Jakob ma sere ooEfraim na Manasse ondaya
1 Kombunda yovitjitwa avihe mbi Josef wa raerwa nai: “Tara, iho wa vera.” Neye otja twaerera ovazandu ve aveyevari ooManasse na Efraim. 2 Nu Jakob wa raerwa nai: “Omuzandu woye Josef weya okukutara.” Israel arire tje penduka na haama mombete ye, 3 na tja ku Josef: “Ndjambi Omunamasaaehe we rimunikisa ku ami mOlus mehi ra Kanaan, ne ndji sere ondaya. 4 Neye wa tja ku ami: ‘Tara, me ku pe orukwato orungi ne ru takavarisa ne ru tjiti omihoko omingi. Nehi ndi me ri yandja kozondekurona zoye ri rire ouini wazo nga aruhe.’
5 “Imba ovazandu voye aveyevari mbu wa kwatera mOengipte, ngunda ambi hiye ya kove mba, owo ovandje; ooEfraim na Manasse mave rire ovandje wina tjimuna ooRuben na Simeon. 6 Nungwari ovanatje mbu mo kwata kombunda yawo mave rire ovoye, nu mave rumata eṱa puna omarumbi wawo. 7 Ami tji mba kotoka okuza kOmesopotamie Rahel otja kokera mondjira mehi ra Kanaan, ngunda atu ri ohumburuko na Efrat, tji tji ri Betlehem.”
8 Israel tja muna ovazandu va Josef wa pura nai: “Ovazandu mba ovauṋe?”
9 Josef wa zira nai ku ihe: “Owo ovazandu vandje Ndjambi mbe ndji pa muno mOengipte.”
Israel arire tja tja: “Arikana, ve eta ku ami, mbi ve sere ondaya.” 10 Nungwari omeho wa Israel ya ngundipara tjinga a kurupa; nu kaa sora okumuna. Josef wa tumbuza imba ovazandu ku ihe, neye we ve pukata ne ve hupite. 11 Nu Israel wa tja nai ku Josef: “Ami hi na pu mbe ripura kutja mee kamuna omurungu woye rukwao. Nambano, tara, Ndjambi we ndji munisa ovanatje voye wina.” 12 Josef arire tje ve isa po pomatumbo wa Israel, na u kozongoro momurungu wa ihe.
13 Nu Josef we ve kambura pomake, Efraim kokunene kwe kutja a kare kokumuho kwa Israel, na Manasse kokumuho kwe kutja a kare kokunene kwa Israel, ne ve yeta ku ihe. 14 Nungwari Israel wa pingasanisa omaoko we, na twa eke re enene kotjiuru tja Efraim ngwa ri omuangu, neke re rokumuho kotjiuru tja Manasse ngwa ri erumbi. 15 Neye wa sera Josef ondaya na tja:
“Ndjambi, momurungu we mu mwa ryangere ootate Abraham na Isak,
Ndjambi ngwa ri omurise wandje oure womuinyo wandje nga ku ndinondi,
16 omuengeri ngwe ndji isa mo mouzeu auhe nga sere ondaya kovazandu mba.
Ena randje nomana wootate Abraham na Isak ngaye tamunwe mu wo.
Ngave kare novanatje ovengi nu ve takavare kombanda yehi.”
17 Josef wa nyengwa tja muna kutja ihe wa twako eke re enene ku Efraim; narire tja kambura eke ra ihe okuisa ko kotjiuru tja Efraim okutwa ro kotjiuru tja Manasse, 18 na tja ku ihe: “Kanao, tate. Orondu eye everi; eke roye enene twa kotjiuru tje.”
19 Nungwari ihe wa panḓa a tja: “Ami me tjiwa, muatje wandje, ami me tjiwa. Ozondekurona za Manasse wina maze rire otjiwaṋa otjinene. Nungwari omuangu we ma rire omunene pu ye, nozondekurona ze maze rire oviwaṋa ovingi.”
20 Neye otje ve sera ondaya eyuva ndo a tja: “Mena reṋu Ovaisrael otji mave serasana ondaya nomambo nga: ‘Ndjambi nge mu tjite otja ooEfraim na Manasse!’ ” Komuhingo mbwi Jakob otja ingoneka Efraim okukapita Manasse.
21 Nu Israel arire tja tja ku Josef: “Tara, ami mbi ri pokukoka, nungwari Ndjambi ma kara puna eṋe, neye me mu yarura kehi rooiho mukururume. 22 Nami me ku pe orukondwa rwehi ndu ri komeho yaitwi twomarumbi woye. Ehi ndi etoororwa mba huura kOvaamori nengaruvyo nouta wandje.”
© Herero Revision Bible © Bible Society in Namibia, 2021.
