Jeremia 18 - Herero Revision Bible (HRR)

Jeremia pondjuwo yomuungure wozonyungu

1 Muhona wa tja nai ku ami: 2 “Twende kondjuwo yomuungure wozonyungu ku me kekupera ombuze yandje.” 3 Ami otji mba ya koṋa ngo ne kamuna ko omuungure wozonyungu ama ungurire potjiunguriro tje tjozonyungu. 4 Aruhe onyungu tji i ha pwire otja kounongo we, otje toora omunoko mbwi na ungura po onyungu yarwe.

5 Muhona wa tja nai ku ami: 6 “Ami hi nousemba are okutjita ku eṋe, tjiwaṋa tja Israel, otja omuungure wozonyungu tje tjita nomunoko? Eṋe mu ri momake wandje tjimuna omunoko tji u ri momake womuungure wozonyungu. 7 Nu moruveze ngamwa aruhe ami tji mba tja me zukura poo me teya poo me nyono omuhoko poo ouhona ngamwa auhe, 8 nungwari tjazumba omuhoko mbo au ritanaura komauvi wawo, ami hi nokutjita imbi mbi mba tja me tjiti ku wo. 9 Potjikando tjarwe tji mba tja me tungu omuhoko poo ouhona ngamwa auhe, 10 nungwari tjazumba omuhoko mbo au kara nokuhinonḓuviro ku ami, nau tjiti ouvi, ami hi nokutjita imbi mbi mba tja me tjiti ku wo. 11 Nambano raera otjiwaṋa tja Juda novature va Jerusalem kutja meve pahere ondunge yokuvetwa moumba, nu me rirongerere okuvevera. Ve raera kutja ve ise okutjita ouvi, nokutja ve rundurure ozondjira zawo ozombi nozondjito zawo. 12 Owo mave ziri ave tja: ‘Kako, avihe omungandjo! Matu tjiti otja pu matu vanga; matu rangaranga natu tjiti ouvi.’ ”

Otjiwaṋa matji imbirahi Muhona

13 Muhona ma tja nai:

“Kakonḓononeye koviwaṋa avihe kutja

otjiṋa otja ihi tji na pu tja tjitirwe rukuru.

Otjiwaṋa tja Israel tja tjita otjiṋa otjiyaukise!

14 Ohungu yoruuwa ya Libanon

i kara nokuhinovitutukende are?

Omipupo omitarazu, mbi za mozondundu zayo,

vi pwira are?

15 Nungwari otjiwaṋa tjandje tje ndji zemba;

otjo tji twimisira oomukuru vyovisenginina

ovyomoro omuwa.

Otjo otji tja putara mozondjira zatjo azehe,

katji uhara ama tji kongorere ozondjira ozonguru;

otjo tji ka wondja mokaira ku ke hiya ungurwa.

16 Otjiwaṋa hi tja tjita ehi ndi ri rire otjiṋa otjiyaukise

kutja ri nyengwe nga aruhe.

Avehe mbu mave kapita mave

kumisiwa i imbi mbi mave munu;

owo mave taka oviuru ava temwa.

17 Ami me rimbi otjiwaṋa tjandje komurungu

wovanavita na tjo tjimuna oruuma ndu hingwa

i ombepo yokomuhuka.

Ami me tji pe etambo;

hi nokutjivatera,

otjiwonga tji tje ya.”

Okusekamena Jeremia

18 Otjiwaṋa tja tja nai: “Ngatu rikute kumwe tu sekamene Jeremia! Aruhe mape kara ovapristeri okutuhonga, novarumendu ozonongo okuturonga, novaprofete okuzuvarisa ombuze ya Ndjambi. Ngatu mu pere po ondjo momahungi we omuini, nu atu puratene ko ku imbi mbi ma hungire.”

19 Otji mba kumba e tja:

“Muhona, zuva imbi mbi me hungire

nu puratena ku imbi ovanavita

na ami mbi mave hungirire ami.

20 Ouvi ombu ri otjisuta tjouwa are?

Nungwari owo ve ndji sera oruhoro

kutja mbi wire mo.

Zemburuka indu tji mbe ya kove,

ne ve vongere po kove

kutja o he ve tjiti otjiṋa momazenge woye.

21 Nungwari nambano, Muhona,

ovanatje vawo ngave ṱondjara,

nu ngave ṱe movita.

Ovakazendu ngave zepaise

ovarumendu novanatje vawo;

ovarumendu ngave ṱe i omutjise omuzeu,

nu imba omitanda ngave ṱe motjirwa.

22 Hinda otjira tjovapunde

tji kapunde ozondjuwo zawo ohei;

tjita kutja ve ravaere nomburuma

mozondjuwo zawo.

Orondu owo ve ndji sera oruhoro

kutja mbi wire mo,

nu ve ndji twira po ongwehe okundjipata.

23 Nungwari, Muhona,

ove mo tjiwa omerikutirokumwe,

wawo wokundjizepa.

O ve isire ko ourunde nouvi wawo.

Ve vanda pehi u ve toṋe,

nu tjita ku wo ngamwa atjihe momazenge woye.”