Ombanguriro ya Muhona kehi ra Amon
1 Inga onga hungirwa i Muhona kOamon, tja tja nai: “Ovandu va Israel ve ri pi? Kape na umwe ngu ma rumata ehi rawo are? Okutjavi tji va isa ovandu mbe rikotamena ku Milkom okukambura ehi romuhoko wa Gad nokutura mu ro? 2 Nungwari, tareye, omayuva maye ya mu me zuvisa ovature votjihuro ohongora Raba ondokohero yovita, notjo matji isiwa etundu, novirongo vyatjo mavi pi okuyanda. Ovaisrael otji mave kotora ehi rawo okuisa ku imba mbe ve yekere. 3 Vandu va Hesbon, ureye! Orondu omunyone u ri popezu. Vakazendu va Raba, tjiteye omutambo! Rizariseye ovipiriko, mu rire! Utukeye morumbo amwa puruka! Omukuru weṋu Milkom ma huurwa puna ovapristeri novaingona ve avehe. 4 Vehinouṱakame oweṋe, mu rihivira tjike? Omasa weṋu maye yanda. Okutjavi tji mu riyameka komasa weṋu namu tja: ‘Kape na ngu ma roro okuturwisa’? 5 Tareye, ami me eta ondirisiro ku eṋe okuza kominda avihe. Eṋe mamu tupuka amuhe. Auhe ma huku omuinyo we, nu kape nokukara ngu ma woronganisa ovataure rukwao.
6 “Nungwari kombunda me ṋingaparisa Amon rukwao. Ami, ngu mbi ri Muhona, owami ngu mba hungire.”
Ombanguriro ya Muhona kehi ra Edom
7 Muhona Omunamasaaehe wa tja nai kOedom: “Ovandu va Edom kave tji nounongo wawo are? Ovayandjandunge vawo kave tji nokuveraera imbi mbi mave sokutjita are? Ounongo wawo wa zenga are? 8 Vature va Dedan, tanaukeye nu mu tupuke! Kaṱareye! Ami me vanga okuyandeka ozondekurona za Esau, orondu omayuva ye ya ami mu me ze vere. 9 Ovandu tji mave nikora omandjembere ve sya ko omandjembere tjiva komivite; nomarunga tji ye ya ouṱuku, ye vaka imbi mbi maye vanga porwavyo. 10 Nungwari ami mba nongonona ozondekurona za Esau okumana ne vandurura omaṱarero wazo kutja aze ha uhara amaze ṱara rukwao. Omuhoko auhe wa Esau wa yandekwa; kape na umwe ngwa hupa po. 11 Iseye ozosewa zeṋu puna ami, nami me rikendere zo. Ovahepundu veṋu mave sora okuriyameka ku ami.
12 “Nangarire imba mbe ha sere okuverwa va nwa kotjinwino tjomberero okumana, neṋe mamu tjangovasi mamu kara nokuhinokuverwa are? Ayee, kako! Mamu sokunwa ko kotjinwino hi! 13 Ami omuini mba yana kutja otjihuro Bosra matji rire ombunikiro ondirise nokuti onguza; ovandu mave tji nyekerere nave ungurisa ena ratjo otja osengiro. Ovirongo avihe vyopopezu mavi rire omatundu nga aruhe. Ami ngu mbi ri Muhona, owami ngu mba hungire.”
14 Ami mba tja nai: “Edom, ami mba zuva ombuze ku Muhona. Eye wa tuma omuhindwa kutja a karaere oviwaṋa vi woronganise ovimbumba vyovita, nu vi rirongerere okukurwisa. 15 Muhona me ku ngundiparisa; nu kape na ngu me ku tenge. 16 Omeritongamisiro woye ye ku pukisa. Ove ko tiriwa tjinene nao otja pu mo tjangovasi u tiriwa. Ove wa tura motuuwa, kombanda kondomba yondundu; nungwari nandarire kutja wa tura kombanda otja onguvi, Muhona me ku raurire pehi. Muhona ongwa hungire.”
17 Muhona wa tja nai: “Omanyoneno ngu maye ya kOedom maye rire omatirise tjinene nai, kokutja auhe ngu ma kapita pu tjo, ma urume nu ma kumwe. 18 Otjiṋa tjingetjo matji tjitwa kOedom tjimuna ihi tji tja tjitirwe kOsodom tjimuna ihi tji tja tjitirwe kOsodom tjimuna ihi tji tja tjitirwe kOsodom na Gomora, indu ovyo novirongo vyopopezu na vyo tji vya nyonwa. Kape na umwe ngu maa tura mu ro rukwao. Ami, ngu mbi ri Muhona, owami ngu mba hungire. 19 Otja ongeyama, ndji mai zu movihwa ovipote meṋe ya Jordan okuyenda kehi romaryo oruhapo, ami otjinga a meya ne ramba Ovaedom tjimanga okuza momahi wawo. Omunane ngu me toorora, ongu ma honaparere otjiwaṋa. Owaṋi ngu ma sasanekwa na ami? Owaṋi ngu ma roro okundjitwara kombanguriro? Omunane uṋe ngu ma yenene okundjipirukira? 20 Otji mamu sokupuratena kondando, ndji mba tyera Ovaedom, na kondunge, ndji mbe ripurira okutjita kovature va Teman. Nandarire ovanatje vawo mave kokozorwa okutwarewa, navehe mave kumusiwa i imbi mbi mave munu. 21 Edom tji ra u, maku kara ondokohero onene nai nga ehi arihe tji ra zezera, nombosiro yondjuriro yovandu mai zuvaka nga kokure kOmuronga wOtuu. 22 Omunavita ma rwisa Bosra tjimuna onguvi, ndji mai rauka novivava mbya nyaturuka. Meyuva ndo ovarwe va Edom ozombangaṋe mave uruma tjinene tjimuna omukazendu mombandukiro.”
Ombanguriro ya Muhona kOdamaskus
23 Muhona wa hungirira Damaskus na tja: “Ovandu movihuro Hamat na Arpad ve nongendo nekurungo, tjinga ava zuva ombuze ombi. Mu wo mwa taurira omburuma tjimuna ozongazona zokuvare, nomitima vyawo avi ha sora okusuva. 24 Ovandu va Damaskus ovingundi, notji va tupukisiwa i omburuma. Owo ve ri momihihamo na mombamisiro, tjimuna omukazendu mombandukiro. 25 Otjihuro otjitjiukwa tji tja ri nondjoroka, tja isiwa etundu oparukeze. 26 Meyuva ndo ovazandu vatjo omitanda mave ṱire momivanda vyotjihuro, novarwe vatjo avehe wovita wina. 27 Ami me nyosa orumbo rwa Damaskus, nondjuwo youhona yombara Benhadad wina. Ami, ngu mbi ri Muhona Omunamasaaehe, owami ngu mba hungire.”
Ombanguriro komuhoko wa Kedar na kotjihuro Hasor
28 Muhona wa hungirira omuhoko wa Kedar omambo nga na wina otukondwa twehi tu twa ri kehi yotjihuro Hasor, tu twa havererwe i Nebukadnesar, ombara ya Babilon, na tja: “Rwiseye otjiwaṋa tja Kedar, mu yandeke omuhoko mbo wovandu vokomuhuka! 29 Pundeye ozondanda nozonyanda zawo, nomarapi omakutjire wozondanda zawo, noviungurise avihe mozondanda zawo! Ve yekeye ozongamero zawo, nu mu raere ovandu nai: ‘Ondirisiro ye mu kondoroka akuhe!’ ”
30 “Vature va Hasor, ami, ngu mbi ri Muhona, me mu rongo kutja mu tupuke kokure nu mu kaṱare. Orondu Nebukadnesar, ombara ya Babilon, we mu tyere ondunge yokumupirukira ama tja nai: 31 ‘Indjeye tu rwise ovandu mba mbe hi nongendo nu mbe ri morusuvo! Ovihuro vyawo kavi nomivero novipate, nowo va katura ku wo oveni.’
32 “Pundeye ozongamero nozongombe zawo azehe. Ami me rimbire ovandu kominda avihe, imba mbe henya ozondjise zawo mozohingo, nu me eta oumba kombanda yawo okuza kominda avihe. 33 Hasor matji rire ongaango nga aruhe, otjirongo mu mamu kara ozombandje porwazo. Kape na umwe ngu ma tura mo rukwao. Ami, ngu mbi ri Muhona, owami ngu mba hungire.”
Ombanguriro ya Muhona kOelam
34 Mombutiro youhona wa Sidkija, ombara ya Juda, Muhona Omunamasaaehe wa hungirira ehi ra Elam ku ami. 35 Eye wa tja nai: “Ami me zepa ovarumendu avehe vomauta, mba tjita Elam okurira ehi enamasa nai. 36 Ami me taurisire ovivepo mOelam okuza kominda avihe, nami me rimbi ovature varo ngamwa akuhe nga tji pe hi nokukara ehi ku ku ha ire ovandu varo. 37 Ami me twa mo omburuma movature va Elam ve ṱire ovanavita na wo mbu mave vanga okuvezepa. Ami me eta otjiwonga kovature va Elam momazenge wandje omanene, nu meve hindire ovimbumba vyovita nga tji mbe ve yandeke. 38 Me yandeke ozombara zawo novahongore vawo, nu me zikamisa otjihavero tjandje tjouhona mu ro. 39 Nungwari kombunda me ṋingaparisa ovature va Elam rukwao. Ami, ngu mbi ri Muhona, owami ngu mba hungire.”
© Herero Revision Bible © Bible Society in Namibia, 2021.
