Jesaja 25 - Herero Revision Bible (HRR)

Eimburiro rondangero

1 Muhona, oove Ndjambi wandje;

ami me ku yozike, nu me tanga ena roye.

Ove wa tjita oviṋa ovihimise,

nu wa yenenisa nouṱakame

inga omeripuriro ngu wa tyere rukuru.

2 Ove wa tjita otjihuro tji rire etundu,

nu wa haṋa oviṱunga vyatjo ovinamasa.

Ozondjuwo zouhona,

nḓa tungwa i ovanavita na eṱe za wa,

nu kaze tungururirwe nga aruhe.

3 Oviwaṋa ovinamasa mavi ku yozike;

Ove mo tiriwa movihuro vyoviwaṋa ovindandi.

4 Omusyona nomuhepe va paha omaundiro move,

nowo va kara nokuhinatjipo moruveze rwoumba.

Ove mo ve pe omawameno kotjivepo tjombura,

nomuzire koupyu mbu nyosa.

Ovandu ovindandi ve rwisa tjimuna otjivepo tjokupepera,

5 tjimuna ourumbu mehi nda kukuta.

Nungwari ove, Muhona, wa mwinisa ovanavita na eṱe;

mo mwinisa ondokohero yovandu ovindandi otja omuzire

wovikamba punga au porisa eyuva roupyu.

Ndjambi ma ṱunu omukandi

6 Kombanda yondundu Sion ndji, Muhona Omunamasaaehe ma ṱunine omihoko avihe kombanda yehi omukandi wovikurya oviwa tjinene nomavinu omawamawa. 7 Neye ma isako ewiwiri roruhoze nda rekarekera oviwaṋa nomihoko avihe. 8 Muhona Ndjambi ma nyono onḓiro nga ko nga aruhe! Eye ma yeka omahoze momeho waauhe, nu ma isa po ohoṋi yotjiwaṋa tje mouye auhe. Muhona omuini wa hungire!

9 Oviṋa mbi tji vya tjitwa, auhe ma tja nai: “Eye onguri Ndjambi wetu! Eṱe twe riyameka ku ye, neye we tu yama. Eye onguri Muhona wetu! Eṱe twe riyameka ku ye. Nambano eṱe tu nenyando nondjoroka, eye tjinga e tu yama.”

Ndjambi ma vere Ovamoab

10 Muhona ma tjevere Ondundu ya Sion. Nungwari Ovamoab mave tombwa tjimuna ovihozu tji vi tomberwa motjitoto tjombumbi. 11 Owo mave roporora omaoko wawo aayo mave kondjo okutendeza kombanda yomeva, nungwari Ndjambi meve ṋiṋikizire momeva, nomaoko wawo maye ṱomwine nokuhinomayeuriro. 12 Eye ma nyono oviṱunga vya Moab notumbo twavyo otutonga, nu me vi ṱukuṱurire moruuma.