Saul ma twirisiwa okurira ombara
1 Nu Samuel wa toora onya yomaze womiṋinga, e ye tirire kotjiuru tja Saul ne mu hupite a tja: “Muhona me ku twirisa u rire ombara yotjiwaṋa tje Israel. Ove mo honaparere otjiwaṋa tje, nu mo tji yama kovanavita na tjo avehe. Otjiraisiro tjokutja Muhona we ku toorora okurira ombara yotjiwaṋa tje, otjo hi: 2 Tji wa zu pu ami ndino, mo kahakaena novarumendu vevari peyendo ra Rahel mOselsa mehi ra Benjamin, mbu mave ku raere nai: ‘Ousino mbu u paha wa munika. Nu tara, iho ke ripura notjiṋa tjousino rukwao, nungwari u rikenda na eṋe, ame ripura nai: Hi tjite vi kutja mbi mune omuzandu wandje?’ 3 Tji wa zu ngo no kavaza komumbonde wa Tabor, mo hakaene novarumendu vetatu mbu mave kapunguhira Ndjambi ombunguhiro kObetel, umwe a toora ozongombona ndatu, nomukwao a toora ozomboroto ndatu ozombomba, nu ingwi outjatatu a tjindi ondjaṱu yomukova yomavinu. 4 Owo mave ku minike nave ku etere ozomboroto mbari ozombomba ove nḓu mo sokukambura. 5 Okuzambo mo kavaza kOndunda ya Ndjambi mOgibea ku ku nozondanda zovatjevere zOvafilisti; nu tji mo kahita motjihuro, mo hakaene nombunga yovaprofete mbu mave rauka kondunda, nu komurungu wawo amaku pose ovihumba novinangoma, nozohiva zomiti, nozongoma zomiko, owo oveni ngunda amave pundu nondjoroka yomaukiro. 6 Nombepo ya Muhona mai ya kombanda yoye, nu wina otji mo pundu puna wo, nombepo ya Ndjambi mai ku rundurura okurira omundu warwe. 7 Oviraisiro mbi tji mavi tjitwa kove, yenenisa imbi Ndjambi mbi me ku pe okutjita; orondu Ndjambi u ri puna ove. 8 Twende komurungu wandje kOgilgal; ingo oku matu kahakaenena, nu ami me kapunguha ombunguhiro oningiririsiwa noyohange, nga tji mbe ya okukutjivisa ihi tji mo sokutjita.”
9 Saul tja tanauka okuza po pu Samuel, Ndjambi arire tja rundurura omutima wa Saul; noviraisiro avihe mbi vya tjitwa meyuva ndo. 10 Nu Saul nomukarere we tji va kavaza kOgibea, va kahakaena nombunga yovaprofete nu tjimanga Ombepo ya Ndjambi ye ya kombanda ya Saul, neye wa punda nondjoroka nenyando puna wo. 11 Novandu mbaa ve tjiwa Saul rukuru tji va muna kutja ma pundu puna ovaprofete, otji va purasana ave tja: “Pa tjitwa tjike komuzandu wa Kis? Saul wina wa rira omuprofete are?” 12 Nomundu umwe ngwa zire ngo, wa zira a tja: “Ihe yawo owaṋi?” Embo ndi opu ra ririra omuano: “Saul wina wa rira omuprofete are?” 13 Saul tja mana okupunda, arire tja rondo kondunda ya Gibea.
14 Nu inyangwe ya Saul wa pura ye nomukarere we a tja: “Mwa ire pi?”
Saul wa zira nai: “Twa kapahere ousino, neṱe tji twa muna kutja katu na kuumuna twa ya ku Samuel.”
15 Nu inyangwe ya Saul wa tja: “Arikana, ndji serekarerera imbi Samuel mbye mu raere.”
16 Saul arire tja tja ku inyangwe: “Eye we tu tjivisa kutja ousino wa munika.” Nungwari ihi otjiṋa tjokurira ombara Samuel tja hungira, eye ke mu raerere ko.
Saul ma zikwa okurira ombara
17 Samuel wa woronganisa otjiwaṋa komurungu wa Muhona mOmispa, 18 na tja kOvaisrael: “Muhona, Ndjambi wa Israel, ma tja nai: ‘Ami mba pitisa Israel mOengipte ne mu yama meke rOvaengipte na mouvara womauhona aehe nge mu ṋiṋikizire. 19 Nungwari eṋe ndino mwa imbirahi Ndjambi weṋu ngwe mu kutura momauzeu weṋu aehe na mozombamisiro, amu tja: Ayee, tu zikira ombara. Nambano woronganeye komurungu wa Muhona otja komihoko na kozonganda zeṋu.’ ”
20 Nu Samuel tja tumbuza omihoko avihe vyOvaisrael popezu, imbwi omuhoko wa Benjamin ombwa urikwa i Muhona. 21 Nu imbwi omuhoko wa Benjamin, otja kozonganda zawo, tji wa tumbuziwa popezu, indji onganda ya Matri ondja urikwa; tjazumba ape urikwa Saul, omuzandu wa Kis. Nowo ve mu paha, nungwari eye kaa munika. 22 Nowo otji va pura ku Muhona rukwao ave tja: “Saul u ri pi?”
Nu Muhona wa zira nai: “Tara, eye wa ṱara mokati komitwaro.”
23 Nowo otji va ya nave kemupitisa poṋa pa ri; nu Saul tja kakurama mokati kotjiwaṋa, eye tjandje onguri omure pu avehe. 24 Nu Samuel wa tja nai kotjiwaṋa: “Tareye, ingwi ngwa toororwa i Muhona, eye ngwi! Kamu na umwe ngwa sana na ye mokati kotjiwaṋa atjihe.”
Notjiwaṋa atjihe tja yoroka natji tja: “Ombara ngai hupe orure!”
25 Tjazumba Samuel wa handjaurira otjiwaṋa atjihe omausemba noviungura vyombara, ne vi tjanga membo, ne ri twa komurungu wa Muhona. Nu Samuel otja raera otjiwaṋa atjihe kutja omundu auhe a yaruke koyawo. 26 Nu Saul wina wa yaruka konganda ye kOgibea; nozombanḓe nḓa Ndjambi nḓa yanḓiparisa omitima za ya puna ye. 27 Nungwari ovandu tjiva oviporoporo va tja nai: “Omundu ngwi me tu kutura vi?” Nowo ve mu nyengura nave he mu etere oviyandjewa; nungwari eye kahungirire otjiṋa.
© Herero Revision Bible © Bible Society in Namibia, 2021.
