Saul ma havere Ovaamoni
1 Kombunda yomueze mangara umwe Nahas, Omuamoni, wa hongorera otjimbumba tje tjovita na karwisa otjihuro Jabes mehi ra Gilead. Otjimbumba tje tjovita tja kovera otjihuro hi, novarumendu va Jabes otji va tja nai ku Nahas: “Rikuteye kuna eṱe, neṱe matu mu karere.”
2 Nu Nahas wa zira a tja: “Ami me rikutu kuna eṋe momuhingo mbwi: Me hokora eho rokunene raauhe weṋu, notji me eta ohoṋi mOisrael atjihe.”
3 Novanane va Jabes va tja nai ku ye: “Tu pao oruveze rwomayuva hambombari, tu tume ovahindwa mehi arihe ra Israel; tji pe hi nomundu ngu me tu vatere, otji matu riyandja kove.”
4 Novahindwa ve ya kOgibea Saul ka turire; nu tji va tjivisa indji ombuze kotjiwaṋa, otji tja uta okurira tjinene nomerihahiziro. 5 Nu moruveze ndo tjandje Saul ma zire mokuti nozongombe ze, neye wa pura a tja: “Otjiwaṋa matji ririre tjike nai?” Nowo ve mu raera omambo wovahindwa, mba zire kOjabes. 6 Nu Saul tja zuva otjiṋa hi, Ombepo ya Ndjambi arire tji ya hiti mu ye, neye wa ṱomazenge tjinene. 7 Saul wa kambura ozonduwombe mbari ne ze haṋa movindimbu pekepeke, na hindi ovindimbu mbi puna ovahindwa mehi arihe ra Israel, na tja: “Ngu hi nakukongorera Saul na Samuel kovita, ozonduwombe ze maze katjitwa nao wina.”
Okutira Muhona otji kwa wira motjiwaṋa; notjo tja kumuka otja omundu umwe. 8 Saul we ve woronganisira mObesek; nu mwa ri Ovaisrael omayovi omasere yetatu, nOvajuda omayovi omirongo vitatu. 9 Nowo va tja nai kovahindwa mbe ya ngo: “Karaereye nai kovarumendu va Jabes mOgilead: Muhuka eyuva tji ra zu, mamu munu ombatero.” Novahindwa tji va karaera ombuze ndji kovature va Jabes ovature mba arire tji va nyanda tjinene, 10 nave tja nai ku Nahas: “Muhuka matu riyandja ku eṋe, mu tu tjite otja pu mamu vanga.”
11 Nu mependukirwa Saul wa haṋa ovarumendu ve. Novimbumba vitatu, nomuhuka omunene va taurira mozonganda zOvaamoni, ave ve rwisa nave ve zepa, nga omutenya tji wa tu; nu imba mba hupa, va pizuka, nomundu auhe wa tupuka ku ye omuini.
12 NOvaisrael va tja nai ku Samuel: “Oowaṋi ngwa tja Saul ke nokusokutuhonaparera? Ve yandjeye ku eṱe tu ve zepe!”
13 Nungwari Saul wa zira a tja: “Kape nomundu ngu ma ṱu ndinondi, Muhona tjinga a yama Israel meyuva ndi.” 14 Samuel wa tja nai kotjiwaṋa: “Ngatu yende kOgilgal tu kazike Saul a rire ombara yetu.” 15 Notjiwaṋa atjihe tja ya kOgilgal, natji kazika Saul komurungu wa Muhona okurira ombara. Nowo va punguhira Muhona ozombunguhiro zohange, nu Saul nOvaisrael avehe arire tji va yoroka tjinene.
© Herero Revision Bible © Bible Society in Namibia, 2021.
