Deuteronomium 11 - Herero Revision Bible (HRR)

Ounene wa Muhona

1 “Suvera Muhona, Ndjambi woye, nu aruhe ṱakamisa omazikamisiro nomaraerero nomatwako we. 2 Nambano rizemburukeye na imbi mbi mwe rihonga mu Muhona mokukara puna ye. Oweṋe, nungwari kawo mba ovanatje veṋu, mbu mwa ri nomahongero nga. Eṋe mwa muna ounene wa Muhona, nomasa we, nouvara we, 3 novihimise vye, eṋe mwa muna imbi mbya tjita ku Farao, ombara ya Engipte, na kehi re arihe. 4 Eṋe mwa muna Muhona tja yandeka otjimbumba tja Engipte tjovita puna oukambe nomatemba wawo wovita nga ku ndinondi, indu tje ve ṱomwinisa mOmuronga wOtuu, tjaave me rambere. 5 Eṋe mamu tjiwa Muhona mbya mu tjitira mokuti onguza, nga tji mwa vaza mba. 6 Mamu zemburuka imbi eye mbya tjita ku Datan na Abiram, ovazandu va Eliab, vomuhoko wa Ruben. Ehi ra paturuka nari ve ṋiṋa puna omaṱunḓu wawo, nozombanda novinamuinyo vyawo, mokati ka Israel atjihe. 7 Eṋe mwa muna nomeho weṋu oveni oviungura avihe ovinene mbi Muhona mbya tjita.

Ozondaya nḓe ri mehi ekwizikwa

8 “Kareye nonḓuviro ku inga omatwako aehe ngu me mu rakiza ndinondi kutja mu kare nomasa okukahita mehi ku mamu tjindire, nu ndi mamu kakambura ri rire ouini weṋu; 9 neṋe mu hupe orure mehi ndi ewa Muhona nda kwizikira ooiho mukururume noruyano okuriyandja ku wo na kozondekurona zawo, ehi nde ura nomaihi nouitji wokuti. 10 Orondu ehi ku mamu tjindire okukerikambura ri rire ouini weṋu kari sanene na indi ra Engipte, ku mwa turire. Koṋa ngo tjiyo kunu ozondwi, oo ungura ouzeu okutjatja otjikunino; 11 nungwari ehi indi ndi mu ri pokuhita, oro ehi rozondundu nomikutu, ndi rokwa nawa. 12 Muhona, Ndjambi woye, u ṱakamisa ehi ndi nokuritjevera oure wombura aihe.

13 “Tjiri, kareye nonḓuviro komatwako ngu me mu rakiza ndino, amamu suvere Muhona, Ndjambi weṋu, nokumukarera nomutima auhe nomuinyo auhe. 14 Tji mamu tjiti nao, Muhona ma rokisa ombura mehi reṋu noruveze orusemba, ombura ondemune notjiseseta kutja mu kare novikokotwa nomandjembere, nomaze womiṋinga. 15 Neye ma hapisa omaryo wovinamuinyo vyoye mokuti, neṋe mamu ri namu kuta. 16 Ritjevereye, amu ha pukisiwa kutja amu ha yepe mokukarera oomukuru vovisenginina nokurikotamena ku wo. 17 Nu tji mu hi nokuritjevera, omazenge wa Muhona maye ya kombanda yeṋu. Eye ma pata eyuru kutja ombura ai ha roko nehi ari ha eta ovihape vyaro, nu tjimanga mamu kokere mehi ndi Muhona nde mu pe.

18 “Ṱakamiseye omambo nga momitima vyeṋu na mominyo vyeṋu, nokuyekuta komake weṋu nokuyezara kovipara vyeṋu otja otjihako otjizemburukise. 19 Ye hongeye kovanatje veṋu. Ye tamuneye tji mu ri mozondanda, na tji mu ri mouyenda, na tji mwa rangavara, na tji mwa penduka. 20 Ye tjangeye kozongambezero zozondjuwo zeṋu, na komivero vyotumbo tweṋu. 21 Neṋe nozondekurona zeṋu otji mamu hupu orure mehi Muhona Ndjambi weṋu nde mu kwizikira, eyuru ngunda ari ri ko kombanda yehi.

22 “Kareye nonḓuviro nouṱakame komatwako nga aehe ngu me mu rakiza: Suvereye Muhona, Ndjambi weṋu, mu ryange mozondjira ze, nu mu panḓere pu ye. 23 Muhona otji ma ramba oviwaṋa mbi avihe komurungu weṋu, neṋe mamu kambura ehi roviwaṋa ovinene novinamasa pu eṋe ri rire ouini weṋu. 24 Ngamwa ehi arihe mu mamu yata mari rire oreṋu; okuza kokuti onguza nga kondundu Libanon, nokuza konḓonḓu Eufrat nga kOmuronga Mediterania, ondi mari rire ehi reṋu. 25 Kape na umwe ngu me mu pirukire; nu apehe pu mamu kayenda mehi, Muhona, Ndjambi weṋu, ma tjiti kutja ovandu ve urume nu ve tire eṋe otja eye pe mu rakiza.

26 “Tareye! Ami ndinondi me mu pe okutoorora pokati kondaya nosengiro, 27 ondaya, indu tji mamu zuu komatwako wa Muhona, Ndjambi weṋu, ami ngu me mu rakiza ndinondi; 28 nosengiro, indu tji mu hi nakuzuva komatwako nga; notji mu hi nakusokuyepa mondjira, ami ndji me mu rakiza ndinondi, amamu rikotamene koomukuru vovisenginina mbu mu hi na mwe ve tjivirwe. 29 Nu Muhona, Ndjambi woye, tji me ku hitisa mehi ku mo i okukerikambura ri rire ouini woye, mo sokusera ondundu Garisim ondaya, nosengiro kondundu Ebal. 30 Ozondundu nḓa azeyembari ze ri munda mbwina yonḓonḓu Jordan kuṱa kongurova, mehi rOvakanaan mbe tura morutjandja, ouhunga na Gilgal, pomiti omiyapuke vya More. 31 Tji wa kondo Jordan okukakambura ehi Muhona, Ndjambi weṋu, ndi me mu pe, mamu kerikambura ri rire ouini weṋu, namu tura mu ro. 32 Ṱakamiseye nouṱakame omazikamisiro nomaraerero aehe ngu me mu pe ndinondi.