Lukas 21 - Herero Revision Bible (HRR)

Otjiyandjewa tjomuhepundu omusyona

1 Jesus tja yevayeva wa muna ovatumbe amave yumbu oviyandjewa vyawo motjiwongero tjoviyandjewa. 2 Eye wina wa muna omukazendu omuhepundu omusyona tjinene ama yumbu oumariva uvari wongoporo. 3 Jesus wa tja: “Tjiri, me mu raere, omuhepundu omusyona ngwi wa yumbu ovingi povandu avehe, mba yumbu. 4 Orondu ovandu avehe va yandja oviyandjewa vyawo okuisa mu imbi mbi va hupisa koutumbe wawo; nungwari ingwi omuhepundu omusyona wa yandja ohupiro ye aihe.”

Jesus ma hungire omanyoneno wondjuwo ya Muhona

(Mt 24:1-2Mk 13:1-2)

5 Ovahongewa tjiva aave hungire ondjuwo ya Muhona, okutja ongongo yayo tji ya harekwa nomawe omahuze noviyandjewa mbya punguhirwa Ndjambi. Nungwari Jesus wa tjere: 6 “Avihe, mbi mamu munu, maku ya omayuva mu mu hi na maku sewa ewe nangarire rimwe kombanda yekwao; ondjuwo aihe mai haṋewa.”

Omaumba nomatatumisiro

(Mt 24:3-14Mk 13:3-13)

7 Owo ve mu purire ave tja: “Muhonge, oviṋa mbi mavi tjitwa ruṋe? Nu otjiraisiro matji rire tjiṋe oviṋa mbi tji mavi utu okutjitwa?”

8 Jesus wa zirire a tja: “Ṱakamiseye nawa; amu wovisiwa. Ovengi mave ya amave ritjindi aayo mave hungire mena randje, ave tja: ‘Owami ngu mbi ri Kristus,’ nokutja: ‘Omayuva ya yenene!’ Nungwari amu ve kongorere ko. 9 Amu tira tji mamu zuu ombosiro yovita noyezunganeno; oviṋa mbi mavi sokutjitwa rutenga, nungwari ovyo kavi nakuheya kutja inga omaandero ye ya.”

10 Eye wa hungira komurungu a tja: “Otjiwaṋa tjimwe matji sekamene otjiwaṋa otjikwao, nouhona umwe mau rwisa ouhona oukwao. 11 Mamu kara omanyinganyingiro wehi omatirise, nondjara nomitjise momahi pekepeke; maku munika oviṋa ovitirise noviraisiro ovinene mevaverwa. 12 Nungwari oviṋa avihe mbi ngunda avi hiya tjitwa, eṋe mamu kamburwa namu tatumisiwa; mamu pangurirwa mozosinagoge namu yumbwa motjovakamburwa; nu mamu etwa komurungu wozombara novanane wOtukondwa mena rokutja mu ndji hongonona. 13 Eṋe otji mamu yenene okuhongonona indji Ombuze Ombwa. 14 Ripureye nawa kutja amu he rikende komurungu woruveze kutja mamu riyeura vi, 15 orondu ami me mu pe omambo nounongo kutja ape ha ningi omunavita na eṋe nangarire umwe ngu me mu pata momambo poo ngu ma pirukire imbi mbi mamu hungire. 16 Mamu yandjwa i ovanene veṋu novangu nomarumbi veṋu novazamumwe nomapanga weṋu, nu tjiva veṋu ave zepewa. 17 Novandu avehe mave mu tondo motjimbe tjandje. 18 Nungwari kamaamu hoka ondjise nangarire imwe moviuru vyeṋu. 19 Panḓereye po, nu otji mamu yama ominyo vyeṋu.

Jesus ma hungire omanyoneno wa Jerusalem

(Mt 24:15-21Mk 13:14-19)

20 “Tji mamu munu Jerusalem atja koverwa i ovimbumba vyovita, nu otji mamu tjiwa kutja omanyoneno watjo ya yenene. 21 Imba mbe ri mOjudea ngave taurire kozondundu; imba mbe ri motjihuro ngave ze mo mu tjo, nu imba mbe ri pendje movirongo ngaave hiti motjihuro, 22 orondu omayuva ngo maye rire ‘Omayuva wOmberero,’ kokutja imbi avihe mbya tjangwa momatjangwa vi yenenisiwe. 23 Owee kovakazendu ovingundi na ku imba mbe nyamisisa momayuva ngo! Mamu kara ozombamisiro ozonene tjinene mehi ndi, nomberero ya Ndjambi mai ya kotjiwaṋa hi. 24 Ovandu tjiva mave ṱengaruvyo, nu tjiva mave huurwa ave twarewa komahi pekepeke; nu imba mbe he ri Ovajuda mave tombo Jerusalem nga omayuva wawo wina tji ya kapita.

Omeero wOmuna wOmundu

(Mt 24:29-31Mk 13:24-27)

25 “Nu mape kara oviraisiro ovihimise meyuva na momueze na mozonyose. Kombanda yehi oviwaṋa avihe mavi kara nomerihahiziro amavi tira ombosiro yokuvare nozongazona. 26 Ovandu mave seurwa i omburuma, tji mave undju imbi mbi mavi ya mouye auhe, orondu omasa wevaverwa ma ye kurakurisiwa. 27 Oruveze ndo mave munu Omuna wOmundu ama yende motjikamba nomasa nounene. 28 Oviṋa mbi tji vya utu okutjitwa, kareye museka mu yere oviuru vyeṋu, orondu onguturiro yeṋu tjinga aya yenene.”

Omahongero womukuyumbwa

(Mt 24:32-35Mk 13:28-31)

29 Nu Jesus we ve serekarerera omasanekero nga: “Tareye komukuyumbwa na komiti omikwao avihe. 30 Ovyo tji vya utu okutwa ko omaso, mamu tjiwa kutja okurooro ku ri popezu. 31 Momuhingo tjingewo eṋe wina tji mamu munu oviṋa mbi amavi tjitwa, otji mamu tjiwa kutja ouhona wa Ndjambi uri popezu.

32 “Tjiri, me mu raere, omuhoko mbwi kamaau yanda ko nga oviṋa avihe mbyo tji vya tjitwa. 33 Eyuru nehi mavi yanda, nungwari inga omambo wandje kamaaye yanda ko.

Okukara katumba

34 “Ritjevereye nawa kutja amu ha kara neraru namu ha ṱomanuwa omazeu, namu ha kara nomerikendero wouye mbwi, tjapo eyuva ndi ngaari mu worereke. 35 Orondu oro mari worereke avehe mba tura kombanda yehi arihe otja ongwehe. 36 Kareye katumba nu mu kumbe aruhe kutja mu hare omasa okutuurunga nokuhinatjipo mu imbi avihe mbi mavi tjitwa, nokukurama komurungu wOmuna wOmundu.”

37 Omayuva ngo Jesus aa uhara ama hongo ovandu mondjuwo ya Muhona mutenya, nu ouṱuku a karara kOndundu yOmiṋinga. 38 Nu aruhe muhuka omunene, ovandu avehe aave ritupukire kondjuwo ya Muhona okukapuratena ku ye.