Okurikotamena ku Ndjambi mouatjiri
Epsalme ra Asaf.
1 Muhona, Ndjambi omunene
nOmunamasaaehe, ma hungire;
eye ma ravaere kouye auhe,
okuza komapitiro weyuva nga komahitiro waro.
2 Ndjambi u rimunikisa mongeṋangeṋeno kOsion,
ihi otjihuro otjiwa otjimanise.
3 Ndjambi wetu meya, nu ke nokumwina;
komurungu we maku kayenda omuriro omusesete,
komikuma vye avihe maku
hingi otjivepo otjinamasa.
4 Eye ma isana eyuru nehi
vi rire ovihongonone,
eye tji ma pangura otjiwaṋa tje.
5 Eye ma tja nai: “Ndji woronganisireye imba
mba ṱakama mu ami,
imba mba tjita omerikutiropamwe na ami
mokupunguha ombunguhiro.”
6 Omayuru maye hongonona kutja
Ndjambi omusemba,
nokutja eye omuini onguri omupangure.
7 “Puratena, tjiwaṋa tjandje,
nambano ami me hungire!
Israel, ami me ku hongonona.
Owami Ndjambi, Ndjambi woye!
8 Hi nokukuverera ozombunguhiro zoye
poo ozombunguhiro ozoningiririsiwa
nḓoo yeta komurungu wandje aruhe.
9 Nungwari ami hi nokukambura
ko ozondwezu zozongombe
motjunda tjoye, nozongombo morupanda rwoye.
10 Orondu ovipuka avihe vyokuti ovyo ovyandje,
novinamuinyo mbi ri kozondundu omayovi.
11 Mbi tjiwa ozonḓera azehe zokuti,
noupuka auhe mbu nyangatara pehi owo owandje.
12 “Andakuzu mbi nondjara, hitje ku raera;
orondu ouye noviṋa avihe mbi ri mu wo ovyandje.
13 Mbi rya onyama yozondwezu zozongombe,
poo mbi nwa ombinḓu yozongombo are?
14 Ondangero yoye nga rire
ndja rire ombunguhiro ku Ndjambi,
nu yenenisa omakwizikiro woye
ku ingwi wOkombandambanda.
15 Kwa ku ami meyuva rombamisiro,
ami me ku yama,
nove mo ndji yozike.”
16 Nungwari Ndjambi ma tja nai komunauvi:
“Mo tamunine tjike omatwako wandje?
Nu mo hungirire tjike omerikutiropamwe wandje?
17 Ove wa tonda omavyuriro wandje,
nu u nakaura omarakiza wandje.
18 Tji wa munu erunga, u kayenda puna ro;
nu u wana novakatuke wotukupo.
19 “Ove aruhe u hungira omambo wourunde;
nu ko ivaiva okukora ovizeze.
20 Aruhe u yamba omukweṋu,
nu u kuminina omuatje wanyoko.
21 Hi mwine, tji mo tjiti oviṋa otja imbi are?
Otji mo tjangovasi ami mbi ri otja ove.
Ami nambano me ku vere,
nu me ku raisire oviṋa mbi,
u mune nomeho woye.
22 “Tjiweye, eṋe mbu mu zemba Ndjambi!
Tjapo, ami ngee mu nyondorora,
nape ha ningi omundu ngu me mu vatere.
23 Ngu ma punguha ondangero,
ongu me ndji yozike;
nu ami, tjiri, me yama avehe mbu
mave kara nonḓuviro ku ami.”
© Herero Revision Bible © Bible Society in Namibia, 2021.
