Ondjozikiro ya Jerusalem ndji mai ya
1 Sekama, Jerusalem, u yere otja eyuva;
orondu nongeṋangeṋeno ya Muhona mai yere kombanda yoye!
2 Oviwaṋa vyarwe mouye mavi vandekwa i onḓorera.
Nungwari ondjerera ya Muhona mai yere kombanda yoye;
ongeṋangeṋeno youkarepo we mai munika kombanda yoye.
3 Oviwaṋa mavi nanwa i ondjerera yoye,
nozombara maze nanwa i ozohanya zomuhuka.
4 Yevayeva u mune imbi mbi mavi tjitwa!
Otjiwaṋa tjoye matji wongara okukotoka konganda.
Ovanatje voye ovazandu mave zu kokure;
ovanatje voye ovakazona mave etwa ava verekwa otja ounatje.
5 Ove mo munu otjiṋa hi no urisiwa nondjoroka.
Mo kara nondira momutima woye nenyando.
Ovihuze noutumbe vyoviwaṋa mavi etwa kove
okuza munda mbwina yokuvare.
6 Otutjindo twozongamero matu ya okuza kOmidian na Efa.
Otwo matu zu kOseba amatu eta ongoldo novyomoro omuwa.
Ovature va Saba mave serekarere ombuze ombwa
yaimbi Muhona mbya tjita.
7 Ozonḓu azehe za Kedar nozondwezu zozonḓu za Nebajot
maze etwa kove ze rire ozombunguhiro,
nu maze punguhirwa kotjipunguhiro
kutja ze yandje onyuṋe ku Muhona.
Muhona ma yerisa ondjuwo ye
komurungu waindu rutenga.
8 Ozondjuwozomomeva zatjike nḓo ndu maze ya otja ovikamba,
notja ozonguti nḓu maze kotoka koviruwo vyazo?
9 Ozo ozondjuwozomomeva nḓu maze zu komakoverwa,
nḓu maze kotora otjiwaṋa tja Ndjambi konganda.
Ozo maze eterere osilveri nongoldo okuyozika ena ra Muhona,
Omuyapuke wa Israel,
ngwa tjiti kutja oviwaṋa avihe vi yozike otjiwaṋa tje.
10 Muhona ma tja nai kOjerusalem:
“Ovozonganda mave tungurura otumbo twoye,
nozombara zawo aze ku karere.
Ami mbe ku vera momazenge wandje,
nungwari nambano me ku raisire ondjingonekero notjari tjandje.
11 Omivero vyoye mavi kara kamwaha ouṱuku nomutenya,
kokutja ozombara zoviwaṋa ze ku etere outumbe wazo.
12 Nungwari oviwaṋa nomauhona nge hi
nokukukarera mavi nyonwa oparukaze.
13 “Omiti omiwa vyehwa ra Libanon,
okutja omiparara nomiṱati nomizema mavi etwa
okuyekutungurura ove, Jerusalem,
okuhareka ondjuwo yandje i rire ombwa omanise
nokuyandja ondjozikiro kotjihuro tjandje.
14 Ovanatje ovazandu vaimba mbe ku ṋiṋikiza
mave ya nave rikotere kove okuraisa ondjozikiro yawo.
Avehe mbe ku nyengwa mave rikotamenene pozombaze zoye.
Owo mave ku isana nai: ‘Otjihuro tja Muhona,
Sion, Otjihuro tjOmuyapuke wa Israel’.
15 “Ove ko tji nokuuhara amo imbirahiwa nokunyengwa
nokurira otjihuro ongaango tji tja isiwa.
Ami me ku tjiti omunene nomuwa omumanise,
otjirongo tjenyando, ndi mari karerere nga aruhe.
16 Oviwaṋa nozombara mavi rikendere ove
otja ina tjinga e nyamisisa okanatje ke.
Ove mo tjiwa kutja ami, ngu mbi ri Muhona, mbe ku yama,
nokutja Ndjambi omunamasa wa Israel me ku kutura.
17 “Ami me ku etere ongoldo moruveze rwongoporo,
nosilveri nongoporo moruveze rwovitenda nomiti,
novitenda moruveze rwomawe.
Ovahonapare voye kave tji nokukuṋiṋikiza;
ami meve pe omasorero okuhonapara nousemba nohange.
18 Ozondjito zoutwe kaze tji nokuzuvaka rukwao;
omanyoneno kaye tji nokuzezerisa ehi roye rukwao.
Ami me ku tjevere nu me ku yeura tjimuna orumbo.
Ove mo ndji tanga tjinga ambe ku yama.
19 “Eyuva kari tji nokurira ondjerera yoye mutenya,
nomueze kau tji nokurira ondjerera yoye ouṱuku;
ami, ngu mbi ri Muhona,
ongu me rire ondjerera yoye yaaruhe;
ondjerera yongeṋangeṋeno yandje mai yere kombanda yoye.
20 Omayuva woye woruhoze maye yanda.
Ami, ngu mbi ri Muhona, ngu me rire ondjerera yoye yaaruhe.
Ondjerera yandje mai karerere pu indji yeyuva nomueze.
21 Ovature voye avehe mave tjiti imbi mbi ri ovisemba,
nehi a ririre ouini wawo nga aruhe.
Ami mbe ve kuna tjimuna otjikunino,
nu mbe ve uta kutja ve serekarere ounene wandje koviwaṋa avihe.
22 Nangarire eṱunḓu roye okaṱiṱiṱiṱi ndi hi nanḓengu,
mari rire otja otjiwaṋa otjinene notjinamasa.
Oruveze orusemba tji rweya,
ami me yenenisa otjiṋa hi tjimanga.
Ami ngu mbi ri Muhona, mba hungire.”
© Herero Revision Bible © Bible Society in Namibia, 2021.
