Daniel 7 - Herero Revision Bible (HRR)

DANIEL MA SEREKARERE OVIRIMUNIKISE VYE

Otjirimunikise tjovipuka vine

1 Mombura ondenga Belsasar tja rira ombara ya Babilon, ami, Daniel, mba rotere oruroto ne munu otjirimunikise mouṱuku. Ami mba tjanga oruroto ndwi, 2 nomatjangero waimbi mbi mba muna mouṱuku mbo owo nga:

Ozombepo za hinga okuza kominda avihe nu aze zunganisa okuvare. 3 Mokuvare ngwi mwa pita ovipuka vine ovinene, atjihe tji tja sana peke. 4 Otjipuka otjitenga tja sanene kongeyama, nungwari tja ri novivava tjimuna ovyonguvi. Ngunda ame tarere, ovivava avi porwa. Otjipuka tja yerururwa natji kuramisiwa kozombaze mbari tjimuna omundu. Notjo tja pewa omeripura otja owomundu.

5 Otjipuka otjitjavari aatji munika otja ongu aya kuramisiwa koviryo vyayo vyokombunda. Oyo ya ṱiza ozombati ndatu nomayo wayo, nu pa posa eraka nda tja nai ku yo: “Sekama u rye onyama onyingi otja pu mo sora!”

6 Ngunda ame tarere, pa munika otjipuka otjitjatatu. Otjo aatji munika tjimuna otjitotongwe, nungwari metambo ratjo mwa ri ovivava vine tjimuna ovivava vyonḓera, notjo tja ri noviuru vine. Otjo tja pewa ouvara wokuhonapara.

7 Ngunda ame tarere, arire tji pa munika otjipuka otjitjaine. Otjo tja ri otjinamasa tjinene, otjikumise notjitirise. Tja ṱukuṱura oviṋa mbi, tja zepa nomayo watjo omanene wovitenda, nu tjazumba atji tombo imbi mbya hupu po. Otjo tja sanene peke, tjiri, pu imbi ovipuka ovikwao, nu tja ri nozonya omurongo. 8 Ngunda ame tara kozonya, mba muna onya onḓiṱi amai piti mokati kainḓa ozongwao. Ozonya ndatu mu inḓa omurongo nḓa vazewa po, za zukurwa okuyandja oruveze ku indji onḓiṱi. Onya ndji onḓiṱi ya ri nomeho womundu, notjinyo tjaa tji hungire nokurihiva nomeritongamisiro.

Otjirimunikise tjomundu ngwa kurupa

9 Ngunda ame tarere, ovihavero vyouhona avi tuwa po. Umwe ngwa kurupa tjinene wa haamene kotjihavero tjimwe tjavyo. Ozombanda ze za ri ozombapa otja ovitutukende, nozondjise ze za ri otja omainya wozonḓu omakohoke. Otjihavero tje tjouhona tji tja tuwa koviryo vyomuriro aatji ruruma nomuriro, 10 nomupupo womuriro aa u pupu okuza mu tjo. Pa ri ovandu omayovi omengi mbaa ve mu karere, novandu omangete mba kuramene komurungu we. Ombanguriro ya uta nomahaameno wayo, nomambo aye patururwa.

11 Ami ee zuu onya indji onḓiṱi amai ritongamisa nokurihiva, nu ngunda ame tarere otjipuka hi otjitjaine otji tja ṱa, nomutundu watjo wa yumbwa motururumo, notwo atu u seseta. 12 Ovipuka mbi ovikwao vya yekwa ouvara wavyo, nungwari ovyo vya yandjerwa okuhupa okaruveze okaṱiṱi.

13 Mokati kovirimunikise mouṱuku mba muna otjiṋa tjaa tji munika tjimuna omundu. Eye wa kondorokwa i ovikamba nu aa ryama ku ingwi ngwa kurupire tjinene na tumbuziwa ku ye. 14 Eye wa pewa ouvara nondjozikiro nomasa wokuhonapara, kokutja ovandu voviwaṋa novomihoko avihe nowomaraka aehe ve rikotamene ku ye. Ouvara we mau karerere nga aruhe, nouhona we kamaau yanda ko.

Ovirimunikise mavi mangururwa

15 Ovirimunikse, mbi mba muna vye ndji urumisa, nami mba kurunga mombepo tjinene. 16 Ami mba ya komundu umwe ngwa kuramene mbo ne mu ningire kutja e ndji handjaurire avihe mbi. Eye otje ndji serekarerera omaheero wavyo. 17 Eye wa tja nai: “Ovipuka vine ovinene mbi ovyo omauhona ngu maye sekama kombanda yehi. 18 Nungwari otjiwaṋa tja Ndjambi wOkombandambanda matji pewa ouvara wokuhonapara nu matji u ṱakamisa aruhe nga aruhe.”

19 Ami mba vanga okutjiwa komurungu ouatjiri wotjipuka hi otjitjaine tji tji ha sanene ku imbi ovikwao, ihi otjipuka otjitirise tji tja ṱukuṱura ovikamburwa vyatjo nozonyara zongoporo nomayo wovitenda, nu tji tja tomba imbi mbya hupa po. 20 Nu mba vanga okutjiwa ouatjiri wozonya nḓa omurongo kotjiuru tjatjo nowonya ndja pitire kombunda nu ndja tjitire kutja ozonya nḓa ndatu ze homoke. Oyo ya ri nomeho notjinyo nu aa i rihivi nokuritongamisa. Onya ndji ya ri ondirise pozongwao.

21 Ngunda ame tarere, onya ndji ya tjita ovita notjiwaṋa tja Ndjambi nai tji havere. 22 Nu ingwi umwe ngwa kurupire tjinene weya na vatere otjiwaṋa tja Ndjambi wOkombandambanda okumuna ousemba. Oruveze rwa yenene kotjiwaṋa tja Ndjambi okupewa ouvara nokuhonapara.

23 Omahandjauriro ngu mba raerwa ya ri nai: “Otjipuka hi otjitjaine owo ouhona outjaine mbu mau kara kombanda yehi nu mbu mau kara omuhingo warwe pomauhona omakwao aehe. Owo mau nyanyaura ouye auhe, au u ṱukuṱura nau u tombo. 24 Ozonya omurongo ozo ozombara omurongo nḓu maze honaparere ouhona mbwi. Tjazumba ombara yarwe mai ya; oyo mai sana kwarwe ku inḓa ozondenga, nu mai isa mo ozombara ndatu mouhona. 25 Ombara ndji mai yamburura Ndjambi wOkombandambanda nu mai ṋiṋikiza otjiwaṋa tja Ndjambi. Oyo mai kondjo okurundurura omatwako wa Ndjambi nomayuva omanene; notjiwaṋa tja Ndjambi matji kara mouvara wayo oure wozombura ndatu nohinga. 26 Ombanguriro yeyuru mai haama okupangura, ai yeka ombara ndji ouvara wayo nai i yandeke oparukaze. 27 Ouvara nounene womauhona aehe kombanda yehi mau yandjewa kotjiwaṋa tja Ndjambi wOkombandambanda. Ouvara wouhona watjo kamaau yanda ko, novanauvara avehe kombanda yehi mave tji karere nave kara nonḓuviro ku tjo.”

28 Inga owo omaandero womaserekarero. Ami mba uruma tjinene nai nga otjivara tjomurungu wandje tji tja tanauka, nu mba ṱiza omambo nga aehe mongumumu.