Ovanatje va Ndjambi
1 Tareye orusuvero Tate ndwe tu suvera na ro! Orusuvero rwe orunene tjinene, nga tjime tu isana kutja oweṱe ovanatje va Ndjambi, nu wina otjinga atu ri nao. Ouye opu u ha zu okututjiwa, tjinga au he i Ndjambi. 2 Vakwetu ovasuverwa, nambano oweṱe ovanatje va Ndjambi, nu ingee kapeya raisiwa ongahukiro kutja matu kasana pi. Nungwari matu tjiwa kutja eye tja munika eṱe matu sana ku ye, orondu matu mu munu otja tjinga e ri, 3 nu auhe ngu nomaundjiro nga mu Kristus me ritjindi oukohoke otja Kristus tjinga e ri omukohoke.
4 Ingwi ngu ma tjiti ourunde u nondjo yokukatuka omatwako wa Ndjambi. 5 Eṋe mamu tjiwa kutja Kristus we era okuisapo ourunde, nu wina mamu tjiwa kutja mu ye kamu nourunde. 6 Nauhe ngu ma kara noruwano na Kristus ke nokupanḓera pokutjita ourunde, nungwari ingwi ngu ma panḓere pokutjita ourunde eye ke na pe mu munine nu ke na pe mu tjivirwe.
7 Ape ningi omundu ngu me mu pukisa, vanatje vandje! Ingwi ngu ma tjiti ousemba eye omusemba otja Kristus punga e ri omusemba. 8 Ingwi ngu ma panḓere pokutjita ourunde eye owa Satan, orondu Satan wa tjita ourunde okuza kombutiro. Nu Omuna wa Ndjambi otjiṋa tje era porwatjo okongwi okuyekuyandeka imbi oviungura vya Satan.
9 Ingwi ngu ri omuatje wa Ndjambi ke nokupanḓera pokuhupa mourunde, Ombepo ya Ndjambi omuini tjinga ai ri mu ye; nu Ndjambi tjinga e ri Ihe, eye otjinga e hi nokusokupanḓera pokuhupa mourunde. 10 Mu ihi otjinga e ri ongahukiro kutja ovanatje va Ndjambi ooveṋe nu imba ova Satan ooveṋe: Auhe ngu hi nokutjita ousemba, nu ngu ha suverere omukwao, eye kamuatje wa Ndjambi.
Suverasaneye
11 Ombuze ndji mwa zuva okuza kombutiro oyo ndji: Ngatu suverasane. 12 Eṱe atu ha sana ku Kain; eye wa ri owaingwi Omunauvi, nu wa zepere omuangu we omuini Abel. Neye we mu zepera tjike? Omotjimbe tjokutja ozondjito ze za ri ozombi, nu inḓa ozomuangu we za ri ozombwa.
13 Nu amu kumwa, vakwetu, ovature wouye tji mave mu tondo. 14 Matu tjiwa kutja twa za monḓiro natu kondo komuinyo, tjinga atwa suvera ovakwetu. Ingwi ngu ha suvere ma kara momasa wonḓiro. 15 Ingwi ngu ma tondo omukwao eye omuzepe, nu mamu tjiwa kutja omuzepe auhe ngamwa kamaa rumata omuinyo waaruhe. 16 Orusuvero matu ru tjivirwa komuhingo mbwi: Kristus wa yandjera eṱe omuinyo we. Eṱe wina opu tu sokuyandjera ovakwetu ominyo vyetu! 17 Omutumbe tja munu omukwao ngu nouhepe ne mu pe etambo, orusuvero rwa Ndjambi maru karere pi mu ye? 18 Vanatje vandje, orusuvero rwetu aru rire omambo nokuhungira porwako; ngaru rire orusuvero rwouatjiri, nu ngaru riraise oruini movitjitwa.
Okuyanḓipara komurungu wa Ndjambi
19 Nu komuhingo mbwi otji matu tjiwa kutja oweṱe ovandu wouatjiri; notji matu kara nouatjiri momitima vyetu komurungu wa Ndjambi. 20 Omitima vyetu tji mavi tu pangura, eṱe matu tjiwa kutja Ndjambi omunene pomitima vyetu, nokutja eye u tjiwa avihe. 21 Nu vakwetu ovasuverwa, omitima vyetu tji vi hi nokutupangura, eṱe matu yanḓipara komurungu wa Ndjambi. 22 Nu atjihe tji matu mu ningire eye u tu pa, eṱe tjinga atu ṱakamisa omatwako we, nu tjinga atu tjita imbi mbi tjata ku ye. 23 Netwako re okongwi okutja tu kambure mOmuna we Jesus Kristus, nokutja tu suverasane otja petu rakiza. 24 Ingwi ngu ma ṱakamisa omatwako wa Ndjambi ma kara mu ye. Nu motjimbe tjOmbepo Ndjambi ndje tu pa, eṱe matu tjiwa kutja Ndjambi u ri mu eṱe.
© Herero Revision Bible © Bible Society in Namibia, 2021.
