Omayaruriro wOtjipwikiro tjOmerikutiropamwe
1 Otjipwikiro tjOmerikutiropamwe wa Muhona tja kara mehi rOvafilisti oure womieze hambombari. 2 NOvafilisti va isana ovapristeri nozombetere nave pura nai: “Ngatu tjite vi nOtjipwikiro tjOmerikutiropamwe wa Muhona? Tu tjiviseye kutja tji twa hindi koṋa ku tji kara, matu tji hindi na tjike?”
3 Nowo va zira nai: “Tji mamu yarura Otjipwikiro tjOmerikutiropamwe wa Ndjambi wOvaisrael, amu tji hindi uriri, nungwari yandjeye po otjiyandjewa tjokusuta ondjo yeṋu; indino mamu veruka, notji mamu tjivisiwa kutja mwa vererwa tjike.”
4 Novandu va pura ave tja: “Otjingee tjiyambo tji matuso okuyandja okusuta ondjo ku Ndjambi?”
Novapristeri nozombetere arire tji va ziri ave tja: “Yandjeye oviserekarera vitano vyomisuro vyeṋu vyongoldo, noviserekarera vitano vyomapuku vyongoldo otja kotjivaro tjozombara ndano zOvafilisti; orondu otjiwonga tjingetjo tja wira ku eṋe na kozombara zeṋu. 5 Ungureye oviserekarera vyomisuro vyeṋu novyomapuku ngu maye nyono ehi reṋu, nu mu yandje ondjozikiro ku Ndjambi wa Israel, ngahino eye ma isa okumuvera, eṋe noomukuru veṋu nehi reṋu. 6 Okutjavi tji mamu kukutisa omitima vyeṋu otja Ovaengipte na Farao tji va kukutisire omitima vyawo? Owo kave isire Ovaisrael ve tjinde, indu Ndjambi tja zire nokuveraisira omasa we are? 7 Nambano ungureye etemba epe, mu kambure ozongombe mbari ozondaambe nḓe hiya kutirwa, nu mu ze kutire ketemba; nu inḓa ozondana zazo puraureye nu mu ze hingire konganda. 8 Tjazumba turikeye Otjipwikiro tjOmerikutiropamwe wa Muhona metemba, nu mokapwikiro inga komeṋe mu twe mo imbi ovihuze vyongoldo mbi mamu vanga okuyandja ku ye, vi rire ombunguhiro yokusuta ondjo, noko mu ke twe meṋe yOtjipwikiro tjOmerikutiropamwe. Netemba ndi ri eseye ri yende orini, 9 nu mu tarere koṋa ku mari i; tji ra hungama kotjihuro Bet-Semes, mape hee kutja Ndjambi wOvaisrael ongwa hinda otjiwonga hi kombanda yetu. Nungwari tji ri ha hungamene koṋa ngo, matu tjiwa kutja ka ye ngwa hinda otjiwonga hi, nungwari tje ya otjini.”
10 Ovafilisti va tjita otja pu va raerwa; va kambura ozongombe mbari ozondaambe ave ze kutire ketemba nave puraurire inḓa ozondana monganda. 11 Nowo va turika Otjipwikiro tjOmerikutiropamwe wa Muhona metemba pamwe nokapwikiro mu mwa ri oviserekarera vyongoldo vyomapuku novyomisuro vyawo. 12 Nu inḓa ozongombe ozondaambe za hungama osemba kObet-Semes; ozo za kayenda amaze vandara oruveze aruhe, nokuhinokuyepa kokunene poo kokumuho. Nozombara nḓa ndano zOvafilisti za teza ozongombe nḓa nga komukuro wa Bet-Semes.
13 Novature va Bet-Semes ave kondo ovikokotwa momahi womakunino wotjana. Nowo tji va era omeho wawo, arire tji va munu Otjipwikiro tjOmerikutiropamwe nave nyanda tjinene. 14 Netemba re ya mehi romakunino rOmubetsemes Josua, nari kakurama mbo meṋe yewe enene. Novature va Bet-Semes va teya etemba ndi, ave ke omiti vyaro okuisapo ozonguṋe, ave zepa ozongombe ozondaambe nḓa nave ze punguhire Muhona ze rire ombunguhiro oningiririsiwa. 15 Ovalevi va herura Otjipwikiro tjOmerikutiropamwe wa Muhona na inga okapwikiro mu mwa ri oviserekarera vyongoldo, nave vi twa kewe enene ndi. Novature va Bet-Semes va punguhira Muhona ozombunguhiro ozoningiririsiwa nozongwao zarwe meyuva ndo. 16 Nu inḓa ozombara ndano zOvafilisti tji za za nokumuna avihe mbi arire tji za yaruka kOekron meyuva tjingero ndo.
17 Nu imbi oviserekarera vyomisuro vyongoldo Ovafilisti mbi va hinda ku Muhona vi rire ombunguhiro yondjo vya yandjewa nai: Tjimwe kOasdod, tjimwe kOgat na tjimwe kOekron. 18 Owo wina va hinda imbi oviserekarera vyomapuku vyongoldo, tjimwe kotjihuro atjihe tjaa tji honaparerwa i ozombara ndano zOvafilisti, okutja kovihuro vyotumbo otuzeu, na kovirongo mbi hi notumbo. Nu ewe ndi enene ku va twa ihi Otjipwikiro tjOmerikutiropamwe wa Muhona ra karira ehongonone raimbi mbya tjitwa mehi romakunino rOmubetsemes Josua, nga ku ndinondi. 19 Muhona wa zepa ovandu omirongo hambombari mokati kovature va Bet-Semes mena ratji va natera mOtjipwikiro tjOmerikutiropamwe wa Muhona. Notjiwaṋa tja ṱoruhoze, Muhona tjinga a tjita otjiṱiro otjinene nai.
Otjipwikiro tjOmerikutiropamwe wa Muhona mOkirjat-Jearim
20 Novature va Bet-Semes va tja nai: “Owaṋi ngu ma sora okuhupa komurungu wa Muhona, Ndjambi omuyapuke ngwi? Nambano matu tji hindi pi kutja tji ze po pu eṱe?” 21 Nowo va tuma ovahindwa kovature votjihuro Kirjat-Jearim nave kevetjivisa nai: “Ovafilisti va kotora Otjipwikiro tjOmerikutiropamwe wa Muhona; raukeye mu ye okutjieta!”
© Herero Revision Bible © Bible Society in Namibia, 2021.
