Omuprofete Elia nourumbu ounene
1 Omuprofete wena Elia, wa Tisbe mOgilead, wa tja nai kombara Ahab: “Tjimbe tja Muhona, Ndjambi wa Israel, ngu mbi karera, me ku raere kutja kape nokukara omueme poo ombura oure wozombura mbari poo ndatu nḓu maze yende, ngandu indu ami tji mba tja nao.”
2 Tjazumba Muhona otja tja nai ku Elia: 3 “Zapo poṋa mba, twende kuṱa komuhuka, nu u kaṱare popezu nokaruronḓu Kerit, ku ke ri komukuma wokomuhuka wa Jordan. 4 Mokaruronḓu ngo omu mo kanwa mo omeva, nami me rakiza komakwara kutja ye ku etere ovikurya poṋa mbo.”
5 Elia wa kara nonḓuviro komarakiza wa Muhona; neye wa ya na kakara pokaruronḓu Kerit. 6 Eye wa nwa omeva mokaruronḓu, nomakwara aaye mu etere omboroto nonyama omuhuka auhe nongurova aihe. 7 Kombunda yoruveze rworive inga okaruronḓu otji ka pwira, tjinga aku ha ri ombura.
Elia nomuhepundu mOsarepta
8 Muhona wa tja nai ku Elia: 9 “Nambano twende kotjihuro Sarefat popezu na Sidon, nu u kakare ngo. Ami mba rakiza komuhepundu ngwa tura ngo kutja e ku parure.” 10 Elia opa ira kOsarefat, neye tje ya pomuvero wotjihuro otja muna omuhepundu ngu ma nyanga oukuṋe. Elia wa tja nai ku ye: “Arikana, kendjietere omeva mbi nwe!” 11 Omuhepundu ngunda ama i okukaeta omeva, Elia wa ravaera na tja: “Arikana, ndji etera okahumburwa wina.”
12 Omuhepundu wa zira a tja: “Tjimbe tja Muhona, Ndjambi woye, ami hi nomboroto. Tji mbi na tjo, eke okuura roruhere orunḓunḓura monyungu, nomaze ouṱiṱi monya. Ami mbe ya okunyanga oukuṋe nokuutwara konganda kutja mbi keriterekere ami omuini nomuzandu wandje imbwi ouṱiṱi mbu tu na wo. Inga ongu maye rire omariro wetu omasenina, okuzambo matu ṱondjara.”
13 Elia wa tja nai ku ye: “O rikende, twende kaṱune omariro woye. Nungwari rutenga tereka omboroto onḓiṱi pu imbi mbi u na vyo, nu u i ete ku ami, nu tjazumba u riterekere otjiṋa omuini nomuzandu woye pu imbi mbi mavi hupu. 14 Orondu Muhona, Ndjambi wa Israel, ma tja nai: ‘Indwi oruhere orunḓunḓura kamaaru manuka ko monyungu, nomaze womiṋinga kamaaye henguruka ko monya, ngandu meyuva ndi, ami ngu mbi ri Muhona, mu me rokisa ombura.’ ”
15 Ingwi omuhepundu wa ya na katjita otja Elia tje mu raere, nowo va kara novikurya mbya yenene oure womayuva omengi. 16 Noruhere orunḓunḓura monyungu karu manukire ko, nomaze womiṋinga monya kaye hengurukire ko otja Muhona punga a kwizika notjinyo tja Elia.
17 Kombunda yoruveze rworive ingwi omuzandu womuhepundu wa vera; eye wa riririra ko omuvi tjinene, nu korusenina arire tja koka. 18 Nomuhepundu wa tja nai ku Elia: “Mukarere wa Ndjambi, okutjavi tji wa tjiti nai ku ami? Ove weya okuzemburukisa Ndjambi omauvi wandje nokutjita kutja omuzandu wandje a koke are?”
19 Nu Elia wa tja nai: “Ndji pa omuzandu woye!” Eye wa toora omuzandu pomatumbo waina, ne mu twara ketuwo rokombanda eye kaa kara, ne mu rarisa kombete. 20 Elia wa kumba neraka enene na tja: “Muhona, Ndjambi wandje, okutjavi ove tji wa tjiti otjiṋa otjitirise otja ihi komuhepundu ngwi? Eye wa kara notjari ne rikendere ami, nu nambano ove wa tjiti kutja omuzandu we a koke.” 21 Tjazumba Elia we rinanena kombanda yomuzandu potutatu na kumbu nai: “Muhona, Ndjambi wandje, kotora omuinyo womuzandu ngwi.” 22 Muhona wa zuvira ongumbiro ya Elia; ingwi omuatje wa kotora omuinyo na tutumukwa.
23 Elia arire tja pundisa ingwi omuzandu ku ina, na tja ku ye: “Tara, omuzandu woye wa tutumukwa rukwao.”
24 Nomuhepundu arire tja ziri na tja: “Nambano ami mba tjiwa kutja oove omukarere wa Ndjambi nokutja Muhona, tjiri, u hungira omambo we notjinyo tjoye.”
© Herero Revision Bible © Bible Society in Namibia, 2021.
