Omavandururiro 21 - Herero Revision Bible (HRR)

Eyuru epe nehi epe

1 Ami mba munine eyuru epe nehi epe. Eyuru etenga nehi etenga tjandje ya zenga, nokuvare tjandje kaku po. 2 Nu e munu otjihuro otjiyapuke, ihi Jerusalem otjipe, ama tji zu keyuru okuza ku Ndjambi. Otjo tja ṱuninwe tjimuna omukupwa ngwe rihwikikire okuhakaena nomurumendu we. 3 Nami mba zuvire eraka enene nda hungirire okuza kotjihavero tjouhona, amari tja: “Tara, omaturiro wa Ndjambi ye ri mokati kovandu. Eye ma tura mokati kawo, nowo ave rire otjiwaṋa tje. Ndjambi omuini ma kara puna wo nu a rire Ndjambi wawo. 4 Eye ma yeka omahoze aehe momeho wawo. Nonḓiro kai tji nokukara po rukwao; noruhoze nomaririro, nomihihamo kavi tji nokukara po rukwao; noruhoze nomaririro, nomihihamo kavi tji nokukara po rukwao. Oviṋa ovikuru vya kapita.”

5 Nu ingwi ngu ri kotjihavero tjouhona arire tja tja: “Tara, ami me yarura avihe koupe!”

Eye wina wa tjere ku ami: “Tjanga omambo nga, owo tjinga aye ri omauatjiri nomaṱakame.”

6 Neye wa hungirire rukwao ku ami a tja: “Tja tjitwa, pa pu. Owami Omutenga nomusenina, Ombutiro nOndjandero, Nu omunanyota auhe ami me mu pe uriri okunwa moruharwi rwomeva womuinyo. 7 Auhe ngu ma toṋa ma pewa oviṋa mbi i ami: Ami me rire Ndjambi we, neye a rire omuna wandje. 8 Nungwari imba ovimumandu novahaṱakama novayaukise novazepe novavakirasane na imba mbe tjita ourozi na imba mbe rikotamena koomukuru vovisenginina novanavizeze avehe, oruveze rwawo orondwi erindi mu mu yaka omuriro nosurungu, okutja onḓiro oitjavari.”

Jerusalem otjipe

9 Nu umwe wovaengeri mba hambombari, mba ri noviyaha hambombari mbye urire noviwonga mbi ovisenina hambombari, arire tje ya ku ami na tja: “Indjo, nami me ku raisire Omuvarekwa, ingwi omukazendu wOndjona.” 10 NOmbepo ya honapara mu ami, nomuengeri e ndji twara kondomba yondundu onde tjinene. Eye we kendjiraisira Jerusalem, ihi otjihuro otjiyapuke, tji tja rauka keyuru okuza ku Ndjambi. 11 Otjihuro hi tja ri nongeṋangeṋeno ya Ndjambi, nu aatji keṋakeṋa tjimuna ewe ehuze ejaspis, nekeṋakeṋe tjimuna okrista. 12 Otjihuro hi tja ri norumbo orunene orutonga ndwa ri nomivero omurongo na vivari; novyo aavi tjeverwa i ovaengeri omurongo na vevari. Nu komivero mbi kwa tjangerwe omana womihoko omurongo na vivari vyOvaisrael. 13 Komunda auhe kwa ri omivero vitatu: Komuhuka kwa ri vitatu, keyuva kokumuho kwa ri vitatu, keyuva kokunene kwa ri vitatu, nu kongurova kwa ri vitatu. 14 Orumbo rwotjihuro rwa ri nomazikameno omurongo na yevari womawe; nu komazikameno nga kwa tjangerwe omana wovaapostele vOndjona omurongo na vevari.

15 Nomuengeri ngwi ngwa hungirire na ami wa ri nokati okasaneke kongoldo okusaneka na ko ihi otjihuro nomivero vyatjo norumbo rwatjo. 16 Otjihuro tja ri nomikuma vine mbi ṱeki pamwe, nu tja ri nouparanga mbu ṱeki poure watjo. Nomuengeri wa saneka otjihuro nokati ke okasaneke: Noure nouparanga noutonga watjo ya ṱekire pamwe, auhe peke ozokirometa omayovi yevari nomasere yane. 17 Eye wina wa sanekere indwi orumbo, norwo rwa ri noutonga wozometa omirongo hamboumwe otja komasanekero nga tuwa po i ovandu. 18 Orumbo rwa ungurirwe nomawe omajaspis, nu ihi otjihuro otjini tja ungurirwe nongoldo ongohoke nongeṋangeṋeno tjimuna otjiritarero. 19 Nomazikameno worumbo rwotjihuro ya harekerwe nomawe omahuze ngamwa aehe. Ewe ezikameno etenga ra ri ejaspis, oritjavari ra ri esafira, oritjatatu ra ri eagata, oritjaine ra ri esimaraga, 20 oritjahamboumwe ra ri ekarneol, oritjahambombari ra ri ekrisolit, oritjahambondatu ra ri eberil, oritjamuvyu ra ri etopas, oritjamurongo ra ri ekrisopras, oritjamurongo na rimwe ra ri ehijasint, oritjamurongo na yevari ra ri eametis. 21 Imbi omivero omurongo na vivari vya ri oundjendje omurongo na uvari. Omuvero auhe peke wa ungurirwe pokandjendje kemwe. Nu imbwi omuvanda wotjihuro wa ri ongoldo ongohoke, ndji keṋakeṋa tjimuna otjiritarero.

22 Ami hi na pu mba muna ondjuwo motjihuro, orondu ondjuwo yatjo oyo oMuhona Ndjambi, Omunamasaaehe, na indji Ondjona. 23 Notjihuro katji nokuhepa eyuva nomueze okuyera mu tjo, orondu ongeṋangeṋeno ya Ndjambi ondji tji yerisa, nOndjona ondji ri emunine ratjo. 24 Noviwaṋa vyouye mavi ryanga mondjerera yatjo, nozombara zehi maze eta outumbe wazo mu tjo. 25 Omivero vyotjihuro mavi uhara kamwaha omutenya auhe; ovyo kamaavi patwa ko, tjinga ape tji hi nokukara ouṱuku. 26 Ovihuze noutumbe woviwaṋa mavi etwa motjihuro. 27 Nungwari mu tjo kamaamu hiti ko otjiṋa otjihakohoke, nu wina kamaamu hiti ko omundu ngamwa ngu tjita oviyaukise poo ngu kora ovizeze. Imba porwe mba tjangwa membo romuinyo, indi embo rOndjona, ombu mave hiti motjihuro.