Oviyaha ovitenga vine
1 Nami e zuu eraka enene nda zire mondjuwo ya Ndjambi amari tja nai kovaengeri mba hambombari: “Twendeye mu katirire oviyaha hambombari mbye urisiwa nomazenge wa Ndjambi kombanda yehi!”
2 Nomuengeri ngwi omutenga arire tja i a katirira otjiyaha tje kombanda yehi. Nu mwa pitire omasena omahimise nomahihamise movandu mba mba ri notjihako tjotjipuka, na mu imba mbe rikotamenene kotjiserekarera tjatjo.
3 Okuzambo omuengeri ngwi outjavari a tirire otjiyaha tje mokuvare. Nomeva ya tjitukire aye sana nombinḓu yomundu ngwa ṱu. Novinamuinyo avihe mokuvare avi koka.
4 Nomuengeri ngwi outjatatu otja tirira otjiyaha tje mozonḓonḓu na motuharwi twomeva, novyo avi tjituka ombinḓu. 5 Narire tji mba zuu omuengeri ngwi ngwaa tjevere omeva, ama tja: “Ove, Omuyapuke, ngu u ri po nu ngu wa ri po, wa raisa kutja oove omusemba mozombanguriro zoye. 6 Orondu owo va tirahire ombinḓu yotjiwaṋa tja Ndjambi noyovaprofete, nove o ve hire ombinḓu. Nowo va sere okutjitwa nao.” 7 Nami e zuu eraka nda zire motjipunguhiro ari tja: “Muhona, Ndjambi, Omunamasaaehe, ozombanguriro zoye, tjiri, ozatjiri nozosemba!”
8 Nomuengeri outjaine wa tirira otjiyaha tje meyuva, noro ari yandjerwa okunyosa ovandu noupyu waro ounene. 9 Novandu va nyosiwa i oupyu ounene mbwi, nowo ave yamburura ena ra Ndjambi ngu nouvara kombanda yoviwonga mbi. Nungwari owo kave ritanaurire ko kourunde wawo nu ave he mu pe ko ondjozikiro.
Otjiyaha otjitjatano
10 Nokuzambo omuengeri outjatano a tirire otjiyaha tje kotjihavero tjouhona tjotjipuka. Nomuzororema arire tji weya kombanda youhona wotjipuka. Novandu ave rirumata omaraka wawo motjimbe tjomihihamo, 11 nave yamburura Ndjambi weyuru motjimbe tjomihihamo nomasena. Nungwari kave ve ritanaurire kozondjira zawo zouvi.
Otjiyaha otjitjahamboumwe
12 Nomuengeri outjahamboumwe otja tirira otjiyaha tje monḓonḓu onene Eufrat. Nonḓonḓu ai pwire, kokutja pe ṱunwe ondjira yozombara nḓu maze zu komuhuka. 13 Nami arire tji mba munu ozombepo ndatu ozohakohoke nḓaa ze munika otja ovisume. Ozo za pitire motjinyo tjotjitjupamuriro, na mu ihi tjotjipuka, na mu ihi tjomuprofete wovizeze. 14 Ozo ozombepo ozohakohoke nḓe tjita ovihimise. Ozombepo ndatu nḓa ze yenda kozombara azehe zouye okukezeworonganisira ovita mEyuva enene ra Ndjambi, Omunamasaaehe.
15 “Tareye, ami meya otja erunga! Omuṋingandu ingwi ngu ma kara katumba na ṱakamisa ozombanda ze, kokutja a ha ryanga mutundu na ha ṱohoṋi mokati kovandu.”
16 Nozombepo nḓa otji za woronganisira inḓa ozombara poṋa pu ku za Armagedon mOtjiheberi.
Otjiyaha otjitjahambombari
17 Tjazumba omuengeri outjahambombari arire tja tirire otjiyaha tje mevaverwa. Nu pa zuvakere eraka enene nda zire motjihavero tjouhona mondjuwo ya Ndjambi ari tja: “Tja tjitwa, pa pu!” 18 Nu pa kara otutjeno twombura, nomungunda womaraka, notuṱuṱumo, nomanyinganyingiro wehi omatirise. Nu kape na pu pa karere omanyinganyingiro wehi otja inga okuza kombutiro yomundu; inga onga ri omanyinganyingiro wehi omavi tjinene pu aehe! 19 Notjihuro hi otjinene tja haṋikire motupa tutatu, novihuro vyoviwaṋa avihe ovinavisenginina vya hahaurwa. Nu Ndjambi ka zembire ihi otjihuro otjinene Babilon, nu we tji pa okunwa omavinu motjinwino tje inga omavinu womazenge we omanene. 20 Omakoverwa aehe ya zengire, nozondundu azehe aze ha munika ko. 21 Nozombawe ozonene zombura, aihe ndji nondjinda yozokirograma omirongo vitano, za wira kombanda yovandu okuza kevaverwa. Novandu va yambururire Ndjambi mena rotjiwonga tjozombawe zombura hi, otjo tjinga atja ri otjiwonga otjihimise tjinene nao.
© Herero Revision Bible © Bible Society in Namibia, 2021.
