Elimelek neṱunḓu re mave tjindire kOmoab
1 Rukuru Ovaisrael tji va honaparererwe i ovapangure, mwa ri ondjara mehi ndo. Nomurumendu worive ngwa zire kObetlehem mehi ra Juda wa sekamene okukatura oruveze oruṱiṱi mehi ra Moab otja owozonganda; nomukazendu we novazandu ve vevari va ire puna ye. 2 Nu indi ena romurumendu ra ri Elimelek, indi romukazendu ra ri Naomi, novazandu ve vevari va ri ooMahlon na Kilion. Elimelek wa ri Omuefrat na katura kObetlehem mehi ra Juda. Nowo va ire kOmoab nave katura ngo. 3 Nu Elimelek wa koka, nomukazendu we Naomi ongwa sewa puna ovazandu ve aveyevari. 4 Novazandu mba va kupa ovasuko vOvamoab; omusuko umwe wa rukirwe Orpa, nomukwao Rut. Nowo va turire ngo oure wozombura omurongo. 5 Mahlon na Kilion wina va koka, nu Naomi wa sewa erike, nokuhinovazandu ve aveyevari, nokuhinomurumendu we wina.
Naomi na Rut mave yaruka kObetlehem
6 Naomi tja zuva kutja Muhona wa vaterere ovandu ve, indu tje ve pere ovikurya, eye otje rirongera okuyaruka, narire tja tjindi okuza mOmoab puna ovakazendu mba ovakwe ve aveyevari. 7 Neye wa sekama na yaruka kOjuda puna wo. 8 Nungwari mondjira Naomi wa tja nai ku wo: “Yarukeye, auhe konganda yaina. Muhona nga kare notjari na eṋe otja tji mwa tjita ku imba mba koka na ku ami wina. 9 Nu Muhona nga tjite kutja auhe weṋu a kupwe rukwao nokukara nonganda.” Naomi arire tje ve hupite. Nungwari owo va uta okurira tjinene, 10 nave tja ku ye: “Kako, eṱe matu vanga okuyenda puna ove komuhoko woye.”
11 Nu Naomi we ve zira a tja: “Yarukeye, vanatje vandje! Okutjavi tji mamu vanga okuyenda puna ami? Ami nai mee kakara novazandu rukwao okukemukupa are? 12 Yarukeye kozoyeṋu! Ami mba kurupa tjinene okukupwa rukwao. Andakuzu me ripura kutja mbi nomaundjiro okukupwa poo andakuzu me kupwa ndino ongurova ne panduka ovazandu, 13 eṋe hapo atja mu undja nga tji ve kuru kutja ve mu kupe are? Atja mu ritjaera okukupwa i ovarumendu varwe are? Vasuko vandje, eṋe mamu tjiwa kutja kape nokuyenena; orondu Muhona wendji tanaukira, nu me ṱondjenda na eṋe tjinene.”
14 Nowo va uta okurira tjinene rukwao. Orpa wa hupita nokuvirikiza ina omukwe we na yaruka komuhoko wawo; nungwari ingwi Rut we rimanga mu ye. 15 Naomi wa tja ku Rut: “Tara, omukweṋu wa yaruka komuhoko na koomukuru vawo. Ove wina yaruka, kongorera omukweṋu!”
16 Nungwari Rut wa zira a tja: “O ndji ṋiṋikiza okuza po pove; o ndji tjaere okuyenda puna ove. Akuhe ku mo i, ami oku me i, akuhe ku mo katura, ami oku me katura. Omuhoko woye owo omuhoko wandje; nu Ndjambi woye eye Ndjambi wandje. 17 Ove ku mo kakokera, ami oku me kakokera, nu oku me kapakwa. Muhona nga tjite ku ami atjihe tji ma vanga; onḓiro porwayo nga rire ndje tu haṋa.”
18 Nu Naomi tja muna kutja Rut we rimana okuyenda puna ye, eye ka uharere ama hungire rukwao.
19 Nowo aveyevari va kayenda pamwe nga tji va kavaza kObetlehem, nu tji va kahita mu tjo, otjirongo atjihe arire tji tja kumwa, nu imba ovakazendu ve ripura ave tja: “ONaomi ngwi are?”
20 Neye wa zira a tja: “Amu ndji isana Naomi, okutja Omuṋingandu; ndji isaneye Mara, okutja Omunandjenda; orondu Ndjambi, Omunamasaaehe, tje ndji munisa ouzeu tjinene. 21 Ami tji mba zire muno mba ri novingi, nungwari Muhona we ndji kotora tjo. Okutjavi tji mamu ndji isana Naomi, Omunamasaaehe ngunda e ndji etera oviwonga nu e ndji hihamisa?”
22 Komuhingo mbwi Naomi otja kotoka okuza kOmoab puna Rut, omukwe we Omumoab. Nowo va vaza kObetlehem moruveze rwomakondero wovirya.
© Herero Revision Bible © Bible Society in Namibia, 2021.
