Mordekai ma ningire ombatero ku Ester
1 Mordekai tja zuva avihe mbya tjitirwe wa nyondorora ozombanda ze moruhoze. Tjazumba arire tja zara omakutu, e ritirire omutwe motjiuru, na tuurunga otjihuro ama uru nomasa nama tetara omutima, 2 nga tje ya pomahitiro wondjuwo youhona. Eye ka hitire, tjinga ape ha yandjererwe omundu ngwa zara omakutu okuhita mu yo. 3 Motukondwa atuhe mu mwa tjivisiwa omaraerero wombara, mwa ri ondjuriro yoruhoze mokati kOvajuda. Owo ve ritjaera kovikurya, amave riri namave uru, novengi vawo va hwikikire omakutu nave saravara momutwe.
4 Novasukona ovakarere va Ester novakarere ozombondo ve mu raera imbi Mordekai mbi ma tjiti; nu Ester we rikenda tjinene. Eye wa hindira Mordekai ozombanda kutja a zare moruveze rwomakutu, nungwari Mordekai wa panḓa okuzekambura. 5 Ester arire tja isana Hatak, omukarere umwe ombondo wondjuwo youhona, ngwa zikwa i ombara a rire omukarere wa Ester; nu Ester we mu raera kutja a yende ku Mordekai, a katjiwe kutja wa hapa vi, nu otjikwatjike. 6 Hatak wa ya ku Mordekai korupanda rwotjihuro pomahitiro wondjuwo youhona. 7 Mordekai we mu tjivisa oviṋa avihe mbya tjitirwe ku ye, nokutja Haman wa kwizikire okutwa mo ovimariva vingapi motjipwikiro tjovihuze vyouhona, Ovajuda avehe tji va ṱu. 8 Eye wa yandja omatjangururiro womaraerero ku Hatak nga yandjererwe mOsusa, nu mu mwa tjangerwe omarakiza womayandekero wOvajuda. Mordekai we mu ningira kutja e ye tware ku Ester, nokutja a kahandjaurire Ester oviṋa avihe, ne kemuningire kutja e keriyarikaṋe kombara i ṱotjari novandu ve. 9 Hatak wa tjita nao. 10 Nu Ester we mu pa ombuze, ndji mai tja nai kutja e i yarure ku Mordekai: 11 “Ngamwa auhe, omurumendu poo omukazendu, tja hiti morupanda rwomoukoto na kamuna ombara e ha isanenwe, eye ma sokuṱa. Indi oro etwako; auhe okuza kovayandjandunge vombara nga kovandu motukondwa atuhe mave tjiwa otjiṋa hi. Pe nomuano umwe uriri wokupenga etwako ndi. Tjinangara ombara ya roporora okati kayo kongoldo ku umwe, omuinyo womundu ngo mau yamwa. Nungwari nai pa kapita omueze umwe, nu nga mba hiya isanewa i ombara.”
12 Mordekai tja za nokuzuva ombuze ya Ester ndji, 13 otja hinda omaronga nga ku Ester, a tja: “O tjangovasi oove ngu u he ri moumba pOvajuda varwe, tjinga au ri mondjuwo youhona. 14 Tji wa mwina moruveze otja indwi, ombatero kOvajuda mai zu meyuru, nowo mave yamwa, nungwari ove mo ṱu, notjikutu tjaiho matji yanda. Ngu ma tjiwa owaṋi kutja ngahino ove otji wa zikirwa okurira ombara oserekaze moruveze otja indwi!”
15 Ester wa hindira Mordekai eziriro ndi na tja: 16 “Twende nu u kaworonganisire Ovajuda avehe mOsusa; ritjaereye kovikurya nu mu ndji kumbire. Amu ri nu amu nu otjiṋa ngamwa oure womayuva nomauṱuku yetatu. Ami novakarere vandje ovasukona otjinga amatu tjiti wina. Kombunda yanao ami me i kombara, nangarire kutja me katuka etwako. Tji me ṱu mokutjita nao, hi ṱe.”
17 Mordekai wa ya na katjita oviṋa avihe Ester mbye mu raerere.
© Herero Revision Bible © Bible Society in Namibia, 2021.
