Numeri 33 - Herero Revision Bible (HRR)

Ovikuturiro vyOvaisrael mokuti onguza

1 Imbi ombi ri ovikuturiro vyOvaisrael tji va za mOengipte otja kovimbumba vyawo vyovita kehi yomananeno wa Moses na Aron. 2 Otja komarakiza wa Muhona Moses wa tjanga ena rotjirongo atjihe ngamwa pu va tura.

3 Ovaisrael va tjinda mOengipte meyuva oritjamurongo na yetano komueze omutenga wombura, meyuva rokombunda yOpaska. Mondjamo ya Muhona owo va kumuka okuza motjihuro tja Ramses, momurungu wOvaengipte avehe, 4 mbaa ve paka inga omaveri wawo, nga ṱa i Muhona. Komuhingo mbwi Muhona otja raisa ounene womasa we koomukuru vawo vovisenginina.

5 Ovaisrael va tjinda mOramses nave katona ozondanda zawo mOsukot. 6 Tji va za mOsukot va katona ozondanda mOetam, tji tja ri komukuro wokuti onguza. 7 Okuza mbo va tanauka okuyenda kOpi-Hahirot, tji tja ri komuhuka wa Baal-Sefon; nu va katona ozondanda popezu na Migdol. 8 Owo va tjinda mOpi-Hahirot ave tuurunga Omuronga wOtuu mokuti onguza. Tji va za nokukayenda oure womayuva yetatu okutuurunga okuti onguza Etam va katona ozondanda mOmara. 9 Okuzambo va ya kOelim, ku kwa ri otuharwi omurongo na tuvari, nomiti vyomavare omirongo hambombari, nave katona ozondanda koṋa ngo.

10 Nowo va tjinda mOelim nave katona ozondanda meṋe yOmuronga wOtuu. 11 Okuzambo va katona ozondanda mokuti onguza Sin. 12 Tjazumba va katona ozondanda mOdofka. 13 Kombunda yanao va tjinda nave katona ozondanda mOalus. 14 Okuzambo va katona ozondanda mOrefidim; nungwari koṋa ngo kakwa ri omeva kotjiwaṋa okunwa.

15 Nu tji va tjinda mOrefidim, va katona ozondanda mokuti onguza Sinai movirongo mbi: 16 OoKibrot-Hataawa, 17 na Haserot, 18 na Ritma, 19 na Rimon-Peres, 20 na Libna, 21 na Risa, 22 na Kehelata, 23 na pondundu Sefer, 24 na Harada, 25 na Makhelot, 26 na Tahat, 27 na Terak 28 na Mitka, 29 na Hasmona, 30 na Maserot, 31 na Bene-Jaakan, 32 na Hor-Gidgad, 33 na Jotbata, 34 na Abrona, 35 na Ezion-Geber, 36 na mokuti onguza Sin, okutja Kades, 37 na pondundu Hor, ndji ri komukuro wehi ra Edom.

38 Nomupristeri Aron wa ronda kondundu Hor otja komarakiza wa Muhona, na kakokera ngo, meyuva etenga komueze outjatano wombura oitjamirongo vine kombunda yOvaisrael tji va pita mOengipte. 39 Nu Aron wa ri notjiwondo tjozombura esere rimwe nomirongo vivari nandatu tja kokera kondundu Hor.

40 Ombara ya Arad ndja turire keyuva kokumuho kwehi ra Kanaan ya zuva kutja Ovaisrael mave ya.

41 Nowo va womboroka okuza pondundu Hor nave katona ozondanda mOsalmona na movirongo mbi: 42 Punon, 43 na Obot, 44 na Ije-Abarim mehi ra Moab, 45 na Dibon-Gad, 46 na Almon-Diblataim, 47 na pozondundu, popezu na Nebo, 48 na motutjandja twa Moab, ponḓonḓu Jordan, popezu na Jeriko. 49 Nowo va katona ozondanda ponḓonḓu Jordan okuza kObet-Jesimot nga kOabel-Sitim motutjandja twa Moab.

50 Nu Muhona wa hungira ku Moses motutjandja twa Moab ponḓonḓu Jordan popezu na Jeriko, na tja: 51 “Raera kOvaisrael nu itja nai ku wo: ‘Tji mamu kondo Jordan okuhita mehi ra Kanaan 52 rambeye ovature avehe vehi ndi, nu mu nyanyaure oviserekarera vyawo vyomawe novyovihamburwa, nopoṋa pawo apehe pu ve rikotamenena kovisenginina. 53 Kambureye ehi ndi, mu ture mu ro; orondu ami me ri yandja ku eṋe ri rire ouini weṋu. 54 Haṋeye ehi ndi nomaumbiro wozohanga momihoko na mozonganda zeṋu. Komuhoko omunene yandjeye ko otjirumatwa otjinene, nu komuhoko omuṱiṱi yandjeye ko otjirumatwa otjiṱiṱi. 55 Nungwari tji mu hi nakuramba ovature vehi ndi, imba mbu mamu hupisa mokati kawo mave karira tjimuna omakuiya momeho weṋu, nozondungo mozombati zeṋu, nowo mave mu rwisire mehi mu mamu tura. 56 Nu tji mu hi nakuveramba, ami memu nyono otja tji mbe ripura okuvenyona.’ ”