mbi na atjihe tjetje hepa imba motjiwaṋa tjetu oveni.”
14 Elisa wa pura Gehasi na tja: “Omukazendu ngwi hapo hi mu tjitire tjike?”
Gehasi wa zira na tja: “Eye ke nomuatje omuzandu, nomurumendu we wa kurupa.”
15 Elisa wa rakiza na tja: “Mu raera kutja e ye mba!” Nomukazendu weya na kurama momuvero. 16 Elisa wa tja nai komukazendu ngwi: “Mombura ndji mai yende moruveze tjingero ndwi mo pukata okanatje okazandu.”
Nomukazendu wa ura na tja: “Ayee, arikana, muhona, o ndji korere ovizeze. Oove omundu wa Ndjambi!”
17 Nungwari omukazendu ngwi wa rira otjingundi, nu mombura ndja kongorera ndjo, moruveze tjingero ndo, eye otja panduka okazandu otja Elisa pa hungirire.
18 Nokazandu tji ke kura, eyuva rimwe oko otji ka ya kovakonde vovikunwa ku kwa ri ihe. 19 Kamanga oko karavaera ku ihe nake tja: “Me hihamwa otjiuru! Me hihamwa otjiuru!”
Nu ihe wa tja nai komukarere umwe: “Vereka okazandu nga nu twara ku ina!” 20 Nomukarere wa vereka inga okanatje ne ke yarura ku ina; neye we ke pukata nga mutenya omunene; tjazumba otji ka koka. 21 Nu ina we ke twara kokatuwo ka Elisa, e keketwa kombete ya Elisa na pata omuvero, na i. 22 Tjazumba omukazendu ngwi otja isana omurumendu we na tja: “Ndji hindira omukarere umwe nokasino okazenḓu. Ami mbi sokuyenda komuprofete Elisa, nu me kotoka tjimanga.”
23 Nomurumendu we mu pura na tja: “Mo ire tjike ndinondi ku ye? Oro kayuva rEsabata, wina kayuva enene rOmatendameno wOmueze.”
Nungwari omukazendu wa zira a tja: “Osemba!” 24 Okuzambo arire tja kutire okasino na rakiza nai komukarere we: “Tupukisa okasino tjinene otja pu make sora, nu o tupukisa kaṱiṱi nga ami tji me ku raere.” 25 Nomukazendu otja kumuka na kavaza kondundu Karmel ku kwa ri Elisa.
Elisa wa muna ingwi omukazendu ngunda ama yende ne ri ohumburuko, na tja nai komukarere we Gehasi: “Tara, omukazendu wotjihuro Sunem eye ngo weya! 26 Hakahana okuyenda ku ye u katjiwe kutja oviṋa avihe vi ri nawa, nangarire omurumendu nomuzandu we.”
Omukazendu wa raera Gehasi kutja avihe vi ri nawa. 27 Nungwari omukazendu tje ya ku Elisa kondundu, wa wa onḓurumika komurungu we ne rimanga mozombaze ze. Gehasi wa vanga okumuundura, nungwari Elisa wa tja nai: “Mu esa a kare! Ko nokumuna kutja u noruhoze orunene are? Nu Muhona ke ndji raerere otjiṋa.”
28 Omukazendu wa tja ku ye: “Muhona, mbi na pu mbe ku ningirire omuatje omuzandu are? Indu nai hi ku raerere kutja o he ndji wovisa are?”
29 Elisa wa tanauka ku Gehasi na tja: “Hakahana! Toora okati kandje okahoneno nu u kayende! Okurama mondjira okuminika ngamwa auhe ngu mo hakaene na ye; nu tji pena ngu me ku minike, o mu minike ko. Kayende osemba kondjuwo yomukazendu ngo nu u katwe okati kandje okahoneno pomurungu wokanatje.”
30 Nungwari ina yokanatje wa tja nai ku Elisa: “Tjimbe tja Muhona omunamuinyo na ove ami himee ku esa!” Elisa wa sekama na kongorere ingwi omukazendu. 31 Gehasi wa kayenda komurungu na katwa okati ka Elisa pomurungu wokanatje, nungwari kapa ri ombosiro yomunono, nandarire omahekaneno womuinyo. Neye otja yaruka okukatjakanena Elisa na tja ku ye: “Omuzandu ke nokututumukwa.”
32 Elisa tje ya, wa kahita erike metuwo na munu omuzandu pombete a koka. 33 Eye wa yezera omuvero na kumbu ku Muhona. 34 Tjazumba eye we ripetera komuzandu ama twa otjinyo tje kotjinyo kako, nomeho we kouho wako, nomake we kouke wako. Nu eye ngunda ame rinanene ku ko, orutu rwako otji rwa uta okuhara oupyu. 35 Elisa wa sekama na ryanga metuwo, tjazumba otja yaruka ne kerinanena rukwao kokazandu. Omuzandu wa tya ozombato potuhambombari, narire tji ka paturura ouho wako. 36 Elisa wa isana Gehasi ne mu raere kutja a isane ina yokazandu. Nomukazendu tja hita, Elisa wa tja nai ku ye: “Okazandu koye oko nga.” 37 Nomukazendu ngwi wa wa kozombaze za Elisa ne ripete nga omurungu we tji wa ṱunu pehi; neye otja toora okazandu ke na piti.
Ovihimise ovikwao vivari
38 Oruveze rumwe, tji mwa ri ourumbu mehi arihe, Elisa wa kotoka kOgilgal. Eye ngunda ama hongo okambumba kovaprofete, wa raera komukarere we kutja a twe onyungu onene mezuko ne ve terekere ovikurya. 39 Umwe wawo wa ya kovikunino okukapaha ombowa na kamuna eraura na nikora ko omakungu omengi tjinene nga ohuto ye tji ye ura. Eye we ye eta ne ye kondere monyungu, e hi nokutjiwa kutja ovikeṋa. 40 Novikurya vya woterwa ovarumendu ve rye; nungwari owo tji ve vi rora, va ravaera ku Elisa nave tja: “Onḓiro i ri monyungu, mu nouanga! Neṱe katu nakurya ko.” 41 Elisa wa ningira oruhere ne ru tirire monyungu na tja: “Wotera ovandu ovikurya!” Nu otjikando hi kamwa ri otjiṋa otjivi mu vyo.
42 Oruveze rwarwe kwa za omurumendu kObaal-Salisa ngwa etera Elisa ozomboroto ozombomba omirongo vivari nḓa terekwa povirya ovitenga mbya kondwa mombura ndjo, novihweka tjiva ovipe vyovikokotwa. Elisa wa rakiza komukarere we kutja a yandje ovikurya mbi kokambumba kovaprofete. 43 Nungwari omukarere wa zira a tja: “Mo ripura kutja imbi mavi yenene kovarumendu esere rimwe are?”
Elisa wa zira na tja: “Yandja ku wo ve rye, orondu Muhona ma tja nai: ‘Owo mave ri nave hupisa!’ ” 44 Omukarere otje ve ṱunina ovikurya; nowo avehe va rya, nu pa hupa ovikurya otja Muhona punga a hungira.
© Herero Revision Bible © Bible Society in Namibia, 2021.
