Eimburiro rondangero
1 Imburireye Muhona, oweṋe vasemba;
Mu tangeye, oweṋe amuhe
mbu mu nonḓuviro ku ye!
2 Tangeye Muhona notjiharpe,
mu imburireye nozongoma
zomiko omurongo!
3 Mu imburireye eimburiro epe;
nyandeye otjiharpe nounongo,
nu mu ravaere nondjoroka!
4 Omambo wa Muhona owo
omasemba nouatjiri,
neye omuṱakame mu avihe mbye tjita.
5 Muhona wa suvera ousemba
nombanguriro osemba;
orusuvero rwe orukarerere ru urisa ehi.
6 Omayuru ya utwa i embo ra Muhona,
eyuva nomueze nozonyose
vya utwa i omarakiza we.
7 Eye wa woronganisira omeva kokuvare pemwe,
nomipupo vyomeva we vi patera
momatuwo womapwikiro.
8 Ehi arihe ngari kare nondira ku Muhona,
novature wouye avehe ngave mu yozike!
9 Eye tja hungire otjiṋa tji tjitwa;
nu tja rakiza otjiṋa tji yenenisiwa.
10 Muhona u zunḓa ombango yoviwaṋa,
neye u ve tjita kutja ave ha
yenenisa omeripuriro wawo.
11 Nungwari ombango ya Muhona i
karerera nga aruhe,
nomeripuriro we ye kara okuza
komuhoko nga komuhoko.
12 Otjiṋingandu otjiwaṋa tji tji na
Ndjambi e ri Muhona watjo;
omuṋingandu omuhoko mbwa
toororwa u rire ouini we omuini.
13 Muhona u tara pehi okuza meyuru,
nu u muna ovandu avehe.
14 Okuza komaturiro we eye u
natera kovature avehe vehi.
15 Eye wa uta ozondunge zawo azehe,
nu u tjiwa oviungura vyawo avihe.
16 Ombara kai toṋa movita mena
rotjimbumba tjovita otjinamasa;
nomurwe ombangaṋe ka toṋa mena
romasa we omanene.
17 Oukambe wovita kau vatere okutoṋa,
omasa wawo omanene kaye yama.
18 Nungwari Muhona u tjevera
avehe mbe nonḓuviro ku ye,
avehe mbe nonḓakameno
morusuvero rwe orukarerere.
19 Eye u ve yama konḓiro,
nu u ve hupisa mourumbu.
20 Eṱe twe riyameka ku Muhona;
eye ondjamo nombatero yetu.
21 Eṱe tu yoroka mu ye,
tu riyameka kena re eyapuke.
22 Otjari tjoye, Muhona, ngatji kare pu eṱe,
tjinga amatu undju kove.
© Herero Revision Bible © Bible Society in Namibia, 2021.
