Oviungura 13 - Herero Revision Bible (HRR)

Barnabas na Saulus mave toororwa ave hindwa

1 Mombongo ndja ri mOantiokie mwa ri ovaprofete novahonge, Barnabas na Simeon, ngwaa ku zu oNiger na Lusius, ngwa zire kOkirene na Manaena, ngwe kurira pamwe nongooneya Herodes, na Saulus. 2 Otjikando tjimwe owo ngunda amave karere Muhona nokuritjaera kovikurya, Ombepo Ondjapuke ya tja nai ku wo: “Ndji toororereye Barnabas na Saulus kutja ve ungure otjiungura ami tji mbe ve isanena.”

3 Nombongo tji ya za nokuritjaera kovikurya nokukumba nokuyambeka omake ku wo, arire tji ye ve hindi ve yende.

Barnabas na Saulus mave zuvarisa mOsiprus

4 Nu Barnabas na Saulus tji va za nokuhindwa i Ombepo Ondjapuke va ya kOseleukie, nokuza ngo ave kondo okuvare okuyenda kokakoverwa ka Siprus. 5 Tji ve ya kOsalamis va zuvarisa embo ra Ndjambi mozosinagoge. Owo va ri puna Johanes, ngwaa ku zu oMarkus, okuvevatera motjiungura hi.

6 Okuzambo owo va ryanga okakoverwa akehe nga kOpafos, ku va kavaza ko ondjai yorive yena Bar-Jesus, Omujuda, ngwee ri isana kutja eye omuprofete. 7 Eye wa ri epanga rongooneya yokakoverwa nga wena Sergius Paulus, omurumendu omunazondunge. Ongooneya ndji ya isanisa Barnabas na Saulus ve ye komurungu we, eye tjinga aa vanga okuzuva embo ra Ndjambi. 8 Nungwari owo va kuramenwa i ondjai Elimas momurungu; Elimas ondi ri ena rayo mOtjigrike. Nondjai ndji ya kondja okutjaera ongooneya kongamburiro. 9 Nu Saulus, wina ngwa ri Paulus, tjinga e urisirwe nOmbepo Ondjapuke, wa siririka omeho we mondjai ndji 10 na tja: “Ove muatje wa Satan! Oove omunavita na ngamwa avihe ovisemba. Ove we ura novineya ovivi ngamwa avihe, nu aruhe u rora okurundurura ouatjiri wa Muhona u rire ovizeze! 11 Nambano Muhona me ku vere; ove mo poṱupara, nu ko nokumuna ko ondjerera yeyuva oure womayuva.”

Tjimanga kwa wira eṱuku komeho wa Elimas, neye wa ryanga ama paha omundu ngu me mu nana keke. 12 Ongooneya tji ya muna imbi mbya tjitwa, arire tja kambura, tjinga a himisiwa i omahongero ohunga na Muhona.

Paulus na Barnabas mOantiokie na Pisidie

13 Paulus novemukongorere va konda omeva kokuvare okuza kOpafos nave ya kOperge, ihi otjihuro mehi ra Pamfilie. Motjihuro hi Johanes, ngwaa ku zu oMarkus, ome ve esa na yaruka kOjerusalem. 14 Nowo va ryama komurungu okuza kOperge nave ya kOantiokie mehi ra Pisidie, nu mesabata owo ave hiti mosinagoge nave kara pehi. 15 Nu kombunda yomaresero wOmatwako wa Moses nowomatjangwa wovaprofete, ovanane vosinagoge arire tji va raere omundu worive a tje nai ku wo: “Varumendu ovakwetu, tji mu nembo okuyanḓiparisa na ro ovandu, arikaneye hungireye.” 16 Paulus arire tja sekama na ṋanga neke okuvemwinisa nu a utu okuhungira a tja:

“Vaisrael ovakwetu, na eṋe amuhe mbu mu he ri Ovajuda nu mbu mu nondira ku Ndjambi, purateneye! 17 Ndjambi wotjiwaṋa tja Israel hi wa toororere ootate mukururume nu e ve zikamisa okurira otjiwaṋa otjinene, indu tji va turire otja ovozonganda mehi ra Engipte. Ndjambi we ve pitisa mehi ndi momasa we omanene, 18 nu a zara omihingo vyawo oure wozombura mangara omirongo vine mokuti onguza. 19 Eye wa yandeka oviwaṋa hambombari mehi ra Kanaan, nu arire tja yandjere otjiwaṋa tje tji rire otjini tjehi ndi. 20 Avihe mbi vya kambura oure wozombura mangara omasere yane nomirongo vitano.

“Kombunda yanao we ve pere ovapangure nga komayuva nga womuprofete Samuel. 21 Nowo tji va ningira ombara, Ndjambi e ve pe Saul, omuzandu wa Kis, womuhoko wa Benjamin, kutja a rire ombara yawo oure wozombura omirongo vine. 22 Nu Ndjambi tja za nokuisa mo Saul mouhona, arire tja ziki David okurira ombara yawo. Nomambo Ndjambi nga hungirira David, owo nga: ‘Ami mba munu kutja David, omuna wa Isai, onguri omurumendu ngwi ngu ma tjata ku ami, omurumendu ngu ma yenenisa ombango yandje aihe.’ 23 Jesus, ondekurona ya David, Ndjambi ongwa isa po Omukuture wotjiwaṋa tja Israel otja pa kwizikire. 24 Jesus ngunda e hiya uta otjiungura tje, Johanes wa zuvarisa kotjiwaṋa tja Israel atjihe kutja otjo tji sokuritanaura kourunde watjo, nu tji papitisiwe. 25 Nu Johanes tja ri pokumana otjiungura tje, wa tjere nai kotjiwaṋa: ‘Eṋe tji mamu ripura mamu tjangovasi owami aṋi! Kawami ngwi eṋe ngu mu undja. Nungwari purateneye! Eye meya kombunda yandje, nami hi nakupwa pokukutura ozongaku kozombaze ze.’

26 “Vaisrael ovakwetu, ozondekurona za Abraham, na eṋe amuhe mbu mu he ri Ovajuda nu mbu mu nondira ku Ndjambi. Ombuze ndji yondjamo ya hindwa ku eṱe! 27 Ovature va Jerusalem novanane vawo kaave tjiwa kutja Jesus onguri Omukuture, nu wina kaave zuu nawa omambo wovaprofete ngaa e resewa aruhe mesabata, nungwari owo va yenenisa omambo wavaprofete mokupangura Jesus. 28 Nowo nandarire kutja kave mwine ondjo mu ye yokumupangura kokuṱa, ngunda ape ri nao owo va ningira Pilatus, kutja Jesus nga ṱe. 29 Nu tji va za nokutjita avihe ku Jesus imbi omatjangwa mbi ya hungirira ye, arire tji ve mu turura kotjikoroise nave mu paka meyendo. 30 Nungwari Ndjambi we mu pendura movakoke, 31 noure womayuva omengi eye we rimunikisa ku imba mba ryangere puna ye okuza kOgalilea okuyenda kOjerusalem. Owo nambano ombe ri ovahongonone ve kotjiwaṋa tja Israel. 32-33 Neṱe oweṱe mba twa eta Ombuze Ombwa ku eṋe: Imbi Ndjambi mbya kwizikirire ootate mukururume kutja ma tjiti, nambano ombya tjitire eṱe mbu tu ri ozondekurona zawo, mokupendura Jesus komuinyo. Otja tjinga apa tjangwa nai mEpsalme oritjavari:

‘Oove omuna wandje;

ndinondi ami ondi mbe ku kwata.’

34 Nomambo nga, Ndjambi onga hungira ohunga nokumupendura movakoke, eye kamaa worere ko meyendo:

‘Ami me mu pe ozondaya ozondjapuke nu zatjiri

Ami nḓu mba kwizikira David.’

35 Nopu ma zu okutja nai poṋa parwe:

‘Ove komoo yandjere omukarere woye omuṱakame kutja a worero meyendo.’

36 Orondu David tja za nokuyenenisa imbi ovyonḓero ya Ndjambi indu ngunda a ri nomuinyo, wa koka na pakwa puna ooihe mukururume, norurorva rwe aru worere meyendo. 37 Nungwari otjiṋa hi katji tjitirwe ku ingwi ngwa pendurwa movakoke i Ndjambi. 38-39 Eṱe matu vanga kutja, Vaisrael ovakwetu, mu tjiwe kutja omu Jesus indji ombuze yondjesiro yourunde tji mai zuvarisiwa ku eṋe, nokutja auhe ngu ma kambura mu ye ma kuturwa kourunde auhe. Omatwako wa Moses kaye yenene okumukutura ku wo. 40 Ṱakamiseye kutja imbi ovaprofete mbi va hungirire avi ha tjitwa ku eṋe, indu tji va tjere:

41 ‘Tareye, oweṋe mbu mwa tengurura Ndjambi!

Temweye nu mu ṱe,

orondu ihi tji me tjiti ndinondi

kamaamu kambura ko mu tjo

nandi mwa serekarererwa i omundu!’ ”

42 Paulus na Barnabas ngunda amave piti mosinagoge, ovandu arire tji ve ve ningire kutja mesabata ve ye okuyekuveserekarerera oviṋa mbi komurungu. 43 Nombongarero mosinagoge tji ya za nokuhaṋika, Paulus na Barnabas otji va kongorerwa i Ovajuda naimba mbe he ri Ovajuda mbe ritanaurira kongamburiro yOvajuda. Ovaapostele va hungira kuna wo nave ve yanḓiparisa kutja ve panḓere potjari tja Ndjambi.

44 Nu mesabata rokombunda yaindo ovature mangara avehe motjirongo ve ere okuyekuzuva embo ra Muhona. 45 Ovajuda tji va muna otjimbumba tjovandu, arire tji va ṱeruru tjinene; owo va hengurisa omambo Paulus ngaa hungire nu ave mu yamburura. 46 Nungwari Paulus na Barnabas va hungira tjinene noupandi ave tja: “Yari ohepero kutja embo ra Ndjambi ri sokuraerwa ku eṋe rutenga. Nungwari tjinga amwa nakaura indi embo, nu tjinga amu he rivara otja mbu mwa pwira okupewa omuinyo waaruhe, eṱe matu mu esa atu i ku imba mbe he ri Ovajuda. 47 Orondu etwako Muhona nde tu pa oro ndi:

‘Ami mbe ku ririsa ondjerera ku imba mbe he ri Ovajuda

kokutja ouye auhe u yamwe.’ ”

48 Imba mbe he ri Ovajuda tji va zuva omambo nga, arire tji va nyanda omitima nave hivirike Ombuze ya Muhona; nu imba mba toororerwa omuinyo waaruhe va rira ovakambure.

49 Embo ra Muhona ra handjauka akuhe morukondwa rwehi ndo. 50 Nungwari Ovajuda va handjisa ovarumendu ovatjiukwa votjihuro, novakazendu vomihoko vyarwe ovayozikwa mbaa ve rikotamene ku Ndjambi. Owo va uta okutatumisa Paulus na Barnabas nu ave ve ramba morukondwa rwehi rawo. 51 Ovaapostele va pukumuna oruuma kozombaze zawo otja otjiraisiro tjokutja va nakaura ovature vorukondwa rwehi ndo, narire tji va i kOikonium. 52 Ovakambure mOantiokie va ri nenyando tjinene nu ve urire nOmbepo Ondjapuke.