Ozombata za Jeremia kuna Pashur, omupristeri
1 Omupristeri Pashur, omuzandu wa Imer, ngwa ri omutjevere omunene wondjuwo ya Muhona, tje ndji zuva ame zuvarisa oviṋa mbi, 2 arire tja rakiza kutja mbi tonwe nu mbi pandekwe nouketanga pOmuvero wa Benjamin wOkombanda, popezu nondjuwo ya Muhona. 3 Mependukirwa Pashur tja za nokundjipandurura mouketanga, ami arire tji mba tja nai ku ye: “Muhona ke nokukuruka ena Pashur; ena nde ku ruku ‘oTjitirise Akuhe.’ ” 4 Muhona omuini wa tja nai: “Ami me kekutjita otjitirise kove omuini na komapanga woye aehe, nove omuini mo ye munu amaye ṱu i omangaruvyo wovanavita na wo. Ami me yandja ovature vehi ra Juda arihe mouvara wombara ya Babilon; oyo mai twara tjiva otja ovahuurwa kehi rayo, nu tjiva mai kazepa. 5 Ami wina me yandjere ovanavita na wo ve punde outumbe auhe wotjihuro hi, nu ve kambure ouini watjo auhe, nangarire ovihuze vyozombara za Juda, nu ve tware oviṋa avihe mbi kObabilon. 6 Ove wina, Pashur, neṱunḓu roye arihe mamu kamburwa namu twarewa kObabilon. Ingo oku mo kakokera noku mo kapakwa puna omapanga woye aehe mbuyo korere ovizeze ovingi nai.”
Jeremia ma unaunine Muhona
7 Muhona, ove we ndji popa,
nami otji mbe riyandja komapopero.
Ove wa ri nomasa pu ami,
no ndji uru.
Avehe aave ndji nyekerere,
nu aave ndji hembe eyuva arihe.
8 Aruhe tjiye hungire,
ee uru nu ee ravaere e tja:
“Outwe! Omaṋiṋikiziro!”
Muhona, ami mbi nyekererwa,
nu mbi hembwa aruhe,
tjinga ambi zuvarisa ombuze yoye.
9 Nungwari ami tji me tja:
“Me zembi Muhona,
nu hi nokuuhara ame hungire mena re”,
ombuze yoye otji mai sana komuriro
mbu mau yaka moukoto wandje.
Ami mbi kondja okuiṱizira mu ami,
nungwari hi sora okuiṱiza.
10 Mbi zuva ovandu amave hokora nai:
“Ondirisiro i ri akuhe!
Ngatu mu horore kovahonapare!”
Nangarire omapanga wandje wopopezu
ye undja omawiro wandje amaye tja:
“Ngahino ma wovisiwa,
tjazumba arire tji twa sora
okumukambura nu tu mu sutise.”
11 Nungwari ove, Muhona,
u ri komunda wandje,
oove omuyame wandje omunamasa,
nu imba mbu mave ndji tjere
okundjizepa kave nokutoṋa.
Owo mave yambururwa nga aruhe,
tjinga ave hi na maave munu outoṋi.
Okuyambururwa kwawo kamaaku zembwa.
12 Nungwari, Muhona Omunamasaaehe,
ove u nongonona ovandu osemba;
Ove u tjiwa imbi mbi ri momitima vyawo
na momeripuriro wawo.
Ndji esa mbi mune tji mo
sutisa ovanavita na ami,
orondu otjiposa tjandje mba
twa momake woye.
13 Imburireye Muhona!
Tangeye Muhona!
Eye u yama omuṋiṋikiziwa
momake wovanauvi.
14 Eyuva ndi mu mba kwatwa,
ngari sengwe!
Eyuva mama me ndji kwata
ari ha serwa ko ondaya!
15 Nga sengwe omurumendu ngwa yorokisa
tate tja eta ombuze ndji ku ye:
“Okazandu! Ove wa munu okanatje okazandu!”
16 Omurumendu ngwi nga sane novihuro
Muhona mbya nyona nokuhinotjari.
Nga zuve ondjuriro yomihihamo omuhuka,
nondokohero yovita mutenya,
17 orondu eye tje he ndji zepere
ngunda ambi hiya kwatwa.
Ezumo ra mama atja rira eyendo randje.
18 Ami mba kwaterwa tjike?
Mba kwaterwa kutja mbi
mune oumba noruhoze,
nokutja mbi yandise omuinyo
wandje mohoṋi are?
© Herero Revision Bible © Bible Society in Namibia, 2021.
