Omatjindasaneno wovakupasane
1 Momuhingo tjingewo, omukazendu auhe ngwa kupwa nge riwise kehi yomurumendu we, kokutja tji pena tjiva vawo mbe ha kambura membo ra Ndjambi, omeritjindiro weṋu ye ve kotore kongamburiro. Kamaa rire ohepero eṋe okuhungira embo, 2 owo tjinga amave munu kutja omeritjindiro weṋu owo omakohoke nu ye nondira. 3 Ouwa weṋu auzu mokuzara omizaro ongongo tjimuna okuriṱuna ozondjise nokurihareka noviwerawere nokuzara ozombanda ozombwa ozomanise, 4 nungwari ouwa weṋu ngau rire ouwa watjiri mbu mauzu moukoto womutima; okutja owo mbwi ouwa mbu ha runduruka nu mbuza mombepo ongozu nombore. Oviṋa mbi ovinanḓengu tjinene komurungu wa Ndjambi. 5 Orondu ovakazendu ovayapuke woruveze orukuru mbaa ve undju ku Ndjambi aave rizareke nawa mokuriwisa kehi yovarumendu vawo. 6 Sara wina wa ri otjihorera tji tja sana ngo; eye wa ri nonḓuviro ku Abraham nu ee mu tja muhona. Neṋe tji mamu tjiti imbi mbi ri oviwa nu tji mu hi nokutira omatandero ngamwa aehe, oweṋe ovanatje ve ovakazona.
7 Momuhingo tjingewo, omukuparumendu auhe nga kare puna omukazendu we ama tjiwa nawa kutja omukazendu we omundu otjingundi. Yandja ondengero ku ye, ove tjinga amo pewa i Ndjambi pamwe na ye ihi otjiyandjewa tjomuinyo waaruhe. Tji mwa tjiti nai, ka pena okukara otjiṋa tji matji mu tjaere okukumba.
Okuhihamisirwa ousemba
8 Nu korusenina amuhe kareye nomutima umwe nokuṱirasana ondjenda; suverasaneye otja omundu nomuṱena mongamburiro; karasaneye nomitima omiwa nu auhe e riwise kehi yomukwao. 9 Amu yarura ouvi mouvi, nu amu yarura okuyamburura mokuyamburura. Nungwari moruveze rwanao yandjeye ondaya, ondaya tjinga e ri ndji Ndjambi ndja kwizikira okumupa indu tje mu isana. 10 Nomatjangwa maye tja:
“Omundu tje vanga okukara nomuinyo
nu tje nonḓero yokutja a mune ouwa,
nga tjaere eraka re kokuhungira ouvi,
nomiṋa vye komambo wovizeze.
11 Eye nga ise ouvi nu a tjite ouwa;
eye nga pahe ohange
ne i teze nomutima we auhe.
12 Orondu Muhona u tjevera ovasemba
nu u puratena kozongumbiro zawo;
nungwari u pirukira imba mbe tjita ouvi.”
13 Owaṋi ngu me mu tjiti otjipo indu eṋe tji mu nombango yokutjita ouwa? 14 Nungwari nandarire kutja mamu hihamisirwa ousemba mbu mamu tjiti, tjiri, oweṋe ovaṋingandu! Amu tira ovandu, nu amu rikende. 15 Kareye nondira ku Kristus momitima vyeṋu nu mu mu yozike otja ngu ri Muhona. Aruhe rirongerereye okuzira ngamwa auhe ngu me mu pura okumumangururira omaundjiro ngu mu na wo. 16 Nungwari ye mangurureye nomutima omutarazu nondengero. Kareye nomeritjiviro omawa womomutima kokutja, eṋe tji mamu yambururwa, imba mbu mave zunḓa inga omeritjindiro weṋu omawa otja ovakongorere va Kristus, ve ṱohoṋi ku imbi mbi mave hungire. 17 Orondu okokuwa okuhihamisirwa ouwa mbu mamu tjiti, tje ri ombango ya Ndjambi, komeho yokuhihamisirwa ouvi mbu mamu tjiti. 18 Kristus wina wa ṱira ourunde otjikando tjimwe uriri nu kahepero okuṱa rukwao; ingwi omuhinandjo wa ṱira ovanandjo kokutja e mu tware ku Ndjambi. Eye wa ṱa otja omundu na rire omunamuinyo mOmbepo ya Ndjambi. 19 Nu momasa wOmbepo ndji eye wa kazuvarisira ozombepo, nḓa ri motjovakamburwa Ombuze Ombwa. 20 Ozombepo nḓa za ri ozaimba mbe ha ri nonḓuviro ku Ndjambi, indu eye tja undjire nomuretima momayuva nga Noa tjaa ungura ihi otjitendeze. Ovandu ouṱiṱi mba ri mokayaha, avehe kumwe hambondatu, va yamenwe i omeva. 21 Nomeva nga owo otjiraisiro tjombapitisimo nambano ndji mai mu yama. Nombapitisimo ndji oyo kamakohero wondova yorutu, nungwari oyo omaningiriro nga tjitwa ku Ndjambi, womeritjiviro omawa womomutima. Noyo i mu yama motjimbe tjokutja Jesus Kristus wa penduka movakoke. 22 Eye wa ronda keyuru nu u ri kokunene kwa Ndjambi. Eye u honaparera ovaengeri avehe nomauvara nomasa aehe weyuru.
© Herero Revision Bible © Bible Society in Namibia, 2021.
