Paulus ma i kOmakedonie na kehi rOvagrike
1 Ezunganeno tji ra za nokuwa pehi, Paulus wa woronganisa ovakambure nu e ve virikiza nomambo wokuveyanḓiparisa. Tjazumba a zu mo a i kOmakedonie. 2 Eye wa tuurunga otukondwa atuhe twa Makedonie na yanḓiparisa ovakambure potuingi nomazuvarisiro we. Okuzambo eya kOgrike, 3 nu a kara mo oure womieze vitatu. Nu tje rirongerera okuyenda kOsirie, arire tja zuu kutja Ovajuda ve rikutu kumwe okumusekamena; eye ope rimanena okuyaruka ama tuurungire mOmakedonie. 4 Sopater, omuzandu wa Pirus, ngwa zire kOberea, wa ya puna ye; imba wina va ya puna ye: OAristarkus na Sekundus, mba zire kOtesalonika, na Gajus, ngwa zire kOderbe, na Tikikus na Trofimus, mba zire korukondwa rwehi ra Asie, na Timoteus. 5 Owo va tenga po okuyenda nave ketuundjira mOtroas. 6 Kombunda yeyuva romukandi wOzomboroto nḓe hi nosurise eṱe twa konda okuvare okuza kOfilipi, nomayuva yetano tji ya kapita atu kevevaza mOtroas, nu mOtroas twa kara mo oure wotjivike.
Ouyenda ousenina wa Paulus kOtroas
7 Oroviungura ongurova eṱe twa woronganena omariro omayapuke. Paulus wa hungira kuna ovandu nu a panḓere pokuhungira nga mokati kouṱuku, tjinga a sere okuyenda mependukirwa. 8 Nu iyamu yaka omamunine omengi metuwo rokombanda mu twa tjitira ombongarero. 9 Omurumendu omutanda wena Eutikus wa haamene poruiho, nu Paulus tjinga a hungira orure, Eutikus wa koṱura tjinene nu korusenina a rara ozomboṱu ozonḓeu, narire tja wire pehi okuza kondendeko indji oitjatatu yondjuwo. Nowo tji ve mu toora eye tjandje wa koka. 10 Nungwari Paulus wa punda kehi e keriyumba kombanda ye, e mu pukata na tja: “Amu uruma, eye ingee u nomuinyo!” 11 Tjazumba eye a rondo rukwao a kakoyora omboroto nu a ri. Nu tja za nokuhungira kuna wo oruveze orure nga tji pa tji, arire tja i. 12 Nowo va toora omurumendu omutanda ngwi ave mu yarura koyawo e nomuinyo, nowo va yarurwa pehi omitima tjinene.
Ouyenda wo kOmilete okuza kOtroas
13 Eṱe twa tenga po okuyenda mondjuwoyomomeva kOasus, nu koṋa ngo okutwa katoorera Paulus. Eye we tu raera kutja tu tjite nao, tjinga a vangere okuyenda ngo pehi. 14 Nu Paulus tje ketuvaza mOasus, otji twe mu rondisa mondjuwoyomomeva natu i kOmitilene. 15 Eṱe twa konda okuvare okuza ngo natu vaza momuhunga wa Kios mependukirwa. Kombunda yeyuva rimwe twe ya mOsamos, nu meyuva ndi ndakongorere atu vaza mOmiletus. 16 Paulus wa tya okuyenda mondjuwoyomomeva okukapita kOefese, kokutja a ha manene oruveze morukondwa rwa Asie. Eye wa ri nohakahana kutja, tji ma sora, meyuva ra Pentekoste a kare mOjerusalem.
Paulus ma virikiza ovatarere va Efese nomahungi
17 Paulus wa hinda ombuze kOefese okuza kOmiletus okuningira ovatarere wombongo kutja ve ye okumumuna. 18 Nowo tji ve ya, arire tja tja ku wo: “Eṋe mamu tjiwa omuhingo mbu mba kara oruveze aruhe puna eṋe okuza keyuva ndi etenga ndi mba vazere morukondwa rwa Asie. 19 Ami mba ungura otjiungura tjandje nomerisusuparisiro omanene nomahoze omengi otja omukarere wa Muhona oure womayuva omazeu nge ndji wira mena romerikutirokumwe omengi wOvajuda wokuvanga okundjizepa. 20 Eṋe mamu tjiwa kutja hi horekere otjiṋa atjihe ngamwa tji tja sere okurira ombwiro yeṋu indu tjiye zuvarisa nokuhonga ovandu motupanda na mozondjuwo zeṋu. 21 KOvajuda naimba mbe he ri Ovajuda avehe pamwe mba yandja ko omaronga omakukutu wokutja ve ise ourunde wawo amave ritanaurire ku Ndjambi nu ve kambure mu Muhona wetu Jesus. 22 Nambano ami, mokukara nonḓuviro kOmbepo Ondjapuke, me i kOjerusalem ambi hi nokutjiwa kutja tji matji katjitwa ku ami koṋa ngo otjikeṋa, 23 pendje na imbi mba raerwa i Ombepo Ondjapuke kutja motjihuro atjihe otjovakamburwa nomauzeu maye ndji undju. 24 Nungwari omuinyo wandje ku ami hi u vara otja omunanḓengu; tjinene me vanga kutja mbi yenenise ouyenda wandje, nu mbi mane otjiungura Muhona Jesus tje ndji pa okuungura. Notjo okongwi okuhongonona Ombuze Ombwa yotjari tja Ndjambi.
25 “Ami mba ryanga mokati keṋu amuhe ame zuvarisa ouhona wa Ndjambi. Nambano me tjiwa kutja kape na umwe weṋu ngu me ndji munu rukwao. 26 Ami ndino opu me hungirire ku eṋe kutja umwe weṋu tja pandjara, ami hi nokukara ko nomerizirira, 27 tjinga ambi hi na indu mba horekere okumuraera ombango aihe ya Ndjambi. 28 Nopu mwa sokuriṱakamisa oveni nokurisa orupanda ndu mwa pewa i Ombepo Ondjapuke okurutjevera. Rireye ovarise wombongo ya Ndjambi, ndja isa po oye omuini mokuiranda nombinḓu yOmuna we. 29 Ami me tjiwa kutja tji mba zu po pu eṋe, ozombungu ovindandi maze taurire mu eṋe nokuhinokusya po onḓu na imweimwe morupanda. 30 Omayuva maye ya ovandu tjiva mokati keṋu mu mave kora ovizeze okupukisa ovakambure kutja ve ve kongorere. 31 Kareye katumba nu mu zemburuke kutja ami mbe mu honga amuhe ame riri tjinene omayuva omengi omutenya nouṱuku oure wozombura ndatu.
32 “Nambano ami me mu raya ku Ndjambi na kembo rotjari tje ndi mari yenene okumutunga nokumupa ozondaya Ndjambi nḓa ṱunina ovandu ve avehe. 33 Ami hi na pu mba nanukira osilveri nongoldo nozombanda zomundu. 34 Eṋe oveni mamu tjiwa kutja ami mba ungura nomake wandje omuini nga okumunina po ovihepwa vyandje novyovendjikongorere. 35 Ami mbe mu pa otjihorera moviṋa avihe kutja tji matu ungura tjinene momuhingo mbwa sana ngwi, otji matu vatere imba ovingundi amatu zemburuka omambo wa Muhona Jesus indu tja tjere: ‘Mokuyandja mu nenyando tjinene pokupewa.’ ”
36 Nu Paulus tja za nokuhungira omambo nga, arire tja wora ozongoro puna wo avehe na kumbu. 37 Owo avehe va rira tjinene, ave ripetere kosengo ye nave mu hupite, 38 nu va toora oruhoze tjinene, eye tjinga a tjere kamaave mu munu rukwao. Tjazumba arire tji ve mu ṱike kondjuwoyomomeva.
© Herero Revision Bible © Bible Society in Namibia, 2021.
