Omaraerero wa David wokutunga ondjuwo ya Muhona
1 Ombara David wa rakiza kovahongore avehe vOvaisrael kutja ve woronganene mOjerusalem. Ovahongore vomihoko na imba mbaa ve ungura oviungura vyouhona, novanane wozonganda, novatjevere vouini novovinamuinyo vyombara novyovazandu vayo, novahongore avehe vondjuwo youhona, novarwe imba ozombanḓe, novandu ovananḓengu otji va woronganena mOjerusalem.
2 Ombara David wa kurama komurungu wawo na hungire ku wo a tja: “Vandu vandje, purateneye ku ami! Ami mba vanga okutunga ondjuwo ongarerere yOtjipwikiro tjOmerikutiropamwe wa Muhona, tji tji ri otjihavero tjozombaze za Muhona, Ndjambi wetu. Ami mbe rirongerera okutunga ondjuwo okuyozika Ndjambi. 3 Nungwari eye we ndji tjaera okutunga, ami tjinga ambi ri omurwe wovita namba tirahi ombinḓu onyingi tjinene. 4 Muhona, Ndjambi wa Israel, wa toorora ami nozondekurona zandje okuhonaparera Israel nga aruhe. Eye wa toorora omuhoko wa Juda okurira ovanane, nu mOjuda wa toorora eṱunḓu ra tate. Nu meṱunḓu ndo arihe eye wa ri nonyuṋe mu ami, nu we ndji tjita okurira ombara ya Israel arihe. 5 Eye we ndji pa ovazandu ovengi, nu mu wo avehe wa toorora mo Salomo, a haame kotjihavero tjouhona wa Muhona okuhonaparera Israel.
6 “Muhona wa tja nai ku ami: ‘Omuzandu woye Salomo ongu me ndji tungire ondjuwo yandje. Ami mbe mu toorora okurira omuatje wandje, nami me rire Ihe. 7 Ami me tjiti ouhona we u karerere nga aruhe, eye tji ma kara nonḓuviro komatwako nomazikamisiro wandje aehe otja tje tjita nai.’
8 “Nambano, tjiwaṋa tjandje, komurungu wa Ndjambi na indji ombongarero aihe yOvaisrael, ihi otjiwaṋa tja Muhona, ami me mu raere kutja mu kare nonḓuviro koviṋa avihe, Muhona, Ndjambi wetu, mbye tu rakiza kutja mu karerere mehi ndi ewa, nu mu rumatise ro kozondekurona zeṋu nga aruhe.
9 “Nove, muatje wandje Salomo, ami me ku rakiza kutja u tjiwe, tjiri, Ndjambi wooiho, nu u mu karere nomutima nombango aihe. Eye ma tjiwa omeripuriro wetu nozonḓero zetu azehe. Tji mo mu paha, eye me rimunikisa kove; nungwari ove tji mo humburuka ku ye, eye me ku esa nga aruhe. 10 Zemburuka kutja Muhona we ku toorora okumutungira ondjuwo ye yomerikotameneno. Nambano yanḓipara, nu i tunga nombango aihe.”
11 David wa yandja ku Salomo omasanekero aehe wetuwo romahitiro, nowetuwo enene, nowomatuwo womapwikiro, nowomatuwo wokombanda nowomoukoto, nowOtjouyapukeyapuke mu mu isirwa omauvi. 12 Eye wina we mu pa omasanekero woviṋa avihe mbye ripura na vyo, okutja omasanekero wotupanda nowomatuwo nge tu kondoroka, nowomatuwo womapwikiro wovihuze vyondjuwo ya Muhona, nowoviyandjewa mbya yapurirwa Muhona. 13 David wina we mu pa ondunge yokuworonganisa ovapristeri nOvalevi kutja ve ungure oviungura vyawo, na imbi vyondjuwo ya Muhona, nokutja ve tjevere oviungurise avihe vyondjuwo ndji. 14 Eye wa raera kutja osilveri nongoldo, ndji mai hepwa okuungura oviungurise avihe mbi, mai sokuṱeka pi, 15 okutja omamunine novikurameno vyawo, 16 noviriro ovisilveri, notjiriro atjihe peke otjingoldo, kuya ku tuwa ozomboroto zomaraisiro. 17 David wa raera kutja ongoldo ongohoke yokuungura na yo ovitwere noviyaha novikuve mai sokuṱeka pi, nokutja osilveri nongoldo yokuungura na yo ovinwino mai sokuṱeka pi, 18 na wina indji ongoldo ongohoke yokuungura otjipunguhiro ku maku twimisirwa ovyomoro omuwa, nokatemba kovakerubi imba vevari vongoldo, mba nyatururira ovivava vyawo kombanda yOtjipwikiro tjOmerikutiropamwe wa Muhona. 19 Ombara David wa tja nai: “Avihe mbi vi ri momasanekero, nga tjangwa otja komaraerero Muhona omuini nge ndji pa kutja mbi ye tjite.”
20 Ombara David wa tja komuzandu we Salomo: “Nambano yanḓipara nu u ungure nombango aihe! O tira, nu o mumapara! Uta oviungura, nu ape ningi omundu ngu me ku tjaere. Muhona, Ndjambi, ngu mbi karera, ma kara puna ove. Eye ke nakukuesa, nungwari ma kara puna ove, nga tji wa mana oviungura avihe vyondjuwo ye. 21 Ovapristeri nOvalevi va pewa oviungura mondjuwo ya Ndjambi. Ovaungure mbe nounongo ngamwa auhe, ve nombango okukuvatera, notjiwaṋa atjihe novanane vatjo avehe mave tyewa i ove.”
© Herero Revision Bible © Bible Society in Namibia, 2021.
