Muhona ma pangura oviwaṋa
1 Muhona ma tja nai: “Eyuru oro otjihavero tjandje tjouhona, nehi oro okahavero kozombaze zandje. Hapo ongendjuwo, ndji mamu yenene okundjitungira, nu opoṋa peṋe pu mape yenene ami okusuva po? 2 Owami omuini ngu mba uta ouye auhe; nu oviṋa avihe ovyandje. Mbi nohange na imba mbe risusuparisa na mbe ritanaura, na imba mbe nondira ku ami na mbe nonḓuviro ku ami.
3 “Ovandu ve tjita otja pu mave vanga. Avihe ku wo vya sana, nangarire tji mave zepa ongombe okurira ombunguhiro poo tji mave punguha omundu; nangarire tji mave punguha ondjona poo tji mave teya engoti rombwa; nangarire tji mave punguha ombunguhiro yovikurya poo ombinḓu yombinda; nangarire tji mave twimisa ovyomoro omuwa poo tji mave kumbu kotjiserekarera tjotjisenginina. Owo ve kara nonyuṋe moviṋa oviyaukise avihe. 4 Ami otji me eta otjiwonga kombanda yawo, imbi oviṋa mbi ve tira tjinene, orondu kapa ri omundu ngwa itavera ami tji mba isana poo ngwa puratena tji mba hungira. Owo va toorora okuhina onḓuviro nave tjiti ouvi.”
5 Purateneye ku imbi Muhona mbi ma hungire, eṋe mbu mu nondira ku ye, nu mbu mu nonḓuviro ku ye: “Mena rokutja mwa ṱakama mu ami, ovandu veṋu tjiva ve mu humisa, nu ve mu imbirahi. Owo ve mu nyekerera ave tja: ‘Muhona nga raise ounene we, nu nge mu yame kutja eṱe tu mune enyando reṋu.’ Nungwari owo oveni mave ṱisiwa ohoṋi! 6 Purateneye! Indji ondokohero onene motjihuro na imbwi omungunda mondjuwo ya Muhona ovyo ombosiro ya Muhona ngu ma vere ovanavita na ye!
7 “Otjihuro tjandje otjiyapuke tji ri otja omukazendu ngu ma hakahana okupanduka okanatje okazandu ngunda e hiya muna ozongama. 8 Owaṋi ngwa zuva otjiṋa otja ihi? Owaṋi ngwa muna oviṋa mbya sana ngwi? Indu ehi ri kwatwa meyuva rimwe are? Indu otjiwaṋa tji kwatwa motjikando tjimwe are? Sion ngunda atji ri pokumuna ozongama, tjandje otjiwaṋa tja kwatwa. 9 Amu tjangovasi ami me eta otjiwaṋa tjandje popezu nombandukiro ne tji tjaere okupandukwa.” Muhona ongwa hungire.
10 Nyandeye puna Jerusalem; yorokereye otjihuro hi,
eṋe amuhe mbu mwe tji suvera!
Nyandeye, nyandeye puna tjo,
eṋe amuhe mbu mwe tji ṱira oruhoze!
11 Eṋe mamu ri namu kuta
tjimuna okanatje ku make nyamu kevere raina.
12 Muhona ma tja nai: “Ami me mu etere ohange ongarerere; outumbe woviwaṋa mau pupire ku eṋe otja onḓonḓu, ndji ha pwire. Eṋe mamu kara otja ounatje mbu mau nyamisisiwa i ina, mbu pukatwa nau rerwa norusuvero. 13 Ami me mu huhumiṋa tjimuna ina tjinga e huhumiṋa omuatje we mOjerusalem omu mamu munu mo omahuhumiṋino. 14 Tji mamu munu oviṋa mbi amavi tjitwa, omitima vyeṋu mavi yoroka; novitjitwa mbi mavi mu pe omasa nomberukiro. Otji mamu tjiwa kutja ami, ngu mbi ri Muhona, mbi vatera imba mbe nonḓuviro ku ami, nu mbi ṱomazenge novanavita na ami.”
15 Nu tara, Muhona ma tukuruka momuriro; eye ma kavire kovivava vyotjipukupuku okuvera imba eye mbe nomazenge tjinene na wo. 16 Orondu Muhona ma yenenisa ombanguriro nomuriro, nu ma vere ovandu avehe mouye auhe nengaruvyo, mbu meve munu ovanandjo; novengi mave ṱu.
17 Muhona ma tja nai: “Ondjandero yeya popezu ku imba mbe rikohororera okurikotamena kovisenginina, mbe kayenda moruteto kovikunino ovizere, nu mbe rya onyama yombinda nomapuku, novikurya vyarwe oviyaukise. 18 Ami me tjiwa omeripuriro nozondjito zawo, nu meya okuworonganisa ovandu voviwaṋa avihe. Tji va worongana mave munu ounene wandje, 19 nu mave tjiwa kutja owami ngwi ngu meve vere.
“Nungwari ami me hupisa tjiva vawo, nu meve hindi koviwaṋa na komahi wokokure nga nge hiya zuva ondangu yandje, nu nge hiya muna ounene nouvara wandje, okutja ooSpanie na Libie na Lidie puna ovarumendu vawo ovarumbire vomauta na Tubal na Grike. Owo mave zuvarisa ondangero yandje mokati koviwaṋa mbi. 20 Owo mave eterere ovakweṋu avehe okuza koviwaṋa, ve rire otjiyandjewa tjombunguhiro ku ami. Owo mave ve eta kondundu yandje ondjapuke mOjerusalem ava kavire koukambe nousinokambe nozongamero, nu averi momatemba wovita na kovihavero ovitjindwa tjimuna Ovaisrael tji ve eta ozombunguhiro zovikurya kondjuwo ya Muhona movitjuma ovikohoke. 21 Tjiva vawo meve tjiti ve rire ovapristeri nOvalevi.
22 “Otja eyuru epe nehi epe punga amaye karerere momasa wandje, ozondekurona zeṋu nena reṋu opunga amaye karerere momasa wandje, ozondekurona zeṋu nena reṋu opunga amavi karerere. 23 Meyuva arihe rOmatendameno wOmueze na mesabata arihe, ovandu voviwaṋa avihe mave ya okurikotamena muno mOjerusalem.” Muhona ma tja nai. 24 “Nu tji mave piti, mave munu oturova twaimba mbe ndji pirukira. Omativa ngu maye ve ri kamaaye koka, nomuriro mbu mau ve seseta kamaau zemisiwa. Ombunikiro yawo mai rire ondjaukise kovandu avehe.”
© Herero Revision Bible © Bible Society in Namibia, 2021.
