Omasanekero wozonguvi mbari nomuvite
1 Muhona wa hungira ku ami a tja: 2 “Muatje womundu, hakisa Ovaisrael otjihakwa nu u keveserekarere omasanekero 3 wokuvetjivisa imbi ami, ngu mbi ri Muhona Ndjambi, mbi me hungire ku wo: Pa ri onguvi onene ndja ri nomainya omawa omamanise novivava ovinene tjinene mbya nyaturukire ouparanga. Oyo ya tukire ai i kondundu Libanon nai kateya okarutavi kondomba yorupapa; 4 oyo ya twara okarutavi nga kehi rovarandise nai keketwa motjihuro tjomarandero. 5 Tjazumba otji ya toora omukono mbwa nyomoka nai keukuna mehi romakunino mu mwa ri omeva omengi okuutjatja aruhe. 6 Omukono mbwi wa hapa au rire omuvite womandjembere omusupi mbwa tandavara. Omikono vyawo vya hapere kombanda kuṱa konguvi, nomize vyawo vya hitire mehi. Omuvite mbwi wa potere notutavi nomaso.
7 “Pa ri onguvi ongwao yarwe onene ndja ri novivava ovinene tjinene nomainya omatindi. Nomuvite mbwi wa tanaurira omize vyawo nomikono vyawo kombanda ku yo amau undju kutja onguvi ndji i u hire omeva omengi pu inga nga ri motjikunino hi mu wa hapere. 8 Nungwari omuvite mbwi wa vazerwe awa kunwa mehi romakunino nda tjatjwa nawa, kokutja owo u sore okuhapisa omaso nokutwa ko omapunda womandjembere, nokutja u rire omuvite omunene tjinene.
9 “Nambano ami, ngu mbi ri Muhona Ndjambi, otji me pura nai: ‘Omuvite mbwi mau kara ko nau hapa are? Onguvi ndji ondenga kai nokuzukura omize vyawo ai pora omandjembere nai teya otutavi nai tjiti kutja tu kukute are? Kape nokuhepwa omasa omanene notjiwaṋa otjinamasa okuzukura omize vyawo. 10 Ii, omuvite mbwi wa kunwa, nungwari hapo nai mau kara ko nau hapa are? Kau nokukukuta ombepo yokomuhuka tji mai hingi okuriveta mu wo are? Mau kukutire mbo pu wa hapa.’ ”
Omasanekero maye mangururwa
11 Muhona wa tja nai ku ami: 12 “Pura ovapirukire mba kutja mave tjiwa omaheero womasanekero nga? Ve raera kutja ombara ya Babilon ye ya kOjerusalem nu ya twara ombara ya Jerusalem novahongore vayo kehi ra Babilon. 13 Oyo ya toorora omurumendu umwe weṱunḓu rombara ai tjiti omazuvasaneno puna ye nai mu yanisa kutja a tje ma rire omuṱakame. Nungwari ya twara ovarumendu ovatjiukwa vehi 14 kokutja i tjaere otjiwaṋa okurira otjinene rukwao, nokutja omazuvasaneno nga ye yenenisiwe tjiri. 15 Nungwari ombara ya Juda ya pirukira ombara ya Babilon nai hindi ovakuramenepo vayo kOengipte okukaeta oukambe notjimbumba otjinene tjovita. Oyo hapo nai mai toṋa are? Ingwi ngwa tjita nai, maa yenene okupenga omberero are? Ingwi ngwa teya omazuvasaneno ma isiwa nokuhavererwe are?”
16 Muhona Ndjambi ma tja nai: “Tjiri, otja ngu mbi ri Ndjambi omunamuinyo, ombara ndji mai ṱire mehi ra Babilon, orondu oyo ya teya oruyano rwayo nomazuvasaneno ngu ya tjitire nombara ya Babilon ndje i pa otjihavero tjouhona. 17 Nandarire otjimbumba otjinamasa tjovita tjombara ya Engipte katji nokuyenena okuivatera motjirwa, Ovababilon tji mave tungu ozondunduvahi nokusa oturora kokutja ve zepe ovandu ovengi. 18 Oyo ya teya oruyano rwayo nomazuvasaneno ngu ya tjitire. Ya tjita oviṋa avihe mbi, nambano kai nakupenga omberero.”
19 Muhona Ndjambi ma tja nai: “Tjiri, otja ngu mbi ri Ndjambi omunamuinyo me i vere mena rokutja ya teya omazuvasaneno ngu ya yana mena randje kutja mai yenenisa wo. 20 Ami me pata ongwehe ne kambura na yo ombara ndji. Me i twara kehi ra Babilon ne keiverera ngo, tjinga ai ha ṱakamene mu ami. 21 Ovarwe vayo ozombanḓe mave ṱu motjirwa, nu imba mbu mave hupu po mave rimbwa kominda avihe. Notji mave tjiwa kutja ami, ngu mbi ri Muhona, mba hungire.”
Omakwizikiro womaundjiro
22 Muhona Ndjambi ma tja nai:
“Ami omuini me kambura ondomba
yorupapa orure e teya ko omukono
omutarazu nu e u kunu kondundu onde,
23 kondundu onde tjinene ya Israel.
Owo mau hapa otutavi nau eta ovihape
nau rire orupapa oruwa orumanise.
Ozonḓera zomihoko pekepeke maze yekutura
mu rwo naze suva momuzire warwo.
24 Omiti avihe mokuti mavi tjiwa kutja
owami ngu mbi ri Muhona.
Ami me kere omiti omire pehi
nu e kurisa imbi omisupi.
Me kukutisa omiti otuhapo ne
nyomona imbi mbya kukuta.
Ami ngu mbi ri Muhona, mba hungire. Me tjiti imbi mbi mba tja me tjiti.”
© Herero Revision Bible © Bible Society in Namibia, 2021.
