Ovaisrael mave havere Ovakanaan
1 Ombara ya Arad, Omukanaan, ngwa turire mehi rokeyuva kokumuho, tja zuva kutja Ovaisrael mave ya nondjira ya Atarim, eye otje ve rwisa na huura tjiva. 2 Ovaisrael opu va tjitira omakwizikiro ku Muhona ave tja: “Ove tji wa yandja otjiwaṋa hi momake wetu, okutja matu nyono ovihuro vyawo okumana.” 3 Nu Muhona wa zuvira Ovaisrael na yandja Ovakanaan mouvara wawo. NOvaisrael ve ve havera puna ovihuro vyawo nave vi nyono, nave ruku poṋa mbo Horma, okutja Onyoneno.
Onyoka yongoporo
4 Nowo va womboroka okuza kondundu Hor nave twara ondjira, ndji yenda kOmuronga wOtuu okukakondoroka ehi rOvaedom. Nungwari mondjira otjiwaṋa tje rihahiza, 5 natji pirukire Ndjambi na Moses, atji tja: “Mwe tu pitisira tjike mOengipte tu ye okukokera mokuti onguza, mu mu hi novikurya nomeva? Eṱe twa ṱonḓi yovikurya oviyaukise mbi.”
6 Muhona wa hinda ozonyoka ozonauzuwo motjiwaṋa; nOvaisrael ovengi va rumatwa nave koka. 7 Notjiwaṋa otji tje ya ku Moses atji tja: “Twa katuka, tji twa unaunine Muhona na ove. Arikana tu kumbira ku Muhona a ise po ozonyoka nḓa.” Nu Moses wa kumbira otjiwaṋa. 8 Muhona arire tja tja ku Moses: “Ungura onyoka, nu u i twe kotjihenḓe. Nu auhe ngwa rumatwa na tara ku yo ma hupu.” 9 Moses otja ungura onyoka yongoporo ne i twa kotjihenḓe. Nu auhe ngwa rumatwa i onyoka na tara ku indji oyongoporo wa hupa.
Ouyenda morutjandja rwOvamoab
10 Ovaisrael va kayenda komurungu nave katona ozondanda zawo mObot. 11 Kombunda yanao va womboroka mObot nave katona ozondanda mOIje-Abarim mokuti onguza ku ku ri komuhuka wa Moab. 12 Okuzambo va ryama nave katona ozondanda poruronḓu Sered. 13 Okuzambo va kayenda rukwao nave katona ozondanda munda mbwina yonḓonḓu Arnon, ndji ri mokuti onguza ku kwa tandavara mehi rOvaamori. Onḓonḓu Arnon ondja ri omuruko pokati kOvamoab nOvaamori. 14 Opu pa hewa mEmbo rOvita vya Muhona: “Otjihuro Waheb mehi ra Sufa, nomikutu; nonḓonḓu Arnon, 15 nomaraukiro womikutu nge tandavara nga kotjihuro Ar, kuṱa komukuro wa Moab.”
16 Okuzambo va ka wondja nga kObeer. Oyo ndji ondjombo Muhona pa hungirira ku Moses a tja: “Woronganisa otjiwaṋa mbi tji pe omeva.” 17 Moruveze ndo Ovaisrael va imbura eimburiro ndi:
“Henga, ndjombo! Ngatu i
minike neimburiro!
18 Ndjombo, ovahivirikwa
ndji va hupura,
ovaingona votjiwaṋa ndji va
tumbura nokati kouhona nouti ouhoneno wayo.”
Va pita mokuti onguza okuyenda kOmatana, 19 nokuza kOmatana nokuyenda kOnahaliel nokuza kOnahaliel okuyenda kObamot, 20 nokuza kObamot okuyenda komukutu mbu ri mehi ra Moab, kondomba yondundu Pisga, ndja hungama nokuti onguza.
Ovaisrael mave havere ozombara ooSihon na Og
(Deu 2:26—3:11)21 Ovaisrael va tuma ovahindwa ku Sihon, ombara yOvaamori, nave tja: 22 “Arikana tu esa tu tuurungire mehi roye. Katu nakuyepa momahi woye wovikunino poo momivite; nomeva mozondjombo zoye katu nakunwa; matu ka wondja mondjira yombara nga tji twa piti mehi roye.” 23 Nungwari Sihon wa panḓa Ovaisrael okutuurungira mehi re; eye wa woronganisa otjimbumba tje tjovita, na i mokuti onguza okukatjakanena Ovaisrael; neye tje ya motjihuro Jahas, wa rwisa Ovaisrael. 24 Nungwari Ovaisrael va zepa ovanavita ovengi motjirwa, nave kambura ehi rawo ri rire ouini wawo, okuza konḓonḓu Jabok nga kOjaser tji tja ri omukuro wOvaamoni. 25 Ovaisrael va kambura ovihuro avihe vyOvaamori puna Hesbon novirongo avihe mbya kondoroka tjo nave tura mu vyo. 26 Hesbon tja ri otjihuro ohongora tja Sihon, ombara yOvaamori, ngwa rwisire ombara yOvamoab ndja ri po komurungu we na kambura ehi re arihe nga konḓonḓu Arnon. 27 Ovatangunune vomiano opu ve tjera nai:
“Indjeye kOhesbon, kombara ya Sihon!
Ngatji tungururwe nu ngatji yarurwe ko rukwao,
28 Orondu omuriro wa pita mOhesbon,
norururumo okuza motjiṱunga tja Sihon;
nau seseta otjihuro Ar tjOvamoab,
nau nyosa ozohungu za Arnon.
29 Owee kove, Moab!
Wa yandjwa konyoneno, tjiwaṋa tjomukuru
wotjisenginina Kemos; ngu tjita ovazandu ve
ovataure, novasuko ve ovahuurwa va Sihon, ombara yOvaamori.
30 Nungwari nai ozondekurona za nyonwa,
okuza ku Hesbon nga kOdibon; nokuza kOnashim nga kOnofah, popezu na Medeba.”
31 Ovaisrael opu va turira mehi rOvaamori. 32 Tjazumba Moses wa tuma ovarumendu okukahora otjihuro Jaser, nowo va kambura otjihuro hi novirongo vyatjo, nave ramba Ovaamori, mba turire mo.
33 Kombunda yanao Ovaisrael va tanauka nave hungama kObasan. Nu Og, ombara ya Basan, notjimbumba tje atjihe tjovita tje ve tjakanena mOedrei okuverwisa. 34 Muhona opa tjera nai ku Moses: “O mu tira! Ami mbe mu yandja puna otjiwaṋa tje atjihe nehi re mouvara woye; ove tjita ku ye otja tji wa tjita ku Sihon, ombara yOvaamori, ngwa turire mOhesbon.” 35 Ovaisrael otji va zepa Og novazandu ve notjiwaṋa tje atjihe nga tji pe ha hupire omundu; nowo va kambura ehi re ri rire ouini wawo.
© Herero Revision Bible © Bible Society in Namibia, 2021.
