Omanyoneno wehi ra Moab
1 Muhona Omunamasaaehe ma hungirire Moab nai:
“Owee kotjiwaṋa tja Nebo,
otjihuro tjatjo tja nyonwa!
Kiriataim tja huurwa,
otjiwaṋa tjatjo otjinamasa tja haṋewa,
novandu vatjo va ṱisiwa ohoṋi;
2 ondangu ya Moab kai tji po;
mOhesbon owo va zuvasana okuyandeka ovandu va Moab.
Otjihuro Madmen matji mwinisiwa;
ovimbumba vyovita mavi sekamene tjo.
3 Purateneye! Ovandu va Horonaim mave ravaere amave tja:
‘Outwe! Omanyoneno!’
4 “Moab ra nyonwa;
ondjuriro yaro mai zuvaka nga kOsoar.
5 Zuveye ombosiro yokurira mondjira,
ndji ronda kOluhit,
ondjuriro yomerihahiziro mondjira,
ndji ṱuruka kOhoronaim.
6 Ovandu mave tja nai:
‘Hakahaneye mu taurise ominyo vyeṋu!
Tupukeye otja ozongoro ovindandi mokuti onguza!’
7 “Moab, ove we riyameka
komasa woye na koutumbe woye,
nungwari nambano nangarire ove mo haverwa;
omukuru woye Kemos ma twarewa kouhuura
puna ovaingona novapristeri ve.
8 Kape notjihuro tji matji yamwa;
otjana norutjandja mavi rire ongaango.
Ami, ngu mbi ri Muhona,
owami ngu mba hungire.
9 Zikireye Moab ewe reyendo;
oro mari nyonwa oparukaze.
Ovihuro vyaro mavi isiwa omatundu,
nu kape na umwe ngu ma vanga okutura mu vyo rukwao.”
10 Nga sengwe omundu ngu ungura oviungura vya Muhona nomutima wotjirweyo. Nga sengwe omundu ngu tjaera engaruvyo re komatirahiro wombinḓu!
Ovihuro vyehi ra Moab mavi nyonwa
11 Muhona wa tja nai: “Moab aruhe ra kara mohange, nu ka rina pu ra huurwa. Moab ri ri otja omavinu nga porimana, nu nge ha isirwe mo motjikuve tjimwe nokutirirwa mu tjarwe. Oruho rwawo karu na pu rwa zunḓaka, nu ye tjata nawa otja indu aruhe.
12 “Nambano tareye, omayuva maye ya ami mu me tumu ovandu okutirira Moab tjimuna omavinu. Owo mave tirahi ovikuve vyaro vyomavinu, nave vi nyaa. 13 Ovamoab mave ṱohoṋi nomukuru wawo Kemos tjimuna Ovaisrael tji va ṱire ohoṋi na Betel ku ve riyamekere.”
14 “Varumendu va Moab, okutjavi tji mu tja oweṋe omapenda,
ovarwe ozombanḓe, ozombangaṋe movita?
15 Moab novihuro vyaro vya nyonwa;
ovazandu varo omitanda va ṱa.
Owami Ombara, Muhona Omunamasaaehe,
nu mba hungire.
16 Omanyoneno wa Moab yeri popezu;
oumba waro mau ya tjimanga.”
17 “Ririreye otjiwaṋa ho, eṋe mbu mwa tura popezu,
amuhe mbu mu tjiwa ondangu yatjo.
Itjeye nai: ‘Okati katjo kouhona okanamasa ka teka,
ondjozikiro nomasa watjo kavi tji po.’
18 Eṋe mbu mwa tura mOdibon,
raukeye okuza kotjirongo tjeṋu tjondjozikiro,
nu mu haame pehi moruuma,
omunyone wa Moab eye ngwi,
nu wa nyono oviṱunga vya Dibon.
19 Eṋe mbu mwa tura mOaroer,
kurameye mondjira nu mutjevere;
pureye ovataure,
mu konḓonone mu wo kutja pa tjitwa tjike.
20 Owo mave ziri nai: ‘Moab ra u,
rireye ro;
oro ra yambururwa.
Tjiviseye meṋe yonḓonḓu Arnon
kutja Moab ra nyonwa!’ ”
21 “Ombanguriro ye ya kovihuro vyomorutjandja mbi: OoHolon na Jahas na Mefaat, 22 na Dibon na Nebo na Bet-Diblatajim, 23 na Kiriataim na Bet-Gamul na Bet-Meon, 24 na Kerijot na Bosra. Ombanguriro ye ya kovihuro avihe vya Moab, kokure nopopezu. 25 Omasa wa Moab ya ṱukuṱurwa, ouvara waro wa nyonwa. Ami, ngu mbi ri Muhona, owami ngu mba hungire.”
Moab mari susuparisiwa
26 Muhona wa tja nai: “Purukiseye ehi ra Moab nga tji mari rangere movikungo vyaro orini, nu nga ovandu tji mave ri yoro, orondu oro tjinga are ndji pirukira. 27 Moab, mo zemburuka, indu tjiyo nyekerere otjiwaṋa tja Israel are? Ove iyo tji vara aayo otjo tja kamburirwe puna otjira tjovapunde.
28 “Eṋe, vandu, mbu mwa tura mehi ra Moab, zamweye movihuro vyeṋu! Katureye momatjo! Kareye otja onguti, ndji tunga otjiruwo tjayo morupoko. 29 Moab re ritongamisa tjinene. Eṱe twa zuva omeritongamisiro nourangaranga nomerihiviro nokurivara kwovandu. 30 Ami, ngu mbi ri Muhona, me tjiwa ourangaranga wawo. Omerihiviro wawo oviṋa uriri, nozondjito zawo kamaaze karerere. 31 Ami otji me ririre Ovamoab avehe novandu va Kir-Heres. 32 Ami me ririre ovandu va Sibma tjinene pu imba ova Jaser. Tjihuro Sibma, ove u ri otja omuvite; otutavi twoye twa tandauka nga munda mbwina yOmuronga wOmongwa, nu twa ya nga kOjaser. Nungwari ovihape vyoye vyoruteṋi nomapunda woye womandjembere vya nyonwa. 33 Ondjoroka nenyando vya isiwa po mehi ehapise ra Moab. Ami mba pata omapupiro womavinu movikameno; kape na ngu ma hanga omavinu nu ngu ma ravaere nondjoroka.
34 “Ovandu va Hesbon na Eleale mave uru, nomauriro wawo maye zuvaka nga kOjahas; maye zuvaka kovandu va Soar nga kOhoronaim na Eglat-Selisija. Nandarire omuramba Nimrim wa pwira. 35 Ami me tjaere ovandu va Moab okupunguha ozombunguhiro poṋa pomerikotameneno wawo, nokutwimisira oomukuru vawo ovyomoro omuwa. Ami, ngu mbi ri Muhona, owami ngu mba hungire.
36 “Omutima wandje otji wa ṱoruhoze na Moab novandu va Kir-Heres tjimuna omundu ngu ma nyanda eimburiro rombakero kokahiva, orondu oviṋa avihe, mbi va ri na vyo, vya pandjara. 37 Avehe vawo ve rihora oviuru nave rikurura otuyezu. Owo avehe ve ritjanga ozondja komake nave zara ozombanda zomakutu. 38 Komitutu vyozondjuwo azehe za Moab na momivanda avihe kamu notjiṋa posi yomaririro porwe, ami tjinga amba teya Moab tjimuna otjikuve tji tji ha vangwa i omundu. 39 Moab ra piziwa nari tupuka. Ureye! Moab ra yambururwa; ra rire etundu, noviwaṋa avihe mbye ri kondoroka mavi ri nyekerere. Ami, ngu mbi ri Muhona, owami ngu mba hungire.”
Kape nondauriro kOmoab
40 Muhona wa kwizika kutja otjiwaṋa tjorive matji raukire kombanda ya Moab tjimuna onguvi ndja nyaturura ovivava vyayo. 41 Ovihuro noviṱunga mavi kamburwa. Meyuva ndo ovarwe va Moab wovita mave urumisiwa tjimuna omukazendu mombandukiro. 42 Moab mari nyonwa, nu kari nokuuhara amari rire otjiwaṋa rukwao, orondu oro re ndji pirukira. 43 Ondirisiro notuhoro nozombate mavi undju ovandu va Moab. Muhona wa hungire. 44 Ngamwa auhe ngu ma kondjo okutaura ondirisiro ma wire motuhoro nu ngamwa auhe ngu ma piti motuhoro ma kamburwa mozombate, orondu Muhona ma eta oviṋa mbi kombanda ya Moab momayuva womberero yaro. 45 Ovataure ovehinombatero ve kondja okumuna ondjamo mOhesbon, ihi otjihuro tji tja honaparererwe otjikando tjimwe i ombara Sihon, nungwari otjo tji ri motururumo. Omuriro wa ruruma nga komiruko na kozondomba zozondundu zehi rOvamoab mba suvera ovita. 46 Owee kovandu va Moab! Otjiwaṋa tji tji rikotamena ku Kemos tja yandekwa, novazandu novasuko vatjo va huurwa.
47 Nungwari momayuva ngu maye yaMuhona ma ṋingaparisa Moab rukwao. Avihe mbi Muhona ombya tja mavi tjitwa kOmoab.
© Herero Revision Bible © Bible Society in Namibia, 2021.
