Eimburiro romayuva woumba wotjiwaṋa
Omuimbo wa Etan, Omuesrak.
1 Muhona, ami aruhe me imburire
orusuvero rwoye orukarerere,
nu me zuvarisa ouṱakame woye
okuza komuhoko nga komuhoko.
2 Ami me hongonona kutja
orusuvero rwoye maru karerere nga aruhe,
nokutja ouṱakame woye wa zikama
otja ongaro ongarerere meyuru.
3 Ove wa tja: “Mba tjita omerikutiropamwe
nomutoororwa wandje;
mba kwizikira omukarere wandje David nai:
4 ‘Ondekurona yoye mai rire ombara aruhe;
ami me ṱakamisa ouhona woye okuza
komuhoko nga komuhoko.’ ”
5 Omayuru maye hivirike oviungura vyoye ovihimise;
maye imburire ouṱakame woye, Muhona.
6 Muhona, owaṋi meyuru
ngu ma sasanekwa na ove?
Owaṋi mokati kovature veyuru ngu ṱeki pove?
7 Oove omuhimise tjinene mombongo yovayapuke;
nu oove omuurumise kombanda yaavehe
mbe ku kondoroka.
8 Muhona, Ndjambi Omunamasaaehe,
kape na ngu nouvara otja ove;
nu ove oove omuṱakame moviṋa avihe.
9 U nouvara kombanda yomeva
omandandi wokuvare,
u porimanisa ozongazona zawo.
10 Ove wa ṱukuṱura onyoka onene
yokuvare Rahab nu o i zepa;
nu wa rimba ovanavita na ove
momasa woye omanene.
11 Eyuru oroye, nehi oroye wina;
ouye na avihe mbi ri mu wo, vya ungurwa i yove.
12 Wa mema omukuma wokeyuva
kokunene nowokeyuva kokumuho;
ondundu Tabor nondundu Hermon
maze ku imburire nondjoroka.
13 Tjiri, ove u nouvara!
Tjiri, ove u nomasa omanene!
14 Ouhona woye wa zikamena kousemba nouatjiri;
orusuvero nouṱakame vi munika
movitjitwa vyoye avihe.
15 Otjiṋingandu otjiwaṋa tji tji
rikotamena kove nomaimburiro,
nu tji tji ryanga mondjerera youwa woye.
16 Orondu otjo tji uhara ama tji yorokere ove,
nu tji ku tangera ouwa woye,
17 ove u tu pa outoṋi ounene;
nu morusuvero rwoye u tu pa omasa.
18 Ove, Muhona, we tu toororera omuyame;
ove, ngu u ri Omuyapuke wa Israel,
we tu pa ombara yetu.
Omakwizikiro wa Ndjambi ku David
19 Rukuru ove wa hungirire kovakarere
voye ovaṱakame motjirimunikise, no tja:
“Ami mba yandja ombatero komundu ependa
notjihavero tjouhona ku ingwi umwe ngu
mba toorora motjiwaṋa.
20 Mba zika omukarere wandje David
okurira ombara mokumutwirisa
nomaze wandje omayapuke.
21 Eke randje mari mu ṱakamisa,
nomasa wandje maye mu zeuparisa.
22 Kape nomunavita ngu me mu uru,
nu kape nomurunde ngu me mu ṋiṋikiza.
23 Ami me ṱukuṱura ovemupirukire,
nu imba mbe mu tonda me zepa.
24 Me mu suvere nu me rire omuṱakame ku ye,
nu aruhe me mu pe outoṋi.
25 Ouhona we me u tandavarisa
okuza kOmuronga Mediterania
nga konḓonḓu Eufrat.
26 Neye ma tja nai ku ami:
‘Oove ngu u ri Tate,
noove ngu u ri Ndjambi wandje;
oove omuyame nombatero yandje.’
27 Nu wina ami me mu isa po omuna
wandje otjiveri,
nomunene tjinene pozombara azehe
zokombanda yehi.
28 Ami aruhe me ṱakamisa omakwizikiro
wandje ku ye,
nomerikutiropamwe wandje na ye maye karerere.
29 Ouhona we mau zikama aruhe otja evaverwa,
nondekurona ye mai rire ombara aruhe.
30 “Nungwari ozondekurona ze tji ze hi nokukara
nonḓuviro komazikamisiro wandje
naze ha ṱakamisa omatwako wandje,
31 nu tji maze penge omaraerero wandje
naze ha yenenisa omatwako wandje,
32 me ze verere omauvi wazo,
nu me ze hihamisire ozongatukiro zazo.
33 Nungwari ami hi nokuisa okusuvera David,
nu hi nokukaerisa ko ouṱakame wandje ku ye.
34 Hi nokuteya ko omerikutiropamwe wandje na ye,
nomakwizikiro wandje hi nakuyerundurura ko.
35 “Mba yana rumwe uriri kena randje eyapuke, e tja:
Ami himee korere David ovizeze.
36 Eye aruhe ma kara nozondekurona,
nami me ṱakamisa ouhona we eyuva
ngunda amari yere.
37 Nouhona we mau zikama otja
omueze mbu karerera nga aruhe,
nu mbu ri otjihongonone otjiṱakame mevaverwa.”
Ondjuriro yokuhaverwa kwombara
38 Nungwari ove wa ṱomazenge nombara,
ndji wa toorora;
we i humba no i nakaura.
39 Ove wa teya omerikutiropamwe woye
nomukarere woye,
nu wa ṱundaurira ekori re rouhona momunoko.
40 Wa haṋa orumbo rwotjihuro tje,
noviṱunga vye we vi tjita omatundu.
41 Avehe mbe kapita mondjira,
ve punda oviṋa vye;
ovopopezu na ye avehe ve mu nyekerera.
42 Ove wa yandja outoṋi kovanavita na ye;
nu we ve yorokisa avehe.
43 Wa yandjera kutja ovirwise vye vi rire oviṋa uriri,
nokutja eye ma haverwe movita.
44 Ove wa yandisa ouvara wombara ndji,
notjihavero tjayo tjouhona o vanda pehi.
45 Wa susuparisa omayuva wouzandona wayo,
no i ṱisa ohoṋi.
Ongumbiro yonguturiro
46 Muhona, mo rihoreke aruhe nai nga ruṋe?
Nomazenge woye maye yaka
otja omuriro nai nga ruṋe?
47 Zemburuka kutja omuinyo wandje, tjiri, omusupi;
zemburuka kutja we tu mema
atuhe otja ovandu vakauriri!
48 Omundu uṋe ngu kara nomuinyo na ha koka,
ngu yama omuinyo we kotjovakoke?
49 Muhona, oviraisiro ovitenga
vyorusuvero rwoye vi ri pi?
Omakwizikiro ngu wa tjita ku David
mouṱakame woye, ye ri pi?
50 Zemburuka, Muhona, ami omukarere
woye tji mbi yambururwa,
na tji mbi tjinda ozosengiro azehe zoviwaṋa avihe.
51 Ovanavita na ove, Muhona,
ve yamburura ombara, ndji wa toorora!
Owo ve i yamburura akuhe ku mai i.
52 Muhona nga tangwe aruhe nga aruhe!
Amen! Amen!
© Herero Revision Bible © Bible Society in Namibia, 2021.
