Ombanguriro kOvaedom
1 Indjeye popezu, viwaṋa vyomihoko avihe! Woronganeye mu puratene! Ouye auhe na imbi avihe mbi ri mu wo ngavi ye nguno vi puratene. 2 Muhona wa pindika nomihoko avihe, nu wa ṱomazenge novimbumba vyavyo avihe vyovita. Eye we vi pangura konyoneno, nu we vi yandja kokuṱa. 3 Oturova twavyo katu nokupakwa, nungwari matu saravara mbo tu wore nokuṋuka; nozondundu maze seraerisiwa i ombinḓu. 4 Eyuva nomueze nozonyose mavi nyanyaurwa, nga tji vya rire oruuma. Evaverwa mari mangwa tjimuna embo emangwa; nozonyose maze u otja omaso womuvite poo womukuyu ngu maye wire pehi.
5 Muhona wa rongera engaruvyo re meyuru, nambano oro mari tono Edom, ihi otjiwaṋa eye tja pangura konyoneno. 6 Engaruvyo ra Muhona mari vandekwa nombinḓu yatjo, nu mari toto omaze wozonḓura zatjo tjimuna ombinḓu yozondjona noyozongombo, nozonḓura zozondwezu zozonḓu ndu maze punguhwa. Muhona ma punguhire ombunguhiro ndji motjihuro Bosra; eye ma tjiti otjiṱiro otjinene mehi ra Edom. 7 Ovandu mave u otja ovimburu nozondwiyona zozongombe, nehi mari seraerisiwa i ombinḓu, nu mari ura nozonḓura. 8 Indwi ondu ri oruveze Muhona mu ma yama Sion, nu mu ma sutisa ovanavita na tjo.
9 Omeva moturonḓu twa Edom maye tjituka okurira ondombo, nehi mari rire ozosurungu. Ehi arihe mari pi otja ondombo. 10 Oro mari pi ouṱuku nomutenya, nomuise mau twima ngo nga aruhe. Ehi mari kara ongaango okuza komuhoko nga komuhoko, nu kape na ngu ma ryanga okutuurunga mu ro rukwao. 11 Ozonḓera zatjihongo nouṱahoṋi mavi kara mehi ndi, novisiwi nomakwara mavi tura mu ro. Muhona ma tjiti kutja oro ri rire ongaango tjimuna indu tji ra ri rutenga komeho yombutiro youye. 12 Kape tji nokukara ombara, ndji mai honaparere ehi, novanane avehe mave yanda. 13 Omakuiya nominanyiva mavi hapa mozondjuwo azehe zouhona na moviṱunga ovizeu; nozombandje nozombo mavi tura mu vyo. 14 Ozohakaṋe nozombungu maze ryanga mo, novitjerenge mavi ravaerasana. Otjiruru matji ya mo ama tji paha poṋa pu matji suva. 15 Ovisiwi mavi tungu mo oviruwo vyavyo, avi kwata omai, avi pamuna ouzerona navi u korere mo. Ozonguvi maze wongarere mo azehe amaze kongorerasana.
16 Konḓononeye membo ra Muhona nu mu rese kutja mari hee tjike. Kape na tjimwe tjovinamuinyo mbi tji matji zengi, nu kape na tjimwe tji tji hi nokukara notjikwao. Muhona wa rakiza kutja pe kare nao; eye omuini ongu me vi woronganisa. 17 Muhona ongu me vi haṋene ehi, nu ongu ma yandja otukondwa ku vyo avihe. Ovyo mavi tura mehi okuza komuhoko nga komuhoko, noro mari rire ouini wavyo nga aruhe.
© Herero Revision Bible © Bible Society in Namibia, 2021.
