Onḓakameno mondjamo ya Ndjambi
Komuimburise Jedutun. Epsalme ra David.
1 Mu Ndjambi erike omuinyo
wandje omu u muna orusuvo;
nombatero yandje i za mu ye.
2 Eye porwe oruuwa rwandje
nombwiro yandje notjiṱunga tjandje,
hi nokuṱeputi tjinene.
3 Eṋe amuhe mamu vanga okurwisa
omundu umwe nai nga ruṋe,
ngu he ri omunamasa porumbo
ndwa teka nu ndu ri pokuwa?
4 Eṋe mu vanga okumuwisira pehi
uriri okuza poṋa pe pondjozikiro;
mu nonyuṋe movizeze;
mu hungira omambo wondaya,
nungwari momitima vyeṋu tjandje
mamu mu sengi.
5 Tjiri, mu Ndjambi erike
omuinyo omu u muna orusuvo;
omaundjiro wandje ye za mu ye.
6 Eye porwe oruuwa rwandje
nombwiro yandje notjiṱunga tjandje,
hi nokuṱeputi tjinene.
7 Ombatero nondatero yandje i ri mu Ndjambi;
nu mu Ndjambi wina mu
noruuwa rwomasa wandje,
nomaundiro wandje.
8 Riyamekeye ku Ndjambi omayuva aehe,
oweṋe tjiwaṋa tjandje;
Mu raereye omaumba weṋu aehe!
Ndjambi eye omaundiro wetu.
9 Ovandu avehe ve ri
tjimuna osuvaneno yomuinyo;
ovanene nouṱiṱi owo omungandjo porwe.
Tji we ve twa kotjisaneke, owo
kave nondjinda,
owo ovapupu posuvaneno yomuinyo.
10 Amu riyameke kozondjito zoutwe,
nu amu vanga okumuna
oviṋa mokupunda ovandu:
Outumbe weṋu nandi wa takavarere ko,
amu riyameke ku wo.
11 Ndjambi wa hungira embo rimwe,
nami mbe ri zuva tuvari,
kutja omasa aehe owa Ndjambi,
12 nokutja otjari tje otjo otjikarerere.
Ove omuini, Muhona,
u yandja ondjambi ku auhe otja
koviungura vye.
© Herero Revision Bible © Bible Society in Namibia, 2021.
