Ozombura Ovaisrael nḓu va kara mokuti onguza
1 “Tjazumba twa tanauka natu hungama okuti onguza mondjira yokuyenda kOmuronga wOtuu, Muhona punga e ndji raerere, natu tambatamba mehi rozondundu ra Seir oure womayuva omengi tjinene.
2 “Nu Muhona we ndji raera a tja: 3 ‘Opuwo, nambano mwa tambatamba orure mozondundu nḓa. Vingurukireye kuṱa keyuva kokunene. 4 Nu rakiza nai kotjiwaṋa: Eṋe nambano mamu tuurunga orukondwa rwehi romihoko vyeṋu inḓa ozondekurona za Esau mbe tura mOedom. Nowo mave mu tira; nungwari ritjevereye nawa! 5 Amu tjiti ovita kuna wo, orondu ami himee mu pe ehi rawo, nangarire ouparanga mbu ṱeki pombaze, tjinga amba yandja ozondundu za Edom ku Esau ze rire ouini we. 6 Ovikurya mamu randa ku wo notjimariva kutja mu rye, nomeva rukwao kutja mu nwe.’ ”
7 “Orondu Muhona, Ndjambi woye, we ku sera ondaya moviungura avihe vyomake woye. Eye wa tjiwa omakayendero woye mokuti ngwi okunene nonguza; nu Muhona, Ndjambi woye, wa kara puna ove oure wozombura omirongo vine; nu ko notjiṋa tji wa hepere.
8 “Otji twa kayenda rukwao, ohumburuko nomihoko vyetu, inḓa ozondekurona za Esau nḓe tura mOseir, atu isa ondjira, ndji tuurunga orutjandja, ndji za kOelat na Esjon-Geber; tjazumba atu tanauka natu kayenda komurungu mondjira, ndji hungama okuti onguza kwa Moab. 9 Muhona arire tja tja ku ami: ‘O rwisa Ovamoab, nu o tjiti ovita kuna wo! Ami hi nokukupa ehi rawo ri rire ouini woye, tjinga amba yandja otjihuro Ar kozondekurona za Lot tji rire ouini wazo.’ ”
10 Rukuru Ovaemi, ihi otjiwaṋa otjinene tji tja takavarere nu tjovandu ovatonga motutu tjimuna Ovaanakim, va turire motjihuro Ar. 11 Owo wina ave varwa otja Ovarefai tjimuna Ovaanakim; nungwari Ovamoab ave ve isana kutja Ovaemi. 12 Nu Ovahori wina rukuru aave tura mOedom; nungwari ozondekurona za Esau ze ve rambere mouini wawo naze ve yandeke, nozo za katura mehi rawo tjimuna Ovaisrael tji va tjitire kovanavita na wo mba turire mehi Ovaisrael ndi va perwe i Muhona.
13 “Okuzambo otjitwa kakonde onḓonḓu Sered otja Muhona tjetu raera. 14 Nu oruveze rwomatjindiro wetu okuza kOkades-Barnea nga komakondero wetu wonḓonḓu Sered rwa ṱeka pozombura omirongo vitatu na hambondatu, nga omuhoko auhe wovarumendu ovarwe wovita tji wa kokera mozondanda otja Muhona pe ve yanena. 15 Nu Muhona wa nyengwa ovitjitwa vyawo ne ve yandeke avehe mozondanda.
16 “Novarumendu ovarwe avehe wovita tji va koka, 17 Muhona arire tja tja nai ku ami: 18 ‘Ove ndino mo kondere omuruko wehi ra Moab potjihuro Ar, 19 no kavaza popezu nehi rOvaamoni. O ve rwisa, nu o tjiti ovita kuna wo! Ami hi nakukupa orukondwa rwehi rawo ru rire ouini woye, tjinga ambe ri yandja kozondekurona za Lot ri rire ouini wazo.’ ”
20 Orukondwa ndwi aa ru varwa otja ehi rOvarefai mba turire mo rukuru. NOvaamoni aave ve isana kutja Ovasamsumi. 21 Owo va ri otjiwaṋa otjinene tji tja takavarere nu tjovandu ovatonga motutu tjimuna Ovaanakim. Nungwari Muhona wa yandisire Ovarefai momeero wOvaamoni; komuhingo mbwi Ovaamoni otji ve ve ramba mehi, nave yaruka momaturiro wawo. 22 Muhona wa tjitire omuhingo tjingewo kOvaedom, ozondekurona za Esau, nḓa turire mOseir. Eye wa yandekere Ovahori momeero wazo; komuhingo mbwi ozondekurona za Esau otji ze ve ramba mehi, nave yaruka momaturiro wawo nga ku ndinondi. 23 Nu Ovakaftori, mba zire kokakoverwa Kaftor va yandekere Ovaavi, mba turire movirongo pekepeke nga kotjihuro Gasa, nave yaruka momaturiro wawo.
24 “ ‘Rirongereye mu kakonde onḓonḓu Arnon! Tara, ami me yandja Sihon, ombara ya Hesbon, Omuamori, nehi re mouvara woye. Mu rwisa u kambure ehi re. 25 Okuza ku ndinondi me tjiti kutja ovandu avehe mbe ri kehi yeyuru ve ku tire, kokutja owo tji mave zuu ondangu yoye ve hwinḓe nu ve zezerisiwe i omburuma.’
Ovaisrael mave havere ombara Sihon
(Num 21:21-30)26 “Tjazumba mba hinda ovatumwa okuza mokuti onguza kwa Kedemot ku Sihon, ombara ya Hesbon, nomambo wohange ngu maye tja nai: 27 ‘Ndji esa mbi tuurungire mehi roye. Ami me ka wondja mondjira uriri, hi nokuyepa kokunene poo kokumuho. 28 Ovikurya mbi matu ri nomeva ngu matu nu eṱe matu sutu. Ihi tji matu vanga okongwi okutja u twese to tuurungire mehi roye, 29 otja ozondekurona za Esau, nḓe tura mOseir, nOvamoab mbe tura mOar punga ava tjita nga tji me kakonda Jordan nokukahita mehi Muhona, Ndjambi wetu, ndi ma vanga okuyandja ku eṱe.’
30 “Nungwari Sihon, ombara ya Hesbon, ka vangere kutja tu tuurungire mehi re; orondu Muhona, Ndjambi woye, tjinga a rangarangisa ombepo ya Sihon na kukutisa omutima we kutja e mu yandje mouvara woye otja tji pe ri ndinondi. 31 Nu Muhona opa tjera nai ku ami: ‘Tara, ami mba utu okuyandja Sihon nehi re mouvara woye; hakahana okuhita mehi u kerikambure.’
32 “Sihon otja sekama notjiwaṋa tje atjihe okututjakanena nokuturwisira mOjahas. 33 Nu Muhona, Ndjambi wetu, we mu yandja mouvara wetu, notji twe mu havera, eye novazandu ve notjiwaṋa tje atjihe. 34 Moruveze tjingero ndo twa kambura ovihuro vye avihe, natu nyono otjihuro ngamwa atjihe, ovarumendu novakazendu novanatje wina nga tji pe ha ningire omundu ngwa taura. 35 Ovinamuinyo porwavyo ombi twa huura, natu pundu ovihuro. 36 Okuza kOaroer, tji tji ri komukuma wonḓonḓu Arnon, notjihuro tji tji ri momukutu nga kOgilead kapa ri otjiṱunga tji tji ha kamburirwe i eṱe; Muhona, Ndjambi wetu, wa yandjere avihe mouvara wetu. 37 Nu popezu nehi rOvaamoni porwaro okutu heere, okutja okomukuma auhe wonḓonḓu na ku avihe Muhona, Ndjambi wetu, ke tu tjaera.
© Herero Revision Bible © Bible Society in Namibia, 2021.
