Omaronga nOmakwizikiro kOuhona wOkomanene
1 Owee kekori rouhona rovahongore va Israel mba ṱomavinu! Ouwa waro wa kukuta tjimuna oruzenga rwozongara nḓe ri koviuru vyawo. Oviuru vyawo oviritongamise vya twirisiwa nomuṋuko omuwa, nungwari owo va saravara mbo ava kozewa i omavinu. 2 Muhona u na umwe omunamasa nomunauvara ngwe rirongerera okuverwisa, umwe ngu meya otja ozombawe zombura, notja ombura onamasa, notja omupupo mbu pupa amau rauka nomasa, neye otji meve vanda pehi. 3 Outongatima wovahongore va Israel, imba mba ṱomavinu, mau tombwa nozombaze. 4 Ounene wovahongore mba overitongamise mau zengi tjimuna omakuyu omatenga moruveze mu ye uta okuhora, tji ye porwa naye riwa tjimanga.
5 Eyuva mari ya, Muhona Omunamasaaehe mu ma kara otja ekori rouhona emanise notja oruzenga rwozongara ozomanise kovandu votjiwaṋa tje mba hupa. 6 Eye ma yandja ozondunge zokupangura ku imba mbe pangura, nomasa ku imba mbe yeura omivero vyotjihuro kovetjirwise.
Jesaja ma rongo ovapristeri novaprofete vakaseruseru
7 Nandarire ovapristeri novaprofete ve ṱomavinu, nga tji mave teratera. Owo ve nwa omavinu nomanuwa omazeu, nga tji mave putara mokupuruka. Ovaprofete ve ṱomavinu tjinene, nga tji ve ha tjiwa ovirimunikise Ndjambi mbye hinda, novapristeri wina ve ṱomavinu tjinene, nga tji ve ha sora okupangura oviposa mbi etwa ku wo. 8 Oviriro pu ve haama ovyo avihe vye ura novikungo, nu kape nopoṋa pu pe hi nombonḓi.
9 Owo ve unaunina ami ave tja: “Omurumendu ngo hapo u ripura kutja ma hongo uṋe? Owaṋi ngu hepa ombuze ye? Oyo ombwa kounatje mbwe kura nambano nai uriri! 10 Eye u kondja okutuhonga embo kembo, oruteto koruteto, otjirihongwa kotjirihongwa.”
11 Tji mu hi nokupuratena ku ami, Ndjambi ma hungirisa ovozonganda ozombosiro zomaraka wambangu kutja ve mu honge otjirihongwa. 12 Eye we mu kwizikira amuhe orusuvo nomahuhumiṋino, nungwari eṋe mwa panḓa okupuratena ku ye. 13 Muhona opu ma zu okumuhonga embo kembo, oruteto koruteto notjirihongwa kotjirihongwa. Komuhingo mbwi otji mamu putara momukambo ngamwa auhe mbu mamu kayenda. Mamu harisiwa ovirwaro, amu yatwa namu huurwa.
Ewe rotjikoro ra Sion
14 Nambano oweṋe vandu ovirangaranga, mbu mu honaparera otjiwaṋa hi muno mOjerusalem, purateneye ku imbi Muhona mbi ma hungire. 15 Eṋe mu rihiva aayo mwe rikuta kuna onḓiro, nu aayo mwa zuvasana notjovakoke. Eṋe mu ripura kutja omanyoneno tji ye ya, kaye nokuṱuna ku eṋe, orondu mwe riyameka kovizeze novineya kutja vi mu yame. 16 Nambano Muhona Ndjambi ma tja nai: “Tara, ami me twa po omazikameno mOsion, omazikameno omazeu nomanamasa. Mu wo ami me ziki mo ewe ehuze rotjikoro ku kwa tjangwa omambo nga: ‘Ngu nongamburiro ke nokuivaiva.’ 17 Ousemba ombu mau rire ongoze osaneke komazikameno nga, nouṱakame mau rire ongoze yokutunga.”
Ombura onḓeu yozombawe zombura mai kombozora ovizeze avihe ku mwe riyameka, nomipupo mavi pupu omaundiro weṋu. 18 Omerikutirokumwe ngu mwa tjita nonḓiro maye isiwa po, nomazuvasaneno weṋu notjovakoke maye teyewa. Onyoneno tji ya tukuruka, eṋe mamu nyanyaurwa. 19 Oyo mai mu tono aruhe, ngamwa imbwi omuhuka auhe. Eṋe mamu i tjindi omutenya nouṱuku. Ombuze aihe ombe, ndji mai zu ku Ndjambi, mai eta omburuma ombe! 20 Mamu sana nomundu momuano worive, ngu vanga okurara kotjiraro otjisupi tjinene me hi nokusora okutandavera, na motjikutjire otjimango okurikutjira na tjo. 21 Muhona ma sekama otja tja tjitire pondundu Perasim, nu ma pindike otja tja tjitire morutjandja rwa Gibeon, kokutja a tjite imbi mbye ripura okutjita, okutja ozondjito ze ozohimise. Eye ma yenenisa oviungura vye, oviungura vye ovihimise.
22 Amu nyekerere omaronga ngu me mu pe! Tji mwa tjiti nao, omberero yeṋu mai rire onḓeu tjinene ku eṋe. Ami mba zuva kutja Muhona Ndjambi Omunamasaaehe we rimanene okuyandeka ehi arihe.
Ounongo wa Ndjambi
23 Purateneye ku imbi mbi me hungire; yandjeye ombango ku imbi mbi me mu raere! 24 Kape nomukune ngu taura omahi we womakunino omayuva aehe okuyemanena okukuna. 25 Eye tja zu nokuṱuna omahi nga ma kunu ozondwi zoviyao ovitjatise; eye ma kunu ovirya novikokotwa, nu tjazumba kovikoro vyovikunino vye a kunu ko ozondwi zarwe. 26 Eye ma tjiwa okuungura oviungura vye, orondu Ndjambi we mu honga. 27 Eye ke nokuhepa okutoora ongwinya onḓeu okutona na yo inḓa ozondwi zoviyao ovitjatise; moruveze rwanao ma ungura nokati okapupu ku ka yenena. 28 Eye ke nokunyona ovikokotwa mokuvitonda nokuhinondjandero; neye tji ma hingire mo etemba rousino movikokotwa mbi, me vi tondo nokuhinokuvinyanyaura.
29 Ounongo mbwi auhe u za ku Muhona Omunamasaaehe. Ozondunge za Ndjambi ozohimise, nozo aruhe ze nondoṋeno!
© Herero Revision Bible © Bible Society in Namibia, 2021.
