Ondandero ku imba mbe ṋiṋikiza ovasyona
1 Owee ku imba mbe rizemburuka nouvi nourunde ngunda ava rangavara pomara wawo! Nu tji pa tji tjandje mave tjiti ouvi mbwi, tjinga ave na inga omasorero. 2 Tji mave vanga ovikunino mave vi pundu uriri. Nu tji mave vanga ozondjuwo mave rikamburire komasa. Owo mave tjiti outwe komurumendu na kondjuwo ye, komundu na kouini we.
3 Muhona opu ma tjere nai: “Tara, ami me eta oumba ku eṋe, neṋe kamaamu sora okuupenga nu kamaamu ryanga amamu rihivi rukwao, oruveze oruvi tjinga amaru ya ku eṋe. 4 Nu oruveze ndo tji rweya, ovandu mave ungurisa ehungi roye otja otjihorera tjomanyoneno, nu mave imbura eimburiro ronyekera ndi mari tja: ‘Eṱe, twa nyonoka okumanuka! Muhona we tu yeka ehi retu ne ri yandja kovetuhuure.’ ”
5 Notji pe hi nokukara omundu ngu me mu haṋene ehi ri rire otjirumatwa mombongo ya Muhona.
6 Otjiwaṋa tja zira ku ami: “O tu zuvarisire otjiṋa! O zuvarisa oviṋa mbi avihe. Ndjambi kemee tu ṱisa ohoṋi. 7 Ovaisrael ngwari va sengwa are? Muhona ke tji nomuretima are? Eye, tjiri, maa tjiti oviṋa otja imbi are? Omambo we ka mawa ku imba mbe tjita ousemba are?”
8 Muhona wa ziri a tja: “Eṋe mu sekamena otjiwaṋa tjandje otja ovanavita. Ovarumendu mba kotoka okuza kovita, amave ripura kutja va vaza ponganda mohange, nungwari eṋe mu vaka ozongwava zawo komatambo namu ve etere onyoneno yovita. 9 Eṋe mu ramba ovakazendu votjiwaṋa tjandje mozondjuwo zawo nḓu va suvera; nu mu punda ovanatje vawo ozondaya zandje nga aruhe. 10 Sekameye mu yende; imba kape noruveze rwondjamo rukwao. Mena romauvi weṋu mamu munu omayandekero omanene.
11 “Ovandu mba ve vanga omuprofete ngu kora ovizeze na wovisa ovandu na tja nai: ‘Ami me uku kutja omavinu nomanuwa omazeu maye ku takavarere’, ingwi ongu ma rire omuprofete wakatjotjiri kotjiwaṋa hi.
12 “Nungwari ami me mu woronganisa otjiwaṋa atjihe tja Israel, eṋe amuhe mbu mwa sewa po; amuhe me mu woronganisa tjimuna ozonḓu motjunda nu tjimuna orupanda rwozonḓu momaryo; nehi reṋu mari ura rukwao novandu ovengi.”
13 Ndjambi meve patururire ondjira ne ve hongorere okuza kouhuura. Owo mave tuurungire momivero vyotjihuro nave piti; nombara yawo, ngu ri Muhona omuini, ongu meve hongorere.
© Herero Revision Bible © Bible Society in Namibia, 2021.
