Ovahongonone vevari
1 Ami mba perwe oruu ndwa sanene nokati okasaneke ne raerwa nai: “Sekama u kasaneke ondjuwo ya Ndjambi notjipunguhiro nu u kavare ovandu mba mbe rikotamenena mu yo. 2 Nungwari o saneke ko indwi orupanda rwopendje rwondjuwo ya Ndjambi, orwo tjinga arwa yandjwa ku imba mbe ha tjiwa Ndjambi, mbu mave tombo otjihuro otjiyapuke oure womieze omirongo vine na vivari. 3 Nami me yandja ouvara kovahongonone vandje vevari, nowo mave zuvarisa ombuze ya Ndjambi oure womayuva eyovi nomasere yevari nomirongo hamboumwe ave nozombanda zomakutu.”
4 Ovahongonone vevari mba owo imbi omiti vivari vyomiṋinga, nu wina owo inga omamunine yevari, nga kurama komurungu wa Muhona wehi. 5 Nu tji pe nomundu ngu ma vanga okuvetjita otjipo, mamu zu omuriro movinyo vyawo nau seseta ovanavita na wo. Komuhingo mbwi auhe ngu ma vanga okuvetjita otjipo ma sokuṱa. 6 Owo ve nouvara okupata evaverwa, kokutja oruveze aruhe, owo ngunda amave zuvarisa ombuze ya Ndjambi, aku ha roko ombura. Owo wina ve nouvara okutjitukisa omeva aehe wotuharwi kutja ye rire ombinḓu; nu wina ve nouvara okutona ehi noviwonga ngamwa avihe, aruhe otja punga amave vanga.
7 Nowo tji va mana okuyandja omahongononeno wawo, ihi otjipuka tji matji piti morutjiva rwokehi yehi matji hanga ovita kuna wo. Notji matji ve toṋa natji ve zepa. 8 Oturova twawo matu saravara momuvanda wotjihuro hi otjinene mu mwa papererwe oMuhona wawo kotjikoroise wina. Notjisanekero tjena rotjihuro ho oSodom poo Engipte. 9 Nu imba ovandu oviwaṋa nomihoko avihe nomaraka aehe novanavisenginina avehe mave ya okutara oturova twawo oure womayuva yetatu nohinga, notwo katu nakuyandjerwa okupakwa. 10 Novature wokombanda yehi mave nyandere onḓiro yovahongonone vevari mba. Owo mave yoroka nave hindirasana oviyandjewa, orondu ovaprofete vevari mba aave hihamisa ovature wokombanda yehi tjinene. 11 Nu kombunda yomayuva nga yetatu nohinga ombepo yomuinyo ndja zira mu Ndjambi ya hitire mu wo, nowo arire tji va kurama oseka; nu avehe mbe ve munine va urumine tjinene. 12 Novaprofete vevari mba arire tji va zuu eraka enene ndi mari tja ku wo okuza meyuru: “Rondeye nguno!” Nowo va ronda keyuru motjikamba, ovanavita na wo ngunda amave tarere. 13 Nu moiri tjingeyo ndjo pa tjitwa omanyinganyingiro wehi omanene, norukondwa orutjamurongo rwotjihuro rwa wira, nu ape ṱu ovandu omayovi hambombari. Nu imba mba serwe ko va urumine tjinene nave hivirike ounene wa Ndjambi weyuru.
14 Nu “Owee” indji oitjavari ya kapita. Nu tara, indji oitjatatu mai ya tjimanga!
Ohiva oitjahambombari
15 Nu omuengeri outjahambombari arire tja posisa ohiva ye. Nu pa zuvaka omaraka omanene meyuru nga ravaerere aye tja: “Ouvara wokuhonaparera ouye nambano owa Muhona wetu nOmutwirisiwa we, neye ma honapara otja ombara aruhe nga ko nga aruhe.” 16 Tjazumba ovanene mba omirongo vivari na vane mbe ri pehi kovihavero vyawo vyouhona momurungu wa Ndjambi, arire tji va u onḓurumika nave rikotamene ku Ndjambi, 17 ave tja:
“Muhona Ndjambi, Omunamasaaehe, ngu u ri po nu ngu wa ri po!
Ma tutja okuhepa kutja, ove wa ungurisa omasa woye omanene
no honapara otja ombara!
18 Imba mbe he ri Ovajuda va pindikire tjinene,
mena rokutja oruveze rwomazenge woye tjinga arwe ya,
indwi oruveze ovakoke tji mave pangurwa.
Oruveze rweya rwokuyandja ondjambi
kovakarere voye, imba ovaprofete,
na kotjiwaṋa tjoye atjihe,
imba avehe mbe nondira kove,
ovanene novaṱiṱi.
Oruveze rweya rwokuyandeka imba mbe nyona ehi!”
19 Nondjuwo ya Ndjambi meyuru otji ya patururwa, nOtjipwikiro tjOmerikutiropamwe arire tji tja munika mu yo. Nu pa kara otutjeno twombura nomungunda notuṱuṱumo nomanyinganyingiro wehi nozombawe ozonḓeu zombura.
© Herero Revision Bible © Bible Society in Namibia, 2021.
