1 Muhona wa hungira a tja: “Owee ku imba mbe honaparera Juda, tjinga ave ndji pirukira. Owo ve kongorera ondunge, ndji ha zu ku ami, nu ve tjita omazuvasaneno nge he ri owombango yandje, notji ve wezira ko ourunde kourunde. 2 Owo ve yenda kOengipte okukakwa ombatero nokuhinokuningira ondunge ku ami. Ve vanga kutja Farao e ve yame, notji ve paha omaundiro kombara ya Engipte. 3 Nungwari ombara kai nokusora okuvevatera, nondjamo ya Engipte mai rire ohoṋi ku wo. 4 Nangarire kutja ovahindwa, mbe kuramenapo ehi rawo, ve ya rukuru mOsoan na Hanes, imbi ovihuro vya Engipte, 5 imba Ovajuda mave hihamwa omitima, kokutja owo ve riyameka kotjiwaṋa otjihaṱakama, otjiwaṋa tji tji hi nokuvevatera, posi yokuveṱisa ohoṋi nokuvenyekerera porwako.”
6 Ombuze ya Ndjambi ndja hungirira ovipuka vyokuti onguza kwomukuma wokeyuva kokumuho oyo ndji: “Ovahindwa mbe kuramenapo ehi rawo mave tuurunga mehi rombamisiro norooma mu mu kara ozongeyama, nozonyoka ozonauzuwo na inḓa nḓe tuka. Owo mave kutire outumbe novihuze vyawo kousino na kozongamero zawo okuvitwara kotjiwaṋa tji tji hi nokuvevatera. 7 Ombatero, ndji mai zu kOvaengipte oyo omungandjo. Ami opu mba zu okuruka Engipte ena ndi ‘Rahab ngu hirimana.’ ”
Otjiwaṋa otjihinonḓuviro
8 Ndjambi we ndji raera kutja mbi tjange membo imbwi omuhingo otjiwaṋa mbu tji ri, kokutja pe kare omatjangwa omakarerere wokutja ourunde wawo u ṱa pi. 9 Owo aruhe ve pirukira Ndjambi, ve kora ovizeze nu ve panḓa okupuratena kOmatwako wa Muhona. 10 Owo ve tja nai kovamune: “Amu munu ovirimunikise,” nu kovaprofete ve tja nai: “Mwineye, amu hungire ouatjiri ku eṱe. Tu raereye imbi mbi matu vanga okuzuva. Tu eseye tu kare nouripura wetu ouwovise. 11 Zamoeye mondjira yetu, nu amu pata omurari wetu! Katu nokuvanga okuzuva Omuyapuke wa Israel.”
12 Nungwari Omuyapuke wa Israel otji ma tja nai: “Eṋe mu nyengwa omambo ngu mbi mu raera, nu mu riyameka kokutjita outwe na kokuwovisa. 13 Eṋe mwa tura ondjo. Mwa sana norumbo orutonga ndu nomuṱa mbwa pamburuka nga kehi; kamanga mamu wire pehi. 14 Mamu sana nonyungu yomunoko ndja nyanyauka tjinene nai, nga tji pe hi nokukara okarutau omundu ku ma yenene okutoora na ko ekara epyu poo okuwota na ko omeva motjitoto.”
15 Muhona Ndjambi Omuyapuke wa Israel, ma tja nai kotjiwaṋa: “Mokuritanaura na mokusuva mu ami mamu yamwa, omasa weṋu maye zu mokuporimana na mokuriyameka.” Nungwari eṋe mwa panḓa okutjita nai. 16 Moruveze rwanao eṋe mwe ripura okutaura kovanavita na eṋe mokukavira oukambe wotjikara. Neṋe mu ri osemba; taureye! Mamu ripura kutja oukambe weṋu u notjikara tji tja yenene, nungwari imba mbu mave mu tezere, ve notjikara komeho! 17 Ovandu veṋu eyovi mave tupuka tji mave munu omurwe umwe wovanavita na eṋe, nu ovarwe vetano wovita porwe mave yenene okumutupukisa amuhe. Nu imba mbu mave hupu, mave sana nongunḓe yerapi rotjihako kondomba yondundu, notjiti tjerapi rotjihako kondunda! 18 Nu vari Muhona ma undju okumuṱira otjari. Eye me rirongerere okumuṱira ondjenda, orondu Muhona eye onguri Ndjambi ngu tjita ousemba. Ovaṋingandu imba mbe riyameka ku ye.
Muhona ma sere otjiwaṋa tje ondaya
19 Ove, tjiwaṋa tja Sion, tji tja tura mOjerusalem, ko nokuuhara amo riri rukwao. Muhona eye u notjari, nu tji mo ku ombatero ku ye, neye tja zuu, ma ziri. 20 Muhona me ku munisa otuveze twomauzeu, nungwari eye omuini ma kara mbo okukuhonga, nove ko nokuuhara amo mu paha rukwao. 21 Tji wa yepe mondjira kokunene poo kokumuho, mo zuu eraka re kombunda yoye ndi mari tja nai: “Ondjira oyo ndji! Kayende mu yo!” 22 Ove mo toora oviserekarera vyoomukuru voye vovisenginina ku kwa tuwa osilveri, na imbi ku kwa tuwa ongoldo, nu mo vi nakaura otja ondova amo ravaere nai: “Zamoeye momurungu wandje!” 23 Nu aruhe tji mo kunu ozondwi zoye, Muhona ma rokisa ombura, ndji mai hapisa ozondwi nḓa, neye me ku pe omakondero omengi wovihape ngu maye ku parura, novinamuinyo vyoye mavi kara nomaryo omengi. 24 Ozonduwombe nousino mbu taura ehi roye romakunino mavi ri ovikurya imbi oviwa novimanise. 25 Meyuva oviṱunga vyovanavita na eṋe mu mavi huurwa, novandu vawo mu mave ṱu, oturonḓu twomeva matu pupu okuza kondundu na kondunda aihe onde. 26 Omueze mau yere tjimuna eyuva, nu indi eyuva mari yere potuhambombari komeho waindu tji ri yera aruhe tjimuna ondjerera yomayuva hambombari ndji mai yere meyuva rimwe. Avihe mbi mavi tjitwa, indu Muhona tji ma kutu ovirwaro na tji ma verukisa omazeze eye omuini nga tjita kotjiwaṋa tje nomatoneno we.
Ndjambi ma vere Asirie
27 Ouvara nounene wa Muhona mavi sora okumunikira kokure. Omazenge we maye ruruma otja omuriro. Eye u hungira nomazenge, nomambo we ye yaka otja omuriro omusesete. 28 Eye u hinda ombepo komurungu we tjimuna omupupo mbu tanana nau twara oviṋa avihe. Owo u pupisira oviwaṋa konyoneno, nu u yandisa omeripuriro wawo omanaurunde. 29 Nungwari eṋe, tjiwaṋa tja Ndjambi, mamu yoroka nokuimbura otja tji mu tjita mouṱuku womukandi omuyapuke. Eṋe mamu yoroka tjimuna imba mbe kawondjera kombosiro yozohiva tji mave i kondjuwo ya Muhona, ku ingwi ngu ri Oruuwa rwa Israel.
30 Muhona ma tjiti kutja auhe a zuve eraka re enene, nokutja a mune omasa womazenge we. Mape kara otururumo otusesete notjivepo nozombawe zombura nombura onamasa. 31 Ovaasirie mave hara omburuma tji mave zuu eraka ra Muhona na tji mave munu omasa womberero ye. 32 Otjikando atjihe Muhona tji meve vere, otjiwaṋa tje tji kara pokunyanda ozonḓukwa noviharpe. Ndjambi omuini ongu ma rwisa Ovaasirie. 33 Rukuru pa ṱuninwe Tofet, okutja ezuko romuriro omunene pu maape kanyosirwa ombara ya Asirie notjimbumba tjayo tjovita. Oro ekoto neparanga, nu kwa tendekwa ozonguṋe. Nu Muhona ma suvanene mo otururumo otuingi kutja tu yakise ozonguṋe nḓa.
© Herero Revision Bible © Bible Society in Namibia, 2021.
