Ongumbiro yombatero
Omuimbo wa David tja ri mondimba. Ongumbiro.
1 Ami me ku ombatero ku Muhona;
me riyarikaṋa otjari ku ye.
2 Me eta ozondjemeno zandje azehe ku ye,
me mu serekarerere omauzeu wandje aehe.
3 Ami tji me rihahiza, eye ma tjiwa
imbi mbi mbi sokutjita.
Mondjira mu me kayenda,
ovanavita na ami
ve ndji twira po ombate.
4 Tji mba yevayeva, mba muna kutja
kape nomundu ngu me ndji vatere,
kape na ngu me ndji yama;
nu kape na ngu na ko na tja na ami.
5 Ami me ku ombatero kove, Muhona,
me tja nai: “Oove omaundiro wandje;
oove porwe ngu mbi vanga
mongarero yomuinyo mbwi.”
6 Puratena kondjuriro yandje,
tjinga amba wotama.
Ndji yama kovanavita na ami,
owo tjinga ave nomasa tjinene pu ami.
7 Ndji pitisa motjovakamburwa;
mombongo yotjiwaṋa tjoye
ami me ku tanga mena rouwa
woye mbu we ndji tjitira.
© Herero Revision Bible © Bible Society in Namibia, 2021.
