Ombuze ya Jeremia kombara Sidkija
1 Nebukadnesar, ombara ya Babilon, wa zika Sidkija, omuzandu wa Josija, okurira ombara mOjuda, moruveze rwa Jojakin, omuzandu wa Jojakim. 2 Nungwari Sidkija novahongore ve novature vehi kave karere nonḓuviro kombuze Muhona ndja yandjere ku ami.
3 Ombara Sidkija wa tuma Jukal, omuzandu wa Selemja, nomupristeri Sefanja, omuzandu wa Maaseja, okukaningira kutja mbi kumbire otjiwaṋa tjetu ku Muhona, Ndjambi wetu. 4 Ami tjandje ingee hiya tuwa motjovakamburwa, nu ee ryanga noukutuke mokati kotjiwaṋa. 5 Otjimbumba tja Babilon tjovita tja koverere Jerusalem, nungwari otjo tji tja zuva kutja otjimbumba tja Engipte tjovita tja kondo omuruko wa Engipte, otjimbumba tja Babilon tjovita otji tja yaruka ombunda.
6 Muhona, Ndjambi wa Israel, otje ndji raera 7 kutja mbi tje nai ku Sidkija: “Tjiri, otjimbumba tja Engipte tjovita tji ri mondjira okuyekukuvatera, nungwari matji yaruka kehi ratjo. 8 Ovababilon otji mave kotoka, ave rwisa otjihuro, ave tji kambura nave tji nyosa. 9 Ami, ngu mbi ri Muhona, me mu rongo kutja amu he riwovisa mokutjangovasi Ovababilon kave nokukotoka, orondu owo mave kotoka. 10 Nangarire kutja mwa havere otjimbumba atjihe tja Babilon tjovita, nga tji pa hupu ovarumendu ozondjahe porwe mba saravara mozondanda zawo, ovarumendu mbo mave sekama nave nyosa otjihuro hi okumana.”
Jeremia ma kamburwa na tuwa motjovakamburwa
11 Otjimbumba tja Babilon tjovita tja yaruka ombunda okuza mOjerusalem, otjimbumba tja Engipte tjovita tjinga atji ri popezu. 12 Ami otji mba vanga okuza mo mOjerusalem nokuyenda kehi ra Benjamin okukarumata eṱa randje mouini weṱunḓu retu. 13 Nungwari tji mba vaza Omuvero wa Benjamin, omunene wovatjevere ngwa ri moviungura, wena Jirija, omuzandu wa Selemja, omuzandu wa Hananja, we ndji tjaera na tja: “Kurama, ove movanga okukonda kOvababilon!”
14 Ami mba zira e tja: “Ka tjiperi! Ami hi nokukonda kOvababilon!” Nungwari Jirija ka vangere okupuratena ko ku ami; eye we ndji kambura ne ndji twara kovahongore. 15 Owo ve ndji pindikira tjinene nave rakiza kutja mbi tonwe nave ndji patere mondjuwo ya Jonatan, omutjangerepo wouhona, ndja isiwa po otjovakamburwa. 16 Ami mba tuwa metuwo romehi ne ṱizirwa mo oruveze orure.
17 Eyuva rimwe ombara Sidkija wa hinda omundu ku ami, nu tji mbe ya, eye arire tje ndji purire peke mondjuwo youhona a tja: “Pe nombuze yorive ndja zu ku Muhona are?”
Ami mba zira e tja: “Ii, opu i ri; ove mo yandjewa mouvara wombara ya Babilon.” 18 Ami mba pura ombara Sidkija e tja: “Ami mba tjita ouvi watjike kove poo kovahongore voye poo kotjiwaṋa hi, tji we ndji twa motjovakamburwa nai? 19 Ovaprofete veṋu mbe mu raera kutja ombara ya Babilon kai nokurwisa eṋe poo indi ehi, nambano ve ri pi? 20 Nambano, muhona ombara, ami me riyarikaṋa kutja u puratene ku ami nu u tjite imbi mbi me ningire kove. Arikana, o ndji yarura motjovakamburwa mondjuwo ya Jonatan. Tji wa tjiti nao, ami, tjiri, me ṱire moṋa mwi!”
21 Ombara Sidkija otja rakiza kutja mbi paterwe morupanda romatjeverero rwondjuwo youhona. Ami mba kara mo, neyuva arihe ee pewa omboroto ombomba okuza kovatereke, nga ozomboroto azehe motjihuro tji papu.
© Herero Revision Bible © Bible Society in Namibia, 2021.