Ondoṋeno ya Muhona moviwaṋa
1 “Owaṋi ngwi ngu ma zire kotjihuro Bosra mOedom? Owaṋi ngwi erenga ngwa zara ozombanda ozoserandu pyu, nu ngu ma ka wondja mouvara na momasa?”
“Owami ngwi ngu mbi ri Muhona, ngu mbi nomasa okuyama, nu ngu meya okuzuvarisa ousemba wandje.”
2 “Okutjavi ozombanda zoye tji ze ri ozoserandu pyu nai tjimuna inḓa zomurumendu ngu yata omandjembere okuungura omavinu?”
3 Muhona ma ziri a tja: “Ami erike mba tomba oviwaṋa otja omandjembere tji ye yatwa, nu kapa ri otjiwaṋa tjimwe tji tje ya okundjivatera. Ami mbe vi tomba momazenge wandje, nombinḓu yavyo ya rimba ozombanda zandje azehe. 4 Ami mba tya kutja oruveze rwokuyama otjiwaṋa tjandje rwa yenene, orwo rwa ri oruveze rwokuvera ovanavita na tjo. 5 Ami mba kumwa tji mba yevayeva ne munu kutja kape nomundu okundjivatera. Nungwari omazenge wandje ye ndji zeuparisa, nami omuini mba tjita ondoṋeno. 6 Momazenge wandje ami otji mba tomba oviwaṋa avihe ne vi nyanyaura. Nu mba tirira ombinḓu yavyo mehi.”
Ouwa wa Muhona ku Israel
7 Ami me serekarere ouwa wotjari tja Muhona,
ami me mu tangere imbi avihe mbye tu tjitira.
Eye wa sera otjiwaṋa tja Israel ondaya okuura
mena rounyaṋutima norusuvero rwe orukarerere.
8 Muhona wa tja nai: “Owo otjiwaṋa tjandje; nu kave nokundjiwovisa.” Eye otje ve yama 9 kozombamisiro zawo azehe. Kari omuengeri, nungwari ari Muhona erike ngwe ve yama. Eye we ve yama morusuvero na motjari tje. Eye aruhe ee ve tjevere momayuva aehe nga kapita, 10 nungwari owo ve mu pirukirire nave ṱisa Ombepo ye Ondjapuke oruhoze. Muhona otja rira omunavita na wo ne ve rwisa.
11 Nungwari owo ve rizemburuka nomayuva omakuru wa Moses, omukarere wa Muhona, notji va pura ave tja: “Muhona nambano u ri pi, ingwi Muhona ngwa yama omurise wotjiwaṋa tje mokuvare? Muhona ngwa yandja Ombepo ye ku Moses, u ri pi? 12 Muhona u ri pi ngwa tjita oviṋa ovinene nomasa we, e ri kokunene kwa Moses, nu ngwa haṋa omeva womuronga momurungu wawo kutja e riyetere ondangu yaaruhe?”
13 Muhona u ri pi, ngwe ve kondisa oupupu moukoto womuronga tjimuna ozonḓuno ndu maze tuurunga okuti onguza? 14 Otja orupanda rwozongombe punga amaru risiwa motjana, Muhona opunga ama yandja orusuvo kotjiwaṋa tje. Eye otja hongorera otjiwaṋa tje ne riyetere ondjozikiro kena re.
Ongumbiro yotjari noyombatero
15 Muhona, ngo tji tara pehi ku eṱe okuza meyuru mu wa tura mouyapuke na mounene woye. Hapo omerikendero woye na eṱe nomasa woye omahimise ye ri pi? Orusuvero rwoye orunene nounyaṋutima woye vi ri pi? O kara kokure na eṱe! 16 Oove ngu u ri Tate. Ootate mukururume Abraham na Jakob kave nokututjiwa, nungwari ove, Muhona, oove ngu u ri Tate. Ena roye “Oove Ndjambi wetu” okuza korukuru. 17 Okutjavi tji mo tu tarere ama tupuka ozondjira zoye? Okutjavi tji mo tu tjiti ovirangaranga nai, nga tji matu poka kove? Kotokera imba mbe ku karera na ihi otjiwaṋa aruhe tji tji ri otjoye.
18 Eṱe, ihi otjiwaṋa tjoye otjiyapuke, twa rambwa i ovanavita na eṱe oruveze rworive: Owo va tomba oruveze rwoye romerikotameneno. 19 Ove u tu zara aayo ko na indu wa ri omuhonapare wetu, aayo katu na indu twa ri otjiwaṋa tjoye.
© Herero Revision Bible © Bible Society in Namibia, 2021.
