Ounene wa Ndjambi nonḓengu yomundu
Komuimburise otja ku Gitit. Epsalme ra David.
1 Muhona, ove oove Muhona wetu,
tjiri, ena roye ehimise mouye auhe!
Ondangu yoye i vaza nga komayuru.
2 Ovanatje novanyame ve imbura
oviungura vyomasa ove mbi wa zikamisa.
Ovekupirukire novanavita na
ove avehe otji mo ve mwinisa.
3 Tji me tara kevaverwa ove ndi wa ungura,
na komueze na kozonyose
nḓu wa twa poṋa pazo,
4 hapo omundu omukwatjike
kutja u mu zemburuka,
ingwi omuatje womundu
kutja u rikendera ye?
5 Ove we mu uta owokehi yovaengeri kaṱiṱi,
we mu hareka nondatero nondjozikiro.
6 Ove we mu zika okuhonaparera
oviṋa avihe mbi wa uta;
we mu twa kombanda yoviutwa avihe mbi:
7 Ozonḓu nozongombe,
novipuka vyokuti wina;
8 nozonḓera nozohi
noviutwa avihe vyomokuvare.
9 Muhona, ove oove Muhona wetu,
tjiri, ena roye ehimise mouye auhe!
© Herero Revision Bible © Bible Society in Namibia, 2021.
